Sign In 
ខេត្តសៀមរាប ៖ លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែងបានឱ្យដឹងថា រថយន្តតាក់សុីមួយគ្រឿងម៉ាក SIENNAបានបុកគ្នាជាមួយរថយន្តឡិចស៊ីសRX៣០០ ពេញទំហឹងក្នុងទិសដៅបញ្ច្រាសគ្នា បណ្តាលឱ្យស្លាប់អ្នកបើករថយន្ត SIENNA និងរបួសធ្ងន់ស្រាល៨នាក់ ។ គ្រោះថ្នាក់នេះ កើតឡើងកាលពីវេលាម៉ោងប្រមាណ៤ទៀបភ្លឺថ្ងៃទី៩ ខែកញ្ញា ឆ្នាំ២០២០ នៅក្នុងភូមិចក ឃុំសង្វើយ ស្រុកជីក្រែង ។
លោកអធិការថ្លែងថា រថយន្ត SIENNAពណ៌ទឹកមាស ពាក់ស្លាកលេខ ភ្នំពេញ ២AC-
៩៩៧១ បើកបរដោយបុរសឈ្មោះ សួ ភិន អាយុ៤៧ឆ្នាំ ទីលំនៅផ្ទះ១០៦ឌ ភូមិទឹកថ្លា សង្កាត់ទឹកថ្លា ខណ្ឌឫស្សីកែវ រាជធានីភ្នំពេញ ដឹកមនុស្ស៦នាក់(ស្រី៥នាក់) ក្នុងទិសដៅពីខាងលិចទៅខាងកើតក្នុងល្បឿនលឿន ។
លុះទៅដល់ចំណុចខាងលើ ស្រាប់តែមានរថយន្តឡិចសុីសRX៣០០មួយគ្រឿង ស៊េរីឆ្នាំ១៩៩៨ ពាក់ផ្លាកលេខ ភ្នំពេញ ២M-៤៣៣៤ ពណ៌ទឹកមាស អ្នកបើកបរមិនស្គាល់អត្តសញ្ញាណ និងមានអ្នករួមដំណើរម្នាក់ ក្នុងទិសដៅបញ្ច្រាសគ្នានិងក្នុងល្បឿនយ៉ាង លឿនដូចគ្នា ក៏បុកគ្នាពេញទំហឹងតែម្តង ។
គ្រោះថ្នាក់នេះបណ្តាលឱ្យស្លាប់អ្នកបើកបររថយន្ត SIENNA ពេលបញ្ជូនដល់មន្ទីរពេទ្យបង្អែកខេត្ត និងរបួសធ្ងន់ស្រាល៨នាក់(ស្រី៥នាក់) ។ក្រោយកើតហេតុ សមត្ថកិច្ចបានបញ្ជូនអ្នករងរបួសទាំងអស់ទៅមន្ទីរពេទ្យបង្អែកខេត្ត តែជាអកុសល អ្នកបើកបររថយន្តSIENNAឈ្មោះ សួ ភិន បានស្លាប់ពេលបញ្ជូនដល់មន្ទីរពេទ្យ ។
រីឯអ្នករងរបួសធ្ងន់ស្រាល៨នាក់ ទៀត គ្រូពេទ្យកំពុងជួយសង្គ្រោះ ។ចំណែករថយន្តទាំង២គ្រឿង ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកជីក្រែង ដើម្បីអនុវត្តតាមនិតិវិធី។ ចំណែកសពប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ផ្តល់សិទ្ធដោយ៖កោះសន្តិភាព
