Sign In 
កល្យាណមិត្តជាមិត្តដែលមានសន្តានចិត្តល្អ ហើយតែងជួយមិត្តគ្រប់កាលៈទេសៈពិសេសជួយគ្នាក្នុងគ្រាក្រលំបាក ឬក្នុងពេលមានទុក្ខធំ ។
កល្យាណមិត្តនៅពេលឃើញមិត្តមានទុក្ខធុរៈតែងជួយដោះស្រាយដោយផ្តល់ធនធានខ្លះដើម្បីសម្រាលដល់ជីវភាពគ្រួសារដែលកំពុងដុនដាប ហើយអប់រំមិត្ត បបួលមិត្តឱ្យរៀនស្តាប់ធម៌ដើម្បីបានជាគតិសម្រាប់ដោះស្រាយបញ្ហាជីវិត ឲ្យស្គាល់ពីសេចក្តីពិតនៃជីវិត នឹងបានធូរថយនូវសេចក្តីទុក្ខក្តៅក្រហាយចិត្តបានខ្លះ ។
ការជួយមិត្តសម្លាញ់ក្នុងសភាពបែបនេះជាការជួយដ៏ពិតប្រាកដ ជាការជួយយ៉ាងមាំមួន ធ្វើឲ្យមិត្តភក្តិបានទទួលនូវវត្ថុដ៏ល្អទុកក្នុងបេះដូងតទៅ ។ ដូច្នេះការជួយមិត្តដោយការសង្គ្រោះក្តី ដោយការអប់រំតាមបែបព្រះពុទ្ធសាសនាក្តីជាការងារល្អប្រពៃដែលតែងកើតមានក្នុងសន្តានចិត្តរបស់កល្យាណមិត្តជានិច្ច ។
ការសាងគុណធម៌ឲ្យចម្រើនក្នុងចិត្តរបស់ខ្លួនផង និងជួយឲ្យអ្នកដទៃបាននូវគុណធម៌ប្រចាំចិត្តផង គឺជាប្រយោជន៍ដ៏មានខ្លឹមសារធំធេងណាស់សម្រាប់ជីវិតរស់នៅ ។ ដោយ៖ កោះសន្តិភាព
