Sign In 
ខេត្តព្រះសីហនុ ៖ ព្រឹកថ្ងៃទី២០ កញ្ញា ឆ្នាំ២០២០ កងកម្លាំងនគរបាលខេត្ត សហការជាមួយក្រុមហ៊ុនឯកជនបានបញ្ចេញអូប័រតូចធំចំនួន១៤គ្រឿង ទៅទទួលយកភ្ញៀវទេសចរជាង១.០០០នាក់ ដែលកំពុងជាប់នៅលើកោះរ៉ុងសន្លឹមអស់រយៈពេល៣ថ្ងៃមកហើយ ដោយសារព្យុះនូល ដែលបានបង្កឱ្យមានភ្លៀងធ្លាក់យ៉ាងគំហុក ធ្វើឱ្យផ្ទៃសមុទ្រពេញដោយរលកបោកបក់យ៉ាងខ្លាំង មិនអាចធ្វើដំណើរឆ្លងកាត់បានឡើយ ។
បើតាមលោកឧត្តមសេនីយ៍ទោ ជួន ណារិន្ទ ស្នងការថា ដោយសាររយៈពេល៣ថ្ងៃកន្លងទៅនេះ កម្ពុជាទទួលរងឥទ្ធិពលព្យុះទី១១ឈ្មោះនូល ជាពិសេសនៅខេត្តព្រះសីហនុតែម្ដង ដូច្នេះហើយទើបអាជ្ញាធរ និងសមត្ថកិច្ចផ្អាកការធ្វើដំណើរតាមផ្លូវទឹកជាបណ្តោះអាសន្ន ដោយរង់ចាំអាកាសធាតុល្អឡើងវិញ ។ នៅព្រឹកថ្ងៃទី២០ ខែកញ្ញា ដោយឃើញធាតុអាកាសស្រឡះល្អ ឯកឧត្តម គួច ចំរើន អភិបាលខេត្ត បានទាក់ទងទៅក្រសួងធនធានទឹកនិងឧតុនិយម ដើម្បីបញ្ជាក់អំពីធាតុអាកាសនេះ ។
ក្រោយពីទទួលបានព័ត៌មានថា ធាតុអាកាសល្អអាចធ្វើដំណើរបាន ឯកឧត្តមអភិបាល ខេត្ត បានបញ្ជាមកកម្លាំងនគរបាល សហការជាមួយក្រុមហ៊ុនឯកជន ដើម្បីបញ្ចេញទូកនិងអូប័រជាង១០គ្រឿង ទៅទទួលភ្ញៀវទេសចរជាង១.០០០នាក់នោះត្រឡប់មកលើដី គោកវិញ ក្រោមការត្រួតពិនិត្យយ៉ាងយកចិត្តទុកដាក់ខ្ពស់បំផុត ។
លោកស្នងការ ជួន ណារិន្ទ បានអះអាងថា នៅពេលអូប័រជាច្រើនគ្រឿងចេញទៅទទួល ភ្ញៀវទេសចរ ក៏មាននគរបាលទេសចរណ៍ និងនគរបាលផ្លូវទឹកអមដំណើរផងដែរ ដើម្បីធានាសុវត្ថិភាព ។
លោកបន្ថែមថា រហូតមកដល់ពេលនេះ ភ្ញៀវទេសចរទាំងជាង១.០០០នាក់ដែលជាប់នៅលើកោះនោះ បានត្រឡប់មកដីគោកដោយសុវត្ថិភាពគ្រប់ៗគ្នាហើយ ៕ផ្តល់សិទ្ធដោយ៖កោះសន្តិភាព
