Sign In 
រាជធានីភ្នំពេញ៖ បុរសម្នាក់បានចូលលួចកាច់កម៉ូតូបានសម្រេច ប៉ុន្តែអត់ដឹងម៉ូតូជាប់សោកង់ ពេលលួចយកទៅបញ្ឆេះប្រុងជិះគេចខ្លួនស្រាប់តែជិះទៅមិនរួច ផ្អើលដល់ម្ចាស់ម៉ូតូតាមទាន់ចាប់ប្រគល់ឲ្យសម្ថកិច្ច។
ហេតុការណ៍ភ្ញាក់ផ្អើលនេះ កើតឡើងកាលពីម៉ោង១១ និង៣០នាទីព្រឹក ថ្ងៃទី២៩ ខែកក្កដា ឆ្នាំ២០២០ នៅមុខផ្ទះពេទ្យធ្មេញ ស្ថិតនៅតាមផ្លូវបេតុងលេខ១៩៦ ក្រុមទី១ ភូមិចំការឪឡឹក១ សង្កាត់កាកាបទី១ ខណ្ឌពោធិ៍សែនជ័យ ។
សេចក្តីរាយការណ៍បន្តថា ជនសង្ស័យខាងលើឈ្មោះ អ៊ុំ ចាន់ធឿន ភេទប្រុស អាយុ២៨ឆ្នាំ មានស្រុកកំណើតនៅក្នុងភូមិត្រពាំងរុន ឃុំតានី ស្រុកអង្គរជ័យ ខេត្តកំពត និងស្នាក់នៅផ្ទះជួលក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ។ បានធ្វើសកម្មភាពលួចម៉ូតូ១គ្រឿងម៉ាក Honda Scoopy ពណ៌ស ពាក់ស្លាកលេខ ភ្នំពេញ 1HH-3045 ដែលជាកម្មសិទ្ធិរបស់បុរសរងគ្រោះឈ្មោះ កង មាស អាយុ៣៣ឆ្នាំ មុខរបរពេទ្យធ្មេញ ស្នាក់នៅក្នុងផ្ទះកើតហេតុខាងលើ ។
បើតាមគ្រូពេទ្យធ្មេញរូបនេះនិយាយថា នៅមុនពេលកើតហេតុ គាត់បានទុកម៉ូតូនៅមុខផ្ទះ ហើយបានចាក់សោរកង់មុខត្រឹមត្រូវដើម្បីការពារខ្លាចចោរលួច ប៉ុន្តែបែរជាភ្លេចដកកូនសោចេញ ។ បន្ទាប់មកគាត់ក៏ចូលទៅធ្វើធ្មេញ និងព្យាបាលធ្មេញជូនអតិថិជនរបស់គាត់នៅក្នុងផ្ទះ។
ក្រោយមកស្រាប់តែជនសង្ស័យបានចូលទៅធ្វើសកម្មភាពលួចម៉ូតូរបស់គាត់ ហើយឡើងជិះកាច់សោរបញ្ឆេះបម្រុងជិះគេចខ្លួន ប៉ុន្តែជិះចេញមិនរួច ព្រោះម៉ូតូជាប់សោរកង់មុខ ពេលនោះគាត់បានឃើញទាន់ក៏ស្រែកឆោរឡោ បង្កឲ្យមានការភ្ញាក់ផ្អើលដល់អ្នកជិតខាង បានជួយដេញតាមចាប់ខ្លួនបានភ្លាមៗ រួចប្រគល់ឲ្យនគរបាលប៉ុស្តិ៍កសកាបទី១ ដើម្បីសាកសួរ និងចាត់ការតាមច្បាប់តែម្តង៕ ត្នោត
