Sign In 
លោកមហាសេដ្ឋី ចាក ដរស៊ី (Jack Dorsey) ដែលជានាយកប្រតិបត្តិរបស់ក្រុមហ៊ុន Twitter ដ៏ធំ មានជីវិតដ៏ចម្លែក និងអាជីពដែលឡើងចុះមិនអាចស្មានទុកបានក្នុងវិស័យបច្ចេកវិទ្យាសហរដ្ឋអាមេរិក ។ បន្ទាប់ពីចូលរួមបង្កើតក្រុមហ៊ុនក្នុងឆ្នាំ ២០០៦ លោកត្រូវបានដកចេញពីតំណែងជានាយកប្រតិបត្តិរបស់ក្រុមហ៊ុនក្នុងកំឡុងពេល ២ឆ្នាំក្រោយមក ។
ប៉ុន្តែលោកបានត្រលប់មកកាន់ក្រុមហ៊ុនវិញក្នុងឆ្នាំ ២០១៥ និងបានដឹកនាំក្រុមហ៊ុនឆ្លងកាត់ឧបសគ្គជាច្រើនដែលក្រុមហ៊ុនប្រព័ន្ធសង្គមដូចជា Twitter បានជួបប្រទះ និងព្រមទាំងត្រូវបានកោះហៅដោយសភាជាតិអាមេរិកទៀតផង ។
នៅថ្ងៃទី ១៥ ខែកក្កដាកន្លងមកនេះ Hacker បានហេកចូលគណនីអ្នកប្រើប្រាស់ចំនួន ១៣០ ដែលក្នុងនោះរួមមានគណនីរបស់មហាសេដ្ឋី ជេហ្វ បេសូស (Jeff Bezos) និងប៊ីល ហ្គេតស៍ (Bill Gates) ជាដើម ។ ការហេកនេះបានបង្ហាញពីហានិភ័យធំមួយរបស់ Twitter ដែលបង្កឲ្យតំណាងរាស្ត្រអាមេរិកហោះហៅលោកសាជាថ្មី ។
លោក ដរស៊ី មិនបានបញ្ចប់ការសិក្សានៅសាកលវិទ្យាល័យរបស់លោកទេ ប្រៀបដូចមហាសេដ្ឋីជាច្រើនទៀតក្នុងវិស័យបច្ចេកវិទ្យាដែរ ។ លោកជួបជាមួយសហស្ថាបនិកដទៃទៀតខណៈដែលលោកជាបុគ្គលិករបស់ក្រុមហ៊ុន Odeo ដែលបានប្រកាសក្ស័យធុនក្នុងឆ្នាំ ២០០៦ ។
ពេលដែល Twitter ត្រូវបានដាក់លើទីផ្សារភាគហ៊ុនក្នុងឆ្នាំ ២០១៣ លោកដរស៊ីបានក្លាយជាមហាសេដ្ឋី ។ ក្នុងខែមិនានាឆ្នាំនេះ Forbes បានសន្មត់ថាលោកមានទ្រព្យសម្បត្តិសរុបប្រមាណ ៥.១ប៊ីលានដុល្លារ ។ប៉ុន្តែលោកទទួលបានប្រាក់បៀវត្សន៍តែ ១.៤០ដុល្លារប៉ុណ្ណោះក្នុងមួយឆ្នាំពីតំណែងជានាយកប្រតិបត្តិរបស់ Twitter ។
លោកមានទម្លាប់ទទួលទានអាហារចម្លែកមួយ ។ លោកទទួលទានអាហារតែមួយពេលប៉ុណ្ណោះក្នុងមួយថ្ងៃ ខណៈដែលលោកទទួលទានអាហារច្រើននៅចុងសប្តាហ៍វិញ ។ ទម្លាប់នេះបាននាំឲ្យមានការិះគន់ជាច្រើនដែរ ។
នៅចុងឆ្នាំ ២០១៩ លោកបានប្រាប់ថា លោកនឹងប្តូរទៅរស់នៅអាហ្វ្រិចយ៉ាងតិចណាស់ក៏ ៣ខែដែរសម្រាប់ឆ្នាំ ២០២០ ដោយបាននិយាយថា អាហ្វ្រិកនឹងជះឥទ្ធិពលយ៉ាងខ្លាំងលើថ្ងៃអនាគត ៕ ផ្ដល់សិទ្ធិដោយ៖ កោះសន្តិភាព
