Sign In 
សម្តេច ស ខេង ជម្រុញឱ្យបញ្ចប់សេចក្តីព្រាងច្បាប់ ស្តីពីការប្រឆាំងការរីកសាយភាយ ហិរញ្ញប្បទានអាវុធមហាប្រល័យ
សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានចូលរួមពិនិត្យសេចក្តីព្រាងអនុក្រឹត្យចំនួន៣ នៃច្បាប់ស្តីពីការប្រឆាំងការរីកសាយភាយ ហិរញ្ញប្បទានអាវុធមហាប្រល័យ នៅទីស្តីក្រសួងមហាផ្ទៃ ដើម្បីពិភាក្សាលើកចុងក្រោយ លើមាត្រាសំខាន់ៗមួយចំនួនដូចជា៖ មាត្រា៩ មាត្រា១៥ និងមាត្រា១៨។
ពាក់ព័ន្ធរឿងនេះ កាលពីថ្ងៃទី ១៤ កញ្ញា ឆ្នាំ២០២០ សម្តេច ស ខេង បានដឹកនាំកិច្ចប្រជុំអន្ដរក្រសួង ស្តីពីច្បាប់ប្រឆាំងការរីកសាយភាយ ហិរញ្ញប្បទានអាវុធមហាប្រល័យ និងអ្នកជំនាញពាក់ព័ន្ធនិងផ្នែកច្បាប់ជាច្រើនទៀតផងដែរ។
សម្ដេចក្រឡាហោម ស ខេង បានឱ្យដឹងថា កិច្ចប្រជុំពេលនេះ គឺយោងតាមសំណើររបស់ក្រសួងយុត្តិធម៌ ដែលស្នើឱ្យមានកិច្ចប្រជុំអន្តរក្រសួង ដើម្បីពិនិត្យទៅលើសេចក្តីព្រាងអនុក្រឹត្យចំនួន៣ រួមមាន៖ អនុក្រឹត្យស្តីពី ការប្រើប្រាស់ និងការចាត់ចែងទ្រព្យសម្បត្តិ បង្កកនៃហិរញ្ញប្បទានដល់ការរីកសាយភាយ អាវុធមហាប្រល័យ អនុក្រឹត្យស្តីពីការរៀបចំ និងការប្រព្រឹត្តទៅនៃគណៈកម្មធិការសម្របសម្រួលថ្នាក់ ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធ មហាប្រល័យ និងអនុក្រឹត្យស្តីពីបែបបទ និតិវិធីនៃការអនុវត្តច្បាប់ស្តីពីការប្រឆាំងហរិញ្ញប្បទានដល់ ការរីកសាយភាយអាវុធមហាប្រល័យ។
សម្តេចមានប្រសាសន៍ថា “ក្រុមការងារអន្តរក្រសួងបានប្រជុំពិភាក្សាចំនួន១២លើក រួចមកហើយ ជាលទ្ធផលក្រុមការងារ បានបញ្ចប់សេចក្តីព្រាងអនុក្រឹត្យទាំង៣ កាលពីថ្ងៃ២៦ ខែសីហា ឆ្នាំ២០២០ ដូច្នេះ ការប្រជុំនាថ្ងៃនេះ ក្នុងន័យដើម្បីពិនិត្យចុងក្រោយ”។
សូមជម្រាបថា ច្បាប់នេះមានគោលបំណងធានាការប្រឆាំងហិរញ្ញប្បទាន ដល់ការរីកសាយភាយអាវុធមហាប្រល័យ ព្រមទាំងមានគោលដៅកំណត់វិធានការបង្ការ ទប់ស្កាត់ បង្រ្កាប និងលុបបំបាត់ហិរញ្ញប្បទានដល់ ការរីកសាយភាយអាវុធមហាប្រល័យ។ លើសពីនេះទៀត ច្បាប់នេះមានវិសាលភាព អនុវត្តចំពោះរាល់សកម្មភាពហិរញ្ញប្បទានដល់ការរីកសាយភាយអាវុធមហាប្រល័យ នៅក្នុងព្រះរាជាណាចក្រកម្ពុជា៕ ដោយ៖ ឃួន លក្ខិណា
