Sign In 
វាជារឿងងាយស្រួលណាស់ក្នុងការបន្តធ្វើការងារនៅកន្លែងដដែលជាច្រើនឆ្នាំដោយមិនមានឱកាសឡើងប្រាក់ខែ ឬដំណែង ។ ប៉ុន្តែអ្វីដែលអ្នកត្រូវចងចាំគឺអ្នកមានសមត្ថភាពក្នុងការគ្រប់គ្រងអាជីពរបស់អ្នកច្រើនជាងអ្នកគិតទៅទៀត ។ អ្នកអាចជោគជ័យក្នុងអាជីពរបស់អ្នកបានដោយព្យាយាមចៀសវាងកំហុសឆ្គងខាងក្រោមនេះ ៖
១. ការគិតថា ការងារមានស្ថេរភាព
មនុស្សជាច្រើនគិតថាពួកគេកំពុងមានការងារដែលមានស្ថេរភាពនិងសុវត្ថិភាពហើយដូច្នេះពួកគេមមិនចាំបាច់ព្រួយបារម្ភលើការពង្រឹងសមត្ថភាពបន្ថែមឡើយ ។ ប៉ុន្តែពេលដែលអ្នកធ្វើដូច្នេះ អ្នកលែងរៀនអ្វីដែលថ្មីៗហើយ ។ ក្នុងពេលដែលអ្នកជួបនូវវិបត្តិដែលមិនអាចដឹងទុកមុនបានដូចជាការផ្ទុះជំងឺកូវីដ១៩ ជាដើម ការងាររបស់អ្នកអាចនឹងផ្លាស់ប្តូរ ឬអ្នកអាចនឹងបាត់បង់ការងារទាំងស្រុង ។
២. ការមិនរៀនជំនាញថ្មីៗ
ពិភពលោកបច្ចុប្បន្ននេះវិលលឿនជាងកាលសតវត្សមុន ។ ហើយស្របពេលនេះដែរ ការធ្វើទំនើបកម្មផ្នែកបច្ចេកវិទ្យាក៏បន្តកើតមានឡើងយ៉ាងលឿនដែរ ដែលកំពុងផ្លាស់ប្តូរវិស័យ និងការងារផ្សេងៗជុំវិញពិភពលោក ។
ប្រសិនបើអ្នកមិនព្យាយាមសម្របខ្លួនទៅតាមការផ្លាស់ប្តូរនេះដោយព្យាយាមរៀនជំនាញថ្មីៗទេនោះ អ្នកនឹងជួបបញ្ហាក្នុងការជោគជ័យនៅថ្ងៃអនាគត ។
៣. ផ្តោតស្មារតីតែលើការងាររបស់ខ្លួន
បុគ្គលិកជាច្រើនផ្តល់តម្លៃតែលើការងារដែលខ្លួនមានក្នុងដៃប៉ុណ្ណោះ និងមើលរំលងគោលដៅធំៗរបស់ក្រុមហ៊ុន ។ ប្រសិនបើអ្នកដឹងពីគោលដៅសំខាន់ៗរបស់ក្រុមហ៊ុន អ្នកនឹងអាចរកវិធីដើម្បីជួយឲ្យក្រុមហ៊ុនកាន់តែខិតជិតគោលដៅទាំងនោះបានកាន់តែឆាប់ ។ ជាលទ្ធផល អ្នកនឹងក្លាយជាមនុស្សដែលមានតម្លៃខ្ពស់សម្រាប់ក្រុមហ៊ុនផងដែរ ។
៤. មិនស្ម័គ្រចិត្តធ្វើកិច្ចការដទៃ
បុគ្គលិកខ្លះទៀតគិតថា ពួកគេគួរតែទទួលយកការងារបន្ថែមពេលដែលពួកគេបានឡើងតំណែងជាមុនសិន ។ ប៉ុន្តែការពិតជាក់ស្តែង វាមិនដូច្នេះទេ ។ ផ្ទុយមកវិញអ្នកត្រូវស្នើសុំការងារបន្ថែមមុនសុំឡើងប្រាក់ខែ ឬតំណែង ព្រោះអ្នកត្រូវការផ្តល់នូវមូលហេតុ និងភស្តុតាងបង្ហាញថាអ្នកពិតជាស័ក្តិសមក្នុងការទទួលបានអ្វីដែលខ្លួនស្នើសុំពិតមែន ៕
