Sign In 
ការរក្សាទំនាក់ទំនងល្អជាមួយចៅហ្វាយជាចំណុចសំខាន់មួយសម្រាប់បុគ្គលិកគ្រប់វិស័យទាំងអស់ ប៉ុន្តែមានរឿងខ្លះមិនគួរលឺទៅដល់់ចៅហ្វាយរបស់អ្នកទេ ព្រោះវាអាចប៉ះពាល់ដល់ឱកាសការងាររបស់អ្នកនៅថ្ងៃមុខបាន។ ខាងក្រោមគឺជារឿងដែលអ្នកត្រូវជៀសវាងនិយាយជាមួយចៅហ្វាយរបស់អ្នកដាច់ខាត៖
១. អាជីវកម្មផ្ទាល់ខ្លួនរបស់អ្នក
ប្រសិនបើអ្នកមានអាជីវកម្មដែលរកប្រាក់ចំណូលឲ្យអ្នកបាននឹងនរពីមួយខែទៅមួយខែនោះ អ្នកគួរតែជៀសវាងនិយាយពីរឿងនេះប្រាប់ចៅហ្វាយរបស់អ្នក។ មូលហេតុគឺមកពីវាអាចធ្វើឲ្យចៅហ្វាយរបស់អ្នកគិតថាអ្នកមិនផ្តល់តម្លៃលើការងាររបស់អ្នកខ្លាំងព្រោះអ្នកមានប្រភពចំណូលមួយទៀតដែលនឹងនរដែរ។
២. ការនឿយហត់ព្រោះតែការរៀនសូត្រ
វាមិនមែនជាបញ្ហាទេក្នុងការដើរចូលការិយាល័យដោយទឹកមុខនឿយហត់ព្រោះតែមិនបានចូលដំណេកបានគ្រប់គ្រាន់។ ប៉ុន្តែអ្នកត្រូវតែជៀសវាងការរអ៊ូរទាំដាក់ចៅហ្វាយរបស់អ្នកទាក់ទិននឹងការដែលនៅដល់យប់ជ្រៅ ឬនៅរៀនដើម្បីត្រៀមប្រឡង។ វាអាចបង្ហាញថាអ្នកមិនចេះគ្រប់គ្រងពេលវេលាបានល្អ ឬអ្នកកំពុងតែរៀនការងារថ្មី។
៣. មូលហេតុដែលអ្នកចាកចេញពីការងារមុន
ប្រសិនបើអ្នកមានមូលហេតុសមហេតុសមផលពេលដែលចាកចេញពីការងារចាស់ ដូចជាការប្តូរលំនៅដ្ឋាន ការចង់ដកបទពិសោធន៍ថ្មីៗ ឬការទទួលបានសំណើរល្អពីក្រុមហ៊ុនឬស្ថាប័នមួយទៀតនោះ វាមិនជាបញ្ហាក្នុងការចែករំលែកទេ។ ប៉ុន្តែប្រសិនបើអ្នកមានមូលហេតុផ្សេង ដូចជាការឈ្លោះប្រកែកគ្នាជាមួយចៅហ្វាយ ឬមិត្តរួមការងារនៅកន្លែងចាស់នោះ អ្នកគួរតែជៀសវាងការចែករំលែកច្រើនពេក។
ទោះជាការកុហកច្រើនពេកអាចនឹងប៉ះពាល់ដល់ទំនាក់ទំនងរវាងអ្នកនិងចៅហ្វាយរបស់អ្នកពិតមែនក្តី អ្នកក៏មិនគួរស្មោះត្រង់ពេកដូចមិត្តភក្តិនឹងគ្នាដែរ ៕ ផ្តល់សិទ្ធដោយ៖កោះសន្តិភាព
