Sign In 
នៅពេលដែលសេដ្ឋកិច្ចមិនមានភាពប្រាកដប្រជាមិនមែនជាពេលល្អក្នុងការលាឈប់ពីការងារដែលនឹងនរបស់អ្នកទេទោះជាអ្នកស្អប់វាពិតមែនក្តី ។ អ្នកប្រហែលជាត្រូវពន្យាពេលការសម្រេចចិត្តនេះសិនហើយ ប៉ុន្តែក្នុងកំឡុងពេលនេះ អ្នកអាចធ្វើរឿងមួយចំនួនបានដើម្បីកាត់បន្ថយអារម្មណ៍ស្អប់នឹងការងារ ។
១. ព្យាយាមពង្រឹងសមត្ថភាព និងសម្រេចបានកិច្ចការធំៗ
មិនថាការងារអ្នកជាការងារអ្វីទេ អ្នកគួរតែព្យាយាមពង្រឹងសមត្ថភាពរបស់អ្នកជានិច្ច ជាពិសេសកិច្ចការដែលទាមទារឲ្យអ្នកប្រើជំនាញអ្វីមួយ ។ ឧទាហរណ៍ដូចជា កិច្ចការធ្វើបទបង្ហាញក្នុងកំឡុងពេលប្រជុំអាចជួយពង្រឹងជំនាញទំនាក់ទំនង និងការនិយាយជាសាធារណៈជាដើម ។ ប៉ុន្តែអ្នកត្រូវតែកំណត់គោលដៅរបស់អ្នកដោយយោងទៅតាមកម្រិតនៃជំនាញដែលអ្នកកំពុងមានស្រាប់ ។
២. ផ្តល់សេរីភាពខ្លះដល់ខ្លួនឯង
អ្នកគួរតែមានសេរីភាពខ្លះក្នុងការងារដែលអនុញ្ញាតឲ្យអ្នកធ្វើអ្វីទៅតាមចិត្តរបស់អ្នក ។ ជាក់ស្តែង កន្លែងការងារជាច្រើនមានរៀបចំនូវស្តង់ដារច្បាស់លាស់ដែលបុគ្គលិកគ្រាន់តែធ្វើតាមការណែនាំម្តងហើយម្តងទៀតប៉ុណ្ណោះ ។ ប៉ុន្តែការធ្វើការដូច្នេះនឹងឆាប់ធ្វើឲ្យមនុស្សធុញទ្រាន់ ។ ដូច្នេះអ្នកគួរតែទុកឱកាសឲ្យខ្លួនឯងផ្លាស់ប្តូររបៀបរបបខ្លះៗក្នុងការងារដែរ ។
៣. បង្កើតភាពនឹងន
ប្រសិនបើអ្នកមានអារម្មណ៍ថាស្មុគស្មាញ និងតែងតែភ័យព្រួយពេលដែលកំពុងធ្វើការ អ្នកគួរតែព្យាយាមបង្កើតភាពនឹងនដែលអនុញ្ញាតឲ្យអ្នកផ្តោតស្មារតីលើការងារបានល្អជាងមុន ។ ឧទាហរណ៍ដូចជារៀបចំតារាងពេលវេលាច្បាស់លាស់ដែលអនុញ្ញាតឲ្យអ្នកធ្វើការងារតាមសម្រួលជាដើម ។
៤. ផ្តល់រង្វាន់ដល់ខ្លួនឯង
មនុស្សគួរតែទទួលបានរង្វាន់លើកទឹកចិត្តរាល់ពេលដែលពួកគេខិតខំធ្វើអ្វីមួយបានសម្រេច ។ ប៉ុន្តែអ្នកមិនចាំបាច់ពឹងផ្អែកលើអ្នកដទៃរហូតដល់ពួកគេទទួលស្គាល់ពីសមត្ថភាពរបស់អ្នកឡើយ ។ ផ្ទុយមកវិញ អ្នកអាចផ្តល់រង្វាន់ដល់ខ្លួនឯងបានមិនថាតូច ឬធំទេ ។
៥. ស្គាល់មនុស្សដែលធ្វើកិច្ចការស្រដៀងអ្នកដែរ
ប្រសិនបើអ្នកឧស្សាហ៍ធ្វើការតែម្នាក់ឯង នោះអ្នកគួរតែរាប់អានមនុស្សដែលមានកិច្ចការស្រដៀងអ្នកព្រោះវាអនុញ្ញាតឲ្យអ្នកយល់ចិត្តគ្នាបានច្រើន និងអាចចែករំលែកបទពិសោធន៍ទៅវិញទៅមកផងដែរ ៕
