Sign In 
រាជធានីភ្នំពេញ ៖ កន្លែងម៉ាស្សា ហាត់ប្រាណ ស្ទីម សូណា មួយចំនួននៅរាជធានីភ្នំពេញ បានបង្ខំចិត្តបើកអាជីវកម្មរបស់ខ្លួននៅពេលនេះ បើទោះបីជាមិនទាន់មានការអនុញ្ញាតជាផ្លូវការពីសមត្ថកិច្ច ហើយវិធានការបង្ការ និងទប់ស្កាត់ការឆ្លងជំងឺកូវីដ១៩ នៅមានជាធរមាននៅឡើយនោះ ។
ម្ចាស់អាជីវកម្មម៉ាស្សាមួយកន្លែង ដែលបានបើកទ្វារឡើងវិញ សេវាកម្មម៉ាស្សា ស្ទីម សូណា នៅប៉ុន្មានថ្ងៃមុននេះបានឲ្យដឹងថា គាត់បានជួលផ្ទះគេធ្វើអាជីវកម្មនេះ ។ ដូច្នេះការបិទទ្វារមិនរកស៊ីច្រើនខែជាការខាតបង់ធំមួយ ។ លោកថា តម្លៃផ្ទះគាត់ជួលគេមួយខែៗតម្លៃជាង១០០០ដុល្លារ ដូច្នេះមិនអាចបិទទ្វារបន្តទៀតទេ ។ « រាល់ថ្ងៃនេះ ខ្ញុំចំណាយប្រហែល១៥០០ដុល្លារទាំងថ្លៃជួលផ្ទះ និងបុគ្គលិកចាំកន្លែង ។ បើខ្ញុំនៅបន្តបិទទ្វារទៀត រត់មិនរួចឡើយ លក់ផ្ទះសងគេហើយ ដូច្នេះត្រូវបង្ខំចិត្តបើកហើយ ។ ខ្ញុំឃើញមានកន្លែងច្រើនដែរ ដែលគេបើកទ្វារ ។ខ្ញុំសង្ឃឹមថា អាជ្ញាធរនឹងយល់ពីផលលំបាករបស់ពួកខ្ញុំ» ។ នេះជាសម្តីរបស់ម្ចាស់អាជីវកម្មម៉ាស្សាមួយកន្លែងនៅខណ្ឌសែនសុខ ដែលសុំមិនបញ្ចេញឈ្មោះ ។
ទោះជាបើកទ្វារនៅក្នុងខណៈដែលអាជ្ញាធរមិនទាន់អនុញ្ញាតក្តី តែម្ចាស់ហាងម៉ាស្សាមួយនោះថា គាត់បានបញ្ជាឲ្យបុគ្គលិករបស់លោកទាំងអស់អនុវត្តវិធានការរបស់ក្រសួងសុខាភិបាលឲ្យបានខ្ជាប់ខ្ជួន ដូចជា ត្រូវវាស់កម្តៅភ្ញៀវដែលមកម៉ាស្សា បើកម្តៅលើស៣៨អង្សាសេមិនអនុញ្ញាតឲ្យចូលឡើយ ។ ជាពិសេស គឺសម្ភារៈប្រើប្រាស់ដូចជា កន្សែង ជួតខ្លួនជាដើមនោះ ត្រូវសម្អាត ភ្លាមៗក្រោយពេលភ្ញៀវប្រើរួច ។
អាជីវកម្មម៉ាស្សាសុខភាព ស្ប៉ា ត្រូវបានលោកថោង ខុង រដ្ឋមន្ត្រីក្រសួងទេសចរណ៍ បានចេញលិខិតបិទជាបណ្តោះអាសន្ន កាលពីថ្ងៃទី០៧ ខែមេសា ឆ្នាំ២០២០ដើម្បីទប់ស្កាត់ការរីករាលនៃជំងឺកូវីដ-១៩ ។ ក្រៅពីអាជីវកម្មនេះ សេវាកម្មផ្សេងទៀត ដូចជារោងភាពយន្ត ក្លិបខារ៉ាអូខេ និងសេវាកម្មកម្សាន្តផ្សេងៗក៏បានបិទទ្វារដែរ ទើបតែនៅថ្ងៃទី៧ ខែកក្កដា ឆ្នាំ២០២០មុននេះ ដែលអាជ្ញាធរបានប្រកាសអនុញ្ញាតឱ្យម្ចាស់ក្លិបកម្សាន្ត និងខារ៉ាអូខេ (KTV) បើកដំណើរការឡើងវិញបាន ដោយប្រែក្លាយជាភោជនីយដ្ឋាន និងត្រូវអនុវត្តវិធានការការពារការរីករាលដាលជំងឺកូវីដ-១៩។
ប៉ុន្តែក្រោយមានភ្លើងខៀវពីអាជ្ញាធរអនុញ្ញាតឲ្យក្លិបកម្សាន្ត និងខារ៉ាអូខេ (KTV) បើកដំណើរការឡើងវិញបាន ដោយប្រែក្លាយជាភោជនីយដ្ឋាននោះ មានហាងខារ៉ាអូខេ ជាច្រើនបានបើកសេវាខារ៉ាអូខេ ដោយផ្ទាល់តែម្តង ធ្វើឲ្យអាជ្ញាធរដុតដៃដុតជើងចុះបង្ក្រាប បិទទ្វារវិញទាំងយប់ ហើយថែមទាំងបានព្រមានថា នឹងបិទអាជីវកម្ម ខារ៉ាអូខេនេះវិញ ដើម្បីសុវត្ថិភាពសាធារណៈ ពីព្រោះអីជំងឺកូវីដ១៩ នៅតែជាបញ្ហាប្រឈមខ្លាំងនៅឡើយ ។
នៅក្នុងកាលៈទេសៈដ៏លំបាកនេះ រវាងវិធានការបង្ការជំងឺកូវីដ១៩ ដែលបានធ្វើឲ្យអាជីវកម្មខ្លះប្រឈមនឹងផលប៉ះពាល់សេដ្ឋកិច្ចខ្លាំង នោះមានតែពលរដ្ឋម្នាក់ៗ ត្រូវយល់ដឹងខ្លួនឯងថា សកម្មភាព កន្លែងណា ដែលធ្វើឲ្យខ្លួនអាចឆ្លងជំងឺកូវីដ១៩នោះ ។
ក្រសួងសុខាភិបាលនៅតែទទួចឲ្យពលរដ្ឋប្រកាន់វិធានការការពារឲ្យបានខ្ជាប់ខ្ជួន ថាប្រសិនពលរដ្ឋធ្វេសប្រហែស ភ្លេចកូវីដ១៩ នោះនឹងមានហានិភ័យខ្ពស់ ហើយរលកទី២នឹងអាចកើតមាន។
លោកម៉ម ប៊ុនហេង រដ្ឋមន្ត្រីក្រសួងសុខាភិបាល ធ្លាប់លើកជាឧទាហរណ៍ថា បើដឹងថាមានភោនីយដ្ឋានមួយគ្មានអនាម័យ ហើយមនុស្សនៅតែនាំគ្នាទៅទទួលទានអាហារនៅទីនោះទៀត គឺស្មើនឹងនាំគ្នាទៅទទួលទានអាហារ ដែលធ្វើឲ្យស្លាប់ខ្លួននាំជំងឺចូលខ្លួន មិនមែនទៅទទួលទានដើម្បីឆ្ងាញ់និ ងសុខភាពនោះឡើយ ។ លោកបានសំណូមពរថា «បើយើងដឹងថា មានកន្លែងណាមិនស្អាត មិនមានសុវត្ថិភាព សូមពលរដ្ឋកុំនាំគ្នាទៅអី» ៕ ផ្តល់សិទ្ធិដោយ៖ កោះសន្តិភាព
