Sign In 
រាជធានីភ្នំពេញ ៖ ជីវិតរស់នៅប្រចាំថ្ងៃ ពិតណាស់តែងតែមានតម្រូវការនានា និងភាពចាំចាច់អ្វីមួយក្នុងការចាយលុយរបស់យើងដែលមាន ឬប្រាក់ចំណូលដែលយើងរកបាន។ យ៉ាងណាមិញ អ្នកខ្លះមានការចាយវាយដោយមានកម្រិត រីឯខ្លះទៀតការចាយវាយហាក់បីដូចជាមិនសូវខ្វល់អំពី ភាពចាំបាច់នៃការចាយលុយនោះទេ ។
ការចាយវាយទៅលើរបស់ចាំបាច់ និងរបស់ដែលស្រឡាញ់ គឹមានភាពខុសគ្នា ដូចនេះហើយយើងម្នាក់ៗគួរយល់ដឹង អំពីតម្រូវការ និងការចង់បាន។ លោក ស៊ាន ធនិន ជាអគ្គនាយកក្រុមហ៊ុន CEO Master Club Investment បានឱ្យដឹងថា «ប្រសិនបើយើងអាចធ្វើបាន ៣ ចំណុចនេះហើយ នោះជីវិតយើងនឹងមិនវិលវល់ ឬខ្ជះខ្ជាយលុយកាក់ដោយឥតប្រយោជន៍នោះទេ»។
ក្នុងមួយខែៗ នៃប្រាក់ចំណូល ឬប្រាក់ខែរបស់យើង យើងគួរតែបែងចែកឱ្យច្បាសលាស់ ហើយក៏ត្រូវតែអនុវត្ត និងការតាំងចិត្តខ្ពស់ផងដែរ។ លោក ស៊ាន ធនិន បន្តថា ប្រាក់ខែយើង គួរបែងចែកជា ៣ ប្រភេទ ទី១ ៥០ភាគរយនៃប្រាក់ខែ, ទី២ ៣០ភាគរយនៃប្រាក់ខែ និងទី៣ ២០ភាគរយនៃប្រាក់ខែ។ អ្នកជំនាញខាងផ្នែកអចលនទ្រព្យ រូបនេះ បានបន្តថា «៥០ភាគរយ ត្រូវចាយទៅលើភាពចាំបាច់ក្នុងគ្រួសារ ក្នុងនោះយើងរាប់ទៅលើ ការចំណាយទៅលើម្ហូបអាហារ ចំណាយទៅលើសំលៀកបំពាក់ ចំណាយទៅលើថ្នាំសដ្កូវពេលយើងឈឺ ចាយលើថ្លៃបង់សាលាកូន ចាយលើទឹកភ្លើង ឬបើមិនមានផ្ទះខ្លួនឯងត្រូវបង់ថ្លៃផ្ទះជួល ជាដើម»។ សម្រាប់ការចំណាយ ទី២នោះ លោក ស៊ាន ធនិន បានបន្តថា «៣០ភាគរយ គឺជាការចំណាយណា ដែលឆ្លើយតបទៅលើ ភាពចង់បាន ឬគេហៅថា របស់ដែលយើងស្រឡាញ់នោះឯង។ ប៉ុន្តែការចង់បានត្រង់នេះ មានន័យថាអាចអត់អាចបាន ចង់បានខោអាវប្រេន ម៉ូតូល្អ ឡានម៉ាកល្អ ទាំងអស់នេះហើយ ដែលជាការចង់បាន។ ដូចនេះប្រសិនយើង គិតមើល ៨០ ភាគរយ បានចំណាយទៅលើ ភាពចាំបាច់ និងការចង់បានទៅហើយ ដូចនេះ តើយើងនៅសល់ ២០ភាគរយទៀតយកទៅធ្វើអ្វី»។
ទី៣ ២០ភាគរយ គឺជាការចាយទៅការសន្សំ និងការវិនិយោគ។ លោកបានបន្ថែមថា «ការចាយទៅលើការវិនិយោគ គឺជាការចាយ ដើម្បីរំពឹងផលចំណេញ ឬនឹងមានផលប្រយោជន៍អ្វីមួយត្រឡប់មកវិញ។ ឧទាហរណ៍ យើងយកលុយទៅដាក់សន្សំ ក្នុងធនាគារ ដូចនេះប្រាកដណាស់ថាយើងនឹងរំពឹង ថាបានការប្រាក់មកវិញ។ ឬក៏អាចថាអ្នកខ្លះ យកលុយទៅទិញភាគហ៊ុន ប៉ុន្តែមិនប្រាកដថាអាចចំណេញទេភាគហ៊ុន ព្រោះវាអាស្រ័យទៅលើហាងឆេងដែរ។ មួយវិញទៀត យើងអាចយកលុយទៅវិនិយោគ ទៅលើដី ឬផ្ទះ ចឹងទៅ ទាំងនេះយើងអាចធ្វើបាន វាអាចចំណេញ នៅពេលណាមួយ»។ មានការគ្រប់គ្រងលុយឬប្រាក់ខែប៉ុណ្ណឹងហើយ មិនប្រាកដថាអាចគ្រប់គ្រាន់ទេ ទាល់តែយើងមានការតាំងចិត្តនិងការប្តេជ្ញាខ្ពស់ទៀតផងដែរ។ អ្នកខ្លះដោយសារការចង់បាននឹងខ្លាំង មិនបានគិតទេ ទៅដកលុយដែលសន្សំ ឬទុកវិនិយោគនឹងទៅចាយ ចឹងមានន័យថាការចាយទៅលើភាពចង់បាននេះវាអស់បាត់ទៅហើយ៕ ផ្ដល់សិទ្ធិដោយ៖ កោះសន្តិភាព
