Sign In 
ខេត្តកណ្តាល ៖ ពេលខ្លះមានបាយ គ្មានម្ហូប មានតែអំបិល ហើយ ពេលខ្លះ ហូបបាយជាមួយទឹកក៏មាន ដោយសារ តែរកលុយចិញ្ចឹមជីវិតមិនបានព្រោះតែផលប៉ះពាល់ដោយសារកូវីដ១៩ធ្វើអោយបាត់បង់ការងារ។
នេះជាស្ថានភាពអត់ឃ្លានរបស់គ្រួសារមួយនៅក្នុងភូមិអន្លង់តាសេកលើក ឃុំព្រែកអំបិល ស្រុកស្អាង ខេត្តកណ្តាលដែលធ្លាប់រកចំណូលដោយសារលក់កម្លាំងពលកម្មបានចំណូលមួយថ្ងៃរស់មួយថ្ងៃ។ ប៉ុន្តែកូវីដបានធ្វើអោយគ្រួសារមួយនេះបានធ្លាក់ក្នុងភាពក្រីក្រកាន់តែខ្លាំង។
អ្នកស្រីប៉ៃ ច្រិប ដែលមានសម្បុរខ្មៅ ស្លៀកសំពត់មានផ្ការធំៗ ហាក់មិនសូវមានកម្លាំងក្នុងខ្លួននោះឡើយ ។ គាត់បានរៀបរាប់ពីស្ថានភាពលំបាករបស់គ្រួសារគាត់នៅក្រោមផ្ទះ ដែលប្រកស័ង្កសី តូចមួយខ្នង ធ្វើពី ដើមត្នោត ថា ប្តីប្រពន្ធរបស់គាត់ជាកម្មករដើរលក់កម្លាំងឲ្យគេមិនរើសមុខរបរទេ ។ ពេលខ្លះគេជួល ឲ្យបេះស្វាយ ពេលខ្លះគេជួយឲ្យចាំចម្លារ ជម្រះស្មៅ និងប្រមូលផលដំណាំផ្សេងៗ ទៀតដែល អ្នកស្រុក ដាំដុះ។ បើមានការងារ គាត់ពីរនាក់ប្តីប្រពន្ធអាចរកចំណូលបាន៤ទៅ៥ម៉ឺនរៀល។
ស្ត្រីដែលមានកូនបីនាក់រូបនេះ បានត្អូញត្អែរថា ជាអកុសលចាប់ពីដើមឆ្នាំ២០២០ ជីវភាពគ្រួសារ របស់គាត់ កាន់តែលំបាកខ្លាំង ដោយសារខ្លួនគាត់ធ្លាក់ខ្លួនឈឺដោយបានធ្វើការវះកាត់ពោះវៀន ចំណែកប្តីមិនសូវមានការងារធ្វើទេដោយសារជំងឺកូវីដ១៩។ អ្នកស្រីបានពោលក្នុងសម្តីមួយៗថា តាំងពីដើមខែកុម្ភៈមក អ្នកភូមិជាច្រើនរកចំណូលមិនបានទេ ដូច្នេះការងារខ្លះគេធ្វើខ្លួន គេមិនជួលកម្លាំង ផ្សេងឡើយ ដោយសារពួកគេមិនចង់ឲ្យមានមនុស្សផ្សេង ក្រៅពីសមាជិកគ្រួសារ គេចូលទៅជិត គ្រួសារគេផង និងចងសន្សំថវិកាលើការចំណាយខ្លះដែរ ពីព្រោះគេយល់ថាជំងឺកូវីដ១៩នោះ ធ្វើឲ្យ សេដ្ឋកិច្ចគ្រួសារគេធ្លាក់ចុះដែរ។
អ្នកស្រី ប៉ៃ ច្រិប និយាយបន្តថា «ប្តីខ្ញុំចេញទៅរកការងារធ្វើ ដោយពេលខ្លះធ្វើការមួយ ថ្ងៃអត់ការងារ ធ្វើបីថ្ងៃ។ ប្រាក់រកបាន៣ម៉ឺនរៀល ត្រូវទិញអង្ករផង ទិញម្ហូបផង។ យើងធ្លាប់ហូបមួយ ថ្ងៃអស់អង្ករ ជិត២គីឡូក្រាម មកហូមត្បិតត្បៀតឲ្យតែរស់ប៉ុណ្ណោះ។ ពេលខ្លះ មានម្ហូប ប៉ុន្តែ ច្រើនថ្ងៃ ណាស់ដែលយើងគ្មានម្ហូបឡើយ មានតែអំបិល ឬទឹកប៉ុណ្ណោះ»។
ស្ត្រីវ័យជាង៥០ឆ្នាំរូបនេះ បានបញ្ជាក់ថា «មានច្រើនថ្ងៃដែលយើងបាន យកទឹកធ្វើទឹកសម្ល ធ្វើម្ហូប ហូបជាមួយបាយ»។
គ្រួសារអ្នកស្រី ប៉ៃ ច្រិប ត្រូវបានអាជ្ញាធរផ្តល់ប័ណ្ណសមធម៌ជាគ្រួសារក្រីក្រដើម្បីទទួលបាន ប្រាក់ឧត្ថម្ភពីរ ដ្ឋាភិបាល នៅពេលមានជំងឺកូវីដ១៩នេះ។ គ្រួសារគាត់ត្រូវបានអាជ្ញាធរវាយតម្លៃថាជាអ្នកក្រ ប្រភេទ ក្រ២។ កាលពីពាក់ចុងខែមិថុនានេះ គាត់បានបើកប្រាក់ឧបត្ថម្ភពីរដ្ឋ បានចំនួន១៦ម៉ឺនរៀល។ ថវិការថវិកាដែលទទួលបាននោះអ្នកស្រីហៅថាជាជំនួយបន្ទាន់។
មកដល់ត្រង់នេះ អ្នកស្រី ប៉ៃ ច្រិប ហាក់មានស្នាមញញឺមនៅលើផ្ទៃមុខបន្តិច ហើយ គាត់និយាយថា «យើងពិតជារីករាយជាមួយជំនួយបន្ទាន់នេះ ខ្ញុំមានសម្លម្ជួរ សម្លប្រហើរហូប មានទឹកសម្លសម្រាប់ ហុតប្រសើរជាងហូបទឹកសាប ឆ្ងាយណាស់»។
គ្រួសាររបស់អ្នកស្រី ប៉ៃ ច្រិប ស្ថិតនៅក្នុងចំណោមអ្នកក្រីក្រជាងច្រើនទៀតកំពុង ប្រឈមមុខ ខ្លាំងនឹងស្ថានភាពកាន់តែយ៉ាប់យ៉ឺនដោយសារតែកូវីដ១៩ដែលពេលនេះកម្ពុជាបានរកឃើញចំនួនជាង២២០ករណី ខណះដែលជំងឺដ៏សាហាវនេះបានឆ្លងដល់មនុស្សជិត១៦លាននាក់ និងសម្លាប់មនុស្ស ជាង៦៤ម៉ឺននាក់នៅក្នុងទូទាំងពិភពលោកគិតត្រឹមថ្ងៃទី២៥ខែកក្កដា ព្រមទាំងរុញច្រាន សេដ្ឋកិច្ចពិភព លោកអោយធ្លាក់ក្នុងវិបត្តិ។
ជំងឺកូវីដ១៩ ដែលកើតជាសកល បានប៉ះពាល់សេដ្ឋកិច្ចជាតិនិងជីវភាពប្រចាំថ្ងៃរបស់ ពលរដ្ឋ កម្ពុជាយ៉ាងធ្ងន់ធ្ងរ ដោយធ្វើអោយប៉ះពាល់ដល់វិស័យសំខាន់ៗដែលជាជន្ទល់ សេដ្ឋកិច្ចជាតិដូច ជាវិស័យទេសចរណ៍និងវិស័យកាត់ដេរជាដើម។ ពលរដ្ឋដែលក្រីក្រ រកមួយថ្ងៃសម្រាប់ហូបមួយថ្ងៃ ហាក់ទទួលរងផលប៉ះពាល់ធ្ងន់ ជាងពលរដ្ឋផ្សេងទៀត។
ខណះដែលពលរដ្ឋកម្ពុជាជាច្រើនបានធ្លាក់ក្នុងស្ថានភាពក្រីក្រនិងអត់ឃ្លាននោះ រដ្ឋាភិបាល ក៏ចាត់ វិធានការនានាដើម្បីធានាថានឹងមិនមានអ្នកដាច់ពោះស្លាប់ដោយសារអត់បាយឡើយ។ នេះជាឆន្ទ្ះមោះមុតប្រកាសដោយសម្តេចតេជោហ៊ុនសែននាយករដ្ឋមន្ត្រីកម្ពុជា។
រដ្ឋាភិបាលកម្ពុជាបានរកឃើញថាពលរដ្ឋប្រមាណជា៦១ម៉ឺនគ្រួសារនៅទូទៅប្រទេស ជាពលរដ្ឋក្រី ក្រងាយរងគ្រោះពីជំងឺកូវីដ១៩ បន្ទាប់ពីសម្តេចតេជោហ៊ុន សែន បានប្រកាស កាលពីថ្ងៃទី២១ ខែកក្កតាថាបានរកឃើញគ្រួសារក្រីក្រថ្មីទៀតចំនួនប្រាំម៉ឺន គ្រួសារ។
ពលរដ្ឋទាំងនោះត្រូវបានផ្តល់ប័ណ្ណសមធម៌ឲ្យដើម្បីទទួលបានជំនួយ។ រដ្ឋាភិបាលបានបែងចែក ប្រភេទក្រីក្ររបស់ពលរដ្ឋជាពីរ គឺក្រ១និងក្រ២។
សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី២៤មិថុនាបានប្រកាសជាផ្លូវការពីកម្មវិធី ឧបត្ថម្ភសាច់ ប្រាក់ ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ រដ្ឋបានបញ្ចេញ សាច់ប្រាក់ប្រមាណ២៥លានដុល្លារ សម្រាប់ការឧបត្ថម្ភដល់ពលរដ្ឋក្រីក្រ ដែលមានប្រមាណ ៥៦ម៉ឺនគ្រួសារនោះ នៅក្នុងដំណាក់កាលទី១។
ដំណាក់កាលទី២ និងបន្តបន្ទាប់ ត្រូវបានអនុវត្តរហូតដល់ជំងឺកូវីដ១៩ បានធូរស្រាលហើយស្ថាន ការណ៍នឹងវិលទៅសភាពដើមនោះ។ សម្តេចនាយករដ្ឋមន្ត្រីបានបញ្ជាក់ថា “រដ្ឋាភិបាលនឹងមិនទុក ចោលពលរដ្ឋណាម្នាក់ស្លាប់ដោយមិនបានដឹងនិងមិនបានដោះស្រាយនោះឡើយ”។
ក្នុងអនុក្រឹត្យស្តីពីការផ្តល់ប្រាក់ឧបត្ថម្ភដល់ពលរដ្ឋក្រីក្របានបញ្ជាក់ពី ចំនួនទឹកប្រាក់ត្រូវផ្តល់ ជូនក្នុងមួយខែចន្លោះពី ១៦ ០០០រៀល ទៅដល់ ១២០ ០០០រៀល សម្រាប់ពលរដ្ឋក្រីក្រមួយគ្រួសារ។ ប៉ុន្តែចំនួនទឹកប្រាក់នេះ ត្រូវបូកបញ្ចូលចំនួនសមាជិកគ្រួសារទៀត។
គ្រួសារដែលមានចំនួនកុមារអាយុក្រោម៥ឆ្នាំនិងអ្នកផ្ទុកជំងឺអេដស៍នឹងទទួលបានប្រាក់ឧត្ថម្ភកាន់ច្រើន។
មន្ត្រីបានឲ្យដឹងថាជាជាទូទៅគ្រួសារពលរដ្ឋក្រីក្រអាចទទួលបានប្រាក់ពី១០០ដុល្លារឡើងទៅ។
លោកឆាយ ថន រដ្ឋមន្ត្រីផែនការ ក្រសួងដែលមានភារកិច្ចចុះធ្វើសម្ភាសពលរដ្ឋក្រីក្របានឲ្យដឹង ថា ពលរដ្ឋជាច្រើនបានចេញទៅបើកប្រាក់ឧបត្ថម្ភដោយក្តីរីការាយ។
លោករដ្ឋមន្ត្រី បានឲ្យដឹងថានៅពេលការឧបត្ថម្ភថវិកាដំណាក់កាលទី១ បញ្ចប់ ការផ្តល់ថវិកាជុំ ទី២ នឹងបន្ត។ ដំណាក់កាលទី២ផ្តើមចាប់ពីថ្ងៃ២៥ក្កដានេះទៅ។
រដ្ឋមន្ត្រីក្រសួងផែនការ បានអំពាវនាវឲ្យពលរដ្ឋដែលគិតថាក្រីក្រទៅដាក់ពាក្យស្នើសុំសម្ភាសន៍ នៅតាមឃុំសង្កាត់ ដែលខ្លួនរស់នៅជាអចិន្ត្រៃយ៍ ដើម្បីឲ្យមន្ត្រីសម្ភាសវាយតម្លៃ ក្នុងការផ្តល់ ប័ណ្ណសមធម៌។
អ្នកស្រី ប៉ៃ ច្រិប ពលរដ្ឋក្រីក្រ ដែលទទួលបានប្រាកឧបត្ថម្ភជុំទី១ នៅតែមានសង្ឃឹមថា គាត់នឹងទទួលបានការឧបត្ថម្ភពីរដ្ឋនៅជុំទី២ទៀត ត្បិតអីជំងឺកូវីដ១៩ នៅតែបន្តជះឥទ្ធិពល ដលការលក់កម្លាំងពលកម្មប្តីរបស់គាត់។ អ្នកស្រីបញ្ជាក់ថា ថវិកាទាំង១៦ម៉ឺនរៀល ដែលបានក្រៅពីអ្នកស្រីបានយកទៅទ្រទ្រង់ការរស់នៅប្រចាំថ្ងៃ អ្នកស្រីមានបន្ទុកផ្គត់ផ្គង់ថែទាំ ចៅតូចៗ របស់ខ្លួន ដោយសារឪពុកម្តាយរបស់គេ កំពុងស្ថិតនៅក្នុងស្ថានភាពក្រីក្រនោះដែរ។
អ្នកស្រី និយាយថា មុនពេលទទូលជំនួយ អ្នកស្រីភ័យខ្លាចភាពអត់ឃ្លាន ជាងការភ័យ ខ្លាចស្លាប់ដោយកូវីដ១៩។ ប៉ុន្តែពេលនេះរដ្ឋាភិបាលបានចេញមុខជួយ ដូច្នេះខ្ញុំមិនភ័យខ្លាចស្លាប់ ដោយសារការអត់ឃ្លានទៀតទេ ៕ ផ្តល់សិទ្ធិដោយ៖ កោះសន្តិភាព
