Sign In 
កម្ពុជាពង្រឹងប្រព័ន្ធស្វ័យប្រវត្តិកម្មនៃការផ្តល់លិខិតអនុញ្ញាតឱ្យនាវាចូលតាមកំពង់ផែ
រាជធានីភ្នំពេញ ៖ ដើម្បីធានាបាននូវតម្លាភាព ប្រសិទ្ធភាព ចំណេញពេលវេលា ផ្ដល់ភាពជឿទុកចិត្តដល់អ្នកផ្ដល់ និងអ្នកប្រើប្រាស់សេវា គ្រប់ទីកន្លែង គ្រប់ពេលវេលា ព្រមទាំងកាត់បន្ថយនីតិវិធីស្មុគស្មាញដែលធ្វើឱ្យយឺតយ៉ាវក្នុងការផ្តល់លិខិតអនុញ្ញាតឱ្យនាវាចូលកំពង់ផែនោះ ក្រសួងសាធារណការ និងដឹកជញ្ជូនបានសម្រេចដាក់ដំណើរការ ប្រព័ន្ធស្វ័យប្រវត្តិកម្មនៃការផ្តល់លិខិត អនុញ្ញាតឱ្យនាវាចូលតាមកំពង់ផែនៃព្រះរាជាណាចក្រកម្ពុជា ។
ព្រមជាមួយគ្នានោះផងដែរ ក្រសួងក៏បានរៀបចំការប្រជុំកាលពីថ្ងៃទី ២០ ខែកក្កដា ឆ្នាំ២០២០ នៅទីស្ដីការក្រសួង ដើម្បីផ្សព្វផ្សាយអំពីដំណើរការប្រព័ន្ធស្វ័យប្រវត្តិកម្មផ្តល់លិខិត អនុញ្ញាតឱ្យនាវាចូលតាមកំពង់ផែនៃព្រះរាជាណាចក្រកម្ពុជា ដល់គ្រប់ភាគីពាក់ព័ន្ធដែលទទួលបន្ទុកផ្តល់លិខិតអនុញ្ញាតធ្វើនាវាចរណ៍ចូលតាមកំពង់ផែដូចជា ៖ ប្រតិបត្តិការ និងនីតិវិធីបំពេញទម្រង់ បែបបទចូលចតនាវា ក៏ដូចជានីតិវិធីនៃការទូទាត់ថ្លៃសេវា តាមប្រព័ន្ធអនឡាញ ជាមួយធនាគារឯកទេសវីង ដើម្បីធានាបាននូវតម្លាភាព ប្រសិទ្ធភាព ចំណេញពេលវេលា ផ្ដល់ភាពជឿទុកចិត្តដល់អ្នកផ្ដល់ និង អ្នកប្រើប្រាស់សេវា គ្រប់ទីកន្លែង គ្រប់ពេលវេលា ព្រមទាំងកាត់បន្ថយនីតិវិធីស្មុគស្មាញដែលធ្វើឱ្យយឺតយ៉ាវក្នុងការផ្តល់លិខិតអនុញ្ញាតឱ្យនាវាចូល ជាពិសេសសម្រួលដល់អតិថិជនដែលជាភ្នាក់ងារនាវា ក្នុងការបង់កម្រៃសេវាស្នើសុំលិខិតអនុញ្ញាតឱ្យនាវាចូល និងងាយស្រួលក្នុងគ្រប់គ្រងការចូលរបស់នាវា ដែលធ្វើនាវាចរណ៍ រក្សាសន្តិសុខ សុវត្ថិភាព ចូលរួមចំណែកការពារបរិស្ថាន។
លោក រស់ វណ្ណា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ថា បច្ចេកវិទ្យាព័ត៌មានវិទ្យាដើរ តួយ៉ាងសំខាន់ក្នុងការធ្វើទំនើបកម្មការផ្ដល់សេវាសាធារណៈ ការកសាងទីក្រុងឆ្លាតវៃ (Smart City) ការលើកកម្ពស់និងប្ដូរទម្រង់ក្នុងការបំពេញការងារជាដើម។
លោករដ្ឋលេខាធិការបានបន្ថែមទៀតថា «ការរៀបចំប្រព័ន្ធបច្ចេកវិទ្យាសម្រាប់ធ្វើការដាក់ពាក្យ និងទូទាត់ប្រាក់ថ្លៃសេវា តាមប្រព័ន្ធអនឡាញនេះជាជោគជ័យថ្មីមួយទៀតរបស់ក្រសួងសាធារណការ និងដឹកជញ្ជូន ក៏ដូចជារាជរដ្ឋាភិបាលក្នុងកម្មវិធីគោលនយោបាយកែទម្រង់ស៊ីជម្រៅរបស់ខ្លួន ក្នុងការបង្ខិតសេវាសាធារណៈទៅកៀកប្រជាពលរដ្ឋ» ។
លោក រដ្ឋលេខាធិការបានឱ្យដឹងថា ភ្នាក់ងារនាវាចរណ៍ត្រូវពិនិត្យឯកសារឱ្យបានម៉ត់ចត់ និងគ្រប់ជ្រុងជ្រោយ ជាពិសេសត្រូវធានាថាតើមានឯកសារគ្រប់គ្រាន់ និងបានចុះបញ្ជីជាមុនហើយ ឬនៅមុននឹងផ្តល់ លិខិតអនុញ្ញាតឱ្យនាវាចូលទៅតាមបណ្តាកំពង់ផែ ដើម្បីជៀសវាងបញ្ហានៅពេលក្រាយ ៕ដោយ៖ កោះសន្តិភាព
