Sign In 
ការធ្វើឌីជីថលវូបនីយកម្ម និងការផ្លាស់ប្តូរក្នុងសេដ្ឋកិច្ចបាននាំឲ្យមនុស្សដែលនៅវ័យក្មេងជាច្រើនជួបនូវបញ្ហាកាន់តែច្រើនផ្នែកលុយ ។ ដោយហេតុដូចនេះ ក្មេងៗត្រូវតែរៀនពីការរក ចាយ សន្សំ និងវិនិយោគលុយ ខណៈដែលចៀសវាងការបោកប្រាស់ផ្សេងៗដែលអាចបង្កនូវបញ្ហាលុយនៅថ្ងៃអនាគត ។
នៅអាយុ ៧ឆ្នាំ ក្មេងៗចាប់ផ្តើមយល់ពីលុយហើយ ។ ពួកគេអាចនឹងឮឪពុកម្តាយ និងសមាជិកក្នុងគ្រួសារដទៃនិយាយពីលុយ ។ ពួកគេតាមដានមើលការចាយវាយរបស់ឪពុកម្តាយ ការសន្សំ ការវិនិយោគ និងការបរិច្ចាគលុយជាដើម ។
ពួកគេក៏អាចឮពីរឿងគណនីធនាគារ កម្ចី អាជីវកម្មគ្រួសារ និងចំណូលពីការងារផងដែរ ។ ទោះជាពួកគេមិននិយាយជាមួយឪពុកម្តាយពីរឿងទាំងនេះពិតមែនក្តី ពួកគេនៅតែកំពុងស្រូបព័ត៌មានដែលអាចជះឥទ្ធិពលលើទម្លាប់ចាយវាយ និងគ្រប់គ្រងលុយនៅថ្ងៃអនាគត ។
ហើយពេលទាំងនេះពិតជាមានសារៈសំខាន់ណាស់សម្រាប់ក្មេងៗ ។ ការសិក្សាជាច្រើនបានប្រទះឃើញថា ទម្លាប់ចាយវាយ និងទស្សនៈរបស់ក្មេងៗលើលុយទទួលរងឥទ្ធិពលតាំងពីក្មេងៗអាយុ ៧ឆ្នាំ ដូចជាពួកគេចាប់ផ្តើមយល់ដឹងពីភាពខុសគ្នានៃការប្រើប្រាស់លុយជាដើម ។ លើសពីនេះទៅទៀត ពួកគេចាប់ផ្តើមយល់ពីការរកលុយផងដែរ ប៉ុន្តែសាលារៀនភាគច្រើនមិនលើកពីប្រធានបទនេះដល់កូនៗតាំងពីអាយុនេះទេ ។ ដោយហេតុដូចនេះទើបឪពុកម្តាយគួរតែមានតួនាទីក្នុងការបង្រៀនកូនៗ ។
មេរៀនសំខាន់មួយដែលឪពុកម្តាយមិនត្រូវមើលរំលង គឺការប្រើប្រាស់លុយ។ ឪពុកម្តាយគួរតែបង្រៀនកូនៗថាលុយអាចយកទៅចាយវាយ សន្សំ វិនិយោគ ឬបរិច្ចាគ ។ កូនៗត្រូវដឹងថាពួកគេមានជម្រើសច្រើនពេលដែលមានលុយក្នុងដៃ ដែលមិនចាំបាច់តម្រូវឲ្យពួកគេចាយ ឬសន្សំទាំងស្រុងទេ ។ ឧទាហរណ៍ដូចជាជម្រើសវិនិយោគអាចនាំយកប្រាក់ចំណូលនៅថ្ងៃអនាគតជាដើម ។
ក្រៅពីនេះហើយ ឪពុកម្តាយខ្លួនផ្ទាល់ក៏ត្រូវធ្វើជាគំរូល្អដល់កូនៗដែរព្រោះអ្នកទាំងពីរប្រៀបបានជាឧទាហរណ៍ជាក់ស្តែងដែលកូនៗរៀនសូត្រតាមដោយផ្ទាល់ ៕ ផ្ដល់សិទ្ធិដោយ៖ កោះសន្តិភាព
