Sign In 
រាជធានីធានីភ្នំពេញ ៖ ព្រឹទ្ធាចារ្យ ព្រីង សាឃន ជាព្រឹទ្ធាចារ្យសិល្បៈដែលពោរពេញទៅដោយទេពកោសល្យ ភាពយន្ត របាំ ល្ខោន យីកេ និងស្នាដៃជាច្រើនទៀត បានទទួលមរណភាពហើយ កាលពីថ្ងៃទី១៩ ខែកក្កដា ឆ្នាំ២០២០ ដោយសារជំងឺ និងជរាពាធ ខណៈពេលដែលលោកបានតស៊ូជម្នះជំងឺអស់ជាច្រើនឆ្នាំ ហើយបច្ចុប្បន្នសពព្រឹទ្ធាចារ្យ ព្រីង សាឃន ត្រូវបានតំកល់ធ្វើបុណ្យនៅវត្ត រឺស្សីស្រស់ ស្ថិតក្នុងសង្កាត់និរោធ ខណ្ឌច្បា
រអំពៅ រាជធានីភ្នំពេញ។
ដំណឹងពីមរណភាពរបស់លោកព្រឹទ្ធាចារ្យព្រីង សាឃន ជាការសោកស្តាយជាទីបំផុតសម្រាប់ប្រជាពលរដ្ឋខ្មែរ ក្នុងពេលដែលលោកបានចំណាយពេលស្ទើរពេញមួយជីវិត បម្រើវិស័យសិល្បៈវប្បធម៌ខ្មែរ និងបានចូលរួមលើកស្ទួយ និងថែរក្សាកេរតំណែលមរតកវប្បធម៌ខ្មែរផងដែរ។
គួររំលឹកថា ព្រឹទ្ធាចារ្យសិល្បៈ ព្រីង សាឃន កើតនៅចន្លោះឆ្នាំ១៩៣៦ និង១៩៣៧ នៅភូមិព្រែកដំបូក ស្រុកស្រីសន្ធរ ខេត្តកំពង់ចាម ។ នៅឆ្នាំ១៩៥៣ លោកបានចូលរៀនផ្នែកល្ខោននិយាយនៅអតីតសាលាល្ខោនជាតិ ដែលក្រោយមកប្ដូរឈ្មោះមកជាសាកលវិទ្យាល័យភូមិន្ទវិចិត្រសិល្បៈ ។ បន្ទាប់ពីរៀនចប់ហើយ លោកបានសម្ដែងនៅលើឆាកជាច្រើនរឿង តែក្នុងតំណែងជាតួរាយរងប៉ុណ្ណោះ ។
ក្រោយរបបខ្មែរក្រហមលោកបានត្រឡប់មកភ្នំពេញវិញ ដោយប្រកបអាជីពជាអ្នកសម្ដែងជាតួរាយរងដដែល ។ តួអង្គដែលតែងតែធ្វើឲ្យទស្សនិកជនស្គាល់លោកច្បាស់បំផុតនោះ គឺការសម្ដែងជា «តាជូជក» ក្នុងរឿងព្រះវេស្សន្ដរ នៅឆ្នាំ ១៩៩៣ ។ 
នៅថ្ងៃ ០៩ មករា ២០១៣ លោកបានទទួលងារជានាដកោសល្យវដ្តី យោងតាមព្រះរាជក្រឹត្យ ស្ដីពីប្រព័ន្ធមត៌កមនុស្សរស់ នៃព្រះរាជាណាចក្រកម្ពុជា ដើម្បីឆ្លើយតបនឹងការលះបង់ និងការពុះពារឥតខ្លាចនឿយហត់ ក្នុងការធ្វើពលិកម្មជាច្រើនបម្រើឲ្យវិស័យសិល្បៈខ្មែរ និងដោយផ្អែកលើតម្លៃគុណសម្បត្តិ ដូចជា ចំណេះដឹង ជំនាញ ទេពកោសល្យ និងបច្ចេកទេស ស្នាដៃឯក ផ្នែកបេតិកភណ្ឌវប្បធម៌អរូបី៕ ដោយ៖ ត្នោត
