Sign In 
រាជធានីភ្នំពេញ ៖ បុរសម្នាក់មានប្រពន្ធ និងកូន៦នាក់ទៅហើយ លុះពេលស្រលាញ់ស្ត្រីម្នាក់ជាសន្តិសុខ ក៏បានប្រាប់នាងថា គាត់ជាបុរសពោះម៉ាយ ប្រពន្ធលាចាកលោកចោលរូបគាត់ទៅហើយ ។
ក្រោយក៏បានរស់នៅជាមួយគ្នាប្រពន្ធក្រោយជាងមួយ១ឆ្នាំ ស្រាប់តែដេកបាត់បង់ជីវិតនៅក្នុងបន្ទប់ជួលតែម្តង បង្កឲ្យមានការភ្ញាក់ផ្អើលកាលពីម៉ោង៦ល្ងាច ថ្ងៃទី៩ ខែកញ្ញា ឆ្នាំ២០២០ នៅផ្ទះជួលភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ។
សពបុរសខាងលើមានឈ្មោះ សៅ សុភាព ភេទប្រុស អាយុ៥៦ឆ្នាំ មុខរបរនៅផ្ទះ មានស្រុកកំណើតនៅភូមិព្នៅ ឃុំព្រៃញាតិ ស្រុកគងពិសី ខេត្តកំពង់ស្ពឺ ស្នាក់នៅបន្ទប់ជួលកន្លែងកើតហេតុជាមួយប្រពន្ធចុងឈ្មោះ ម៉ន ស៊ីម អាយុ៤១ឆ្នាំ មុខរបរសន្តិសុខ ស្នាក់នៅភូមិ-ឃុំកើតហេតុខាងលើ មានស្រុកកំណើតនៅភូមិក្រាញ់វែង ឃុំប្រាំបីមុម ស្រុកថ្ពង ខេត្ត កំពង់ស្ពឺ ។ ចំណែកប្រពន្ធដើមឈ្មោះ ស៊ុំ សាវឿន អាយុ៥៣ឆ្នាំ មុខរបរនៅផ្ទះ រស់នៅភូមិព្នៅ ឃុំព្រៃញាតិ ស្រុកគងពិសី ខេត្តកំពង់ស្ពឺ ។
តាមប្រភពពីស្ត្រីជាប្រពន្ធចុងបានឱ្យដឹងថា រូបគាត់ជាស្ត្រីមេម៉ាយ ប្តីបានលែងលះជាច្រើនឆ្នាំហើយ ក្រោយមកក៏មានទំនាក់ទំនងស្នេហាជាមួយប្តីក្រោយដែលបានកុហកថា គាត់ជាបុរសពោះម៉ាយ ប្រពន្ធលាចាកលោកចោលទៅ ខណៈពេលរស់នៅជាមួយគ្នាបានរយៈពេលជាង២ខែ ទើបប្តីក្រោយប្រាប់ថា គាត់កុហកទេ តាមការពិតប្រពន្ធគាត់នៅរស់ ថែមទាំងមានកូនគាត់៦នាក់ទៀតផង ។
ស្ត្រីជាប្រពន្ធចុងបានឱ្យដឹងបន្តថា ដោយសារតែអង្ករក្លាយជាបាយទៅហើយ ប្រពន្ធដើម និងប្រពន្ធចុងមិនដែលមានទំនាស់ជាមួយគ្នាទេ ជារៀងរាល់ថ្ងៃប្តីរបស់គាត់តែងតែរស់នៅជាមួយគាត់មួយរយៈ ហើយទៅរស់នៅជាមួយប្រពន្ធដើមមួយរយៈ ។ លុះរំលងបានជាង១ឆ្នាំ នៅមុនពេលកើតហេតុ រូបគាត់ក៏បានទៅធ្វើការជាសន្តិសុខ ចំណែកប្តីមិនមានការងារធ្វើទេ ដោយសំរាកនៅក្នុងបន្ទប់ លុះគាត់ត្រឡប់មកពីធ្វើការវិញ ក៏ស្រាប់តែឃើញប្តីរបស់គាត់ដេកបាត់បង់ជីវិតទាំងផ្កាប់មុខស្តូកស្តឹងឡើងរឹងខ្លួនបាត់ទៅហើយ ។
ស្ត្រីជាប្រពន្ធបន្តទៀតថា បន្ទាប់មកគាត់ក៏បានរត់ទៅប្តឹងមេការផ្ទះជួល ដើម្បីឱ្យប្តឹងសមត្ថកិច្ចភ្លាមៗផងដែរ និងទាក់ទងទៅក្រុមគ្រួសាររបស់បុរសជាប្តី លុះបន្ទាប់មកប្រមាណជាងមួយម៉ោងក្រោយ ទើបក្រុមគ្រួសាររបស់ប្តីគាត់បានមកដល់ ។ ចំណែកឯកម្លាំងសមត្ថកិច្ច ខណៈពេលភ្លាមៗនោះបានទាក់ទងទៅខាងជំនាញចក្ខុរាជធានីភ្នំពេញ មកពិនិត្យសពភ្លាមៗផងដែរ ក្រោយមកទើបសន្និដ្ឋានថា ជនរងគ្រោះបានបាត់បង់ជីវិតដោយសារគាំងបេះដូងពិតប្រាកដមែន ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ ព្រមទាំងកម្លាំងសមត្ថកិច្ចជំនាញ បានប្រគល់សពឱ្យក្រុមគ្រួសារជាប្រពន្ធដើម ព្រមទាំងកូនចៅ បាននាំយកសពបុរសរងគ្រោះទៅធ្វើបុណ្យតាមប្រពៃណីនៅឯស្រុកកំណើតបាត់ទៅ ៕
