Sign In 
ខេត្តប៉ៃលិន៖ ប្រជាពលរដ្ឋក្រីក្រ ដែលជួបវិបត្តិកូវីដ១៩ នៅខេត្តប៉ៃលិនប្រមាណជាង៣ពាន់គ្រួសារ បានទទួលការឧបត្ថម ពីក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន សាខាកាកបាទក្រហមកម្ពុជាខេត្ត និងសហភាពសហព័ន្ធយុវជនកម្ពុជាខេត្តប៉ៃលិន ក្នុងពេលថ្មីៗនេះ ស្ថិតនៅក្នុងសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
លោក អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន បានបន្តអំពាវនាវដល់ក្រុមគ្រួសារប្រជាពលរដ្ឋទាំងអស់ ប្រុងប្រយ័ត្នពីការឆ្លងជំងឺកូវីដ១៩ ដោយត្រូវបង្កើនអនាម័យសុខភាពរស់នៅឱ្យបានល្អ កុំធ្វេសប្រហែស ត្រូវពាក់ម៉ាស ឬក្រម៉ា ហើយត្រូវដុសលាងសម្អាតដៃឱ្យបានស្អាតជាប្រចាំជាមួយសាប៊ូ ទឹកអាល់កុល ឬជែលកម្ចាត់មេរោគ និងបាក់តេរីផ្សេងៗ ។
បើមានការសង្ស័យទៅលើអ្នកណាម្នាក់ ឬចំពោះខ្លួនឯងផ្ទាល់ សូមប្រញ៉ាប់ទូរស័ព្ទមកលេខ១១៥ ឬមកកាន់មណ្ឌលសុខភាព មន្ទីរពេទ្យបង្អែកដែលនៅជិតបំផុត ឬរាយការណ៍មកអាជ្ញាធរភូមិ ឃុំ ដើម្បីបញ្ជូនទៅពិនិត្យ និងព្យាបាលជំងឺ ។ សូមកុំចម្លងរោគពីយើងទៅគេ ហើយក៏កុំចម្លងរោគគេមកក្រុមគ្រួសារយើង កន្លែងណាដែលមិនចាំបាច់ទៅ សូមកុំទៅ ជាពិសេសកន្លែងដែលមានការប្រមូលផ្តុំមនុស្សច្រើន និងសូមស្តាប់អនុវត្តតាមការណែនាំរបស់ក្រសួងសុខាភិបាលឱ្យបានជាប់ជានិច្ច ។
សូមបញ្ជាក់ថា កាលពីព្រឹកថ្ងៃទី១៩ ខែកក្កដា ឆ្នាំ២០២០ ក្រុមការងារចុះចែកអំណោយនៅភូមិប៉ាងរលឹម ភូមិអូរខ្ទីង ភូមិក្រចាប់លើ ភូមិភ្នំរាំង ភូមិក្រចាប់ ភូមិស្លេវ ភូមិភ្នំដំបង រីឯនៅរសៀលថ្ងៃដដែលក្រុមការងារចុះចែកអំណោយជូនប្រជាពលរដ្ឋ នៅភូមិព្រៃមង្គល ភូមិសួស្តី ភូមិអូរប្រើស ភូមិដីក្រហម ភូមិកូនភ្នំ ភូមិខ្លុង ភូមិអូរតាវ៉ៅ និងភូមិក្បាលព្រលាន៕ ត្នោត
