Sign In 
សត្វជ្រូក២២ក្បាល ដែលត្រូវបានលួចដឹកពីប្រទេសថៃ ដោយខុសច្បាប់ ចូលមកកម្ពុជា ត្រូវបានកម្លាំងសមត្ថកិច្ច បង្ខាំងទុកនៅកន្លែងចត្តាឡីស័ក នៃការិយាល័យនៃមន្ទីរកសិកម្មខេត្ត ដើម្បីយកសំណាកមកវិភាគ ផ្ញើទៅអគ្គនាយកដ្ឋានសុខភាពសត្វ និងផលិតកម្មសត្វ ចាត់វិធានការ តាមនីតិវិធី។
បើតាម លោកតាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានសុខភាពសត្វ និងផលិតកម្មសត្វបានឱ្យដឹងថា សមត្ថកិច្ចជំនាញ បានចុះបង្ក្រាបករណី លួច ដឹកជ្រូកខុសច្បាប់មកពីប្រទេសថៃ កាលពីវេលាម៉ោង១ទាបភ្លឺ ថ្ងៃទី៣១ ខែកក្កដា ឆ្នាំ២០២០ លើផ្លូវជាតិលេខ៥ ភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ។
រថយន្តដែលលួចដឹកជ្រូក មកពីស្រុកថៃនោះម៉ាកSANGYOUG ពណ៌សម្បកឪឡឹក ជាប្រភេទរថយន្តដឹកអ្នកដំណើ១២កៅអី ពាក់ស្លាកលេខភ្នំពេញ2J-3410 មានផ្ទុកសត្វជ្រូករស់ចំនួន២២ក្បាល ដែលគ្រោងលក់បន្តចែកចាយ នៅខេត្តសៀមរាប ដោយគ្មានច្បាប់អនុញ្ញាត។
ក្រោយការឃាត់រថយន្តដឹកជ្រូករួចមក សមត្ថកិច្ច បាននាំយកវត្ថុតាងខាងលើ មកបង្ខាំងទុកនៅកន្លែងចត្តាឡីស័ក នៃការិយាល័យនៃមន្ទីរកសិកម្មខេត្ត ដើម្បីយកសំណាកមកវិភាគ ផ្ញើទៅអគ្គនាយកដ្ឋានសុខភាពសត្វ និងផលិតកម្មសត្វ ចាត់វិធានការ តាមច្បាប់៕ ដោយ៖ត្នោត
