Sign In 
រាជធានីភ្នំពេញ ៖ ស្ត្រីម្នាក់រស់នៅតែម្នាក់ឯង បានដេកបាត់បង់ជីវិតនៅក្នុងរោងដ៏តូចមួយ ដែលធ្វើឱ្យគេមានការសង្ស័យថា អាចជាករណីឃាតកម្ម បង្កឱ្យមានការភ្ញាក់ផ្អើលដល់អ្នកភូមិនាំគ្នាទៅប្តឹងសមត្ថកិច្ច ដើម្បីចុះមកពិនិត្យ កាលពីម៉ោង8និង30នាទីយប់ ថ្ងៃទី9 ខែកញ្ញា ឆ្នាំ2020 តាមបណ្តោយផ្លូវមាត់ទន្លេ នៅចំណុចភូមិ3 សង្កាត់ជ្រោយចង្វារ ខណ្ឌជ្រោយចង្វារ។
ជនរងគ្រោះមានឈ្មោះឌៀប ភេទស្រី អាយុ47ឆ្នាំ ជាជនជាតិខ្មែរអ៊ិស្លាម ស្នាក់នៅចំណុចកើតហេតុខាងលើ មានមុខរបរដើររើសអេតចាយ រស់នៅតែម្នាក់ឯង ដោយមិនមានសាច់ញាតិនោះទេ ។
តាមប្រភពពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុ ស្ត្រីរងគ្រោះខាងលើ គាត់រស់នៅរយៈពេលជាយូរឆ្នាំមកហើយ និងមិនមានកូនចៅ ឬក៏ប្តីនៅជាមួយទេ ហើយរាល់ថ្ងៃនេះ ស្ត្រីរងគ្រោះបានអ្នកជិតខាងហុចម្ហូបឱ្យហូប និងរស់នៅក្នុងរោងមួយដ៏តូច ស្ថិតក្នុងភូមិ ព្រមទាំងមិនដែលមានទំនាស់ជាមួយអ្នកណាឡើយ ។
សាក្សីបន្តថា លុះរហូតដល់ម៉ោង5ល្ងាច ថ្ងៃទី9 ខែកញ្ញានេះ អ្នកជិតខាងបានត្រឡប់មកពីធ្វើការវិញ ក្រោយមកនៅម៉ោងកើតហេតុខាងលើ អ្នកជិតខាងក៏ទៅរោងរបស់ស្ត្រីរងគ្រោះស្នាក់នៅ ក្នុងគោលបំណងចង់យកម្ហូបយកទៅឱ្យ ក៏ស្រាប់តែប្រទះឃើញស្ត្រីរងគ្រោះត្រូវបានដេកបាត់បង់ជីវិតនៅក្នុងរោងរបស់គាត់តែម្តង ភ្លាមៗនោះក៏បានទូរស័ព្ទទៅប្តឹងសមត្ថកិច្ចមូលដ្ឋានប៉ុស្តិ៍ជ្រោយចង្វារឱ្យមកជួយអន្តរាគមន៍ ព្រោះស្មានតែមានគេធ្វើឃាតកម្ម ប៉ុន្តែលុះពេលពិនិត្យរួចទៅដឹងថា ស្ត្រីរងគ្រោះបាត់បង់ជីវិតដោយសារតែមានជំងឺច្រើនមុខ គឺជាជំងឺប្រចាំកាយ ។
ក្រោយពេលកើតហេតុ សពស្ត្រីរងគ្រោះត្រូវបានអ្នកភូមិយកទៅបញ្ចុះនៅក្រោយភូមិ ដើម្បីធ្វើបុណ្យទៅតាមប្រពៃណី ៕ ផ្តល់សិទ្ធដោយ៖កោះសន្តិភាព
