Sign In 
ឪពុកម្តាយជះឥទ្ធិពលខ្លាំងណាស់លើកូនៗ និងចៅៗ ដូច្នេះឪពុកម្តាយត្រូវតែធ្វើជាគំរូល្អ។ ជាក់ស្តែង ដើម្បីធ្វើដូច្នេះបាន អ្នកមិនចាំបាច់ត្រូវជាអ្នកមាន ឬអ្នកវិនិយោគដែលជោគជ័យទេ។ ផ្ទុយមកវិញ អ្នកគ្រាន់តែត្រូវនិយាយដោយស្មោះត្រង់ជាមួយកូន ឬចៅរបស់អ្នកពីបទពិសោធន៍ផ្ទាល់ខ្លួនរបស់អ្នកជាមួយលុយ និងគោលការណ៍ក្នុងជីវិតរបស់អ្នកជាដើម។
ទោះជាក្មេងៗអាចនឹងធុញទ្រាន់ពិតមែនក្តី ពួកគេនៅតែស្តាប់បានខ្លះៗដដែល ជាពិសេសក្នុងពេលដែលពិភពលោកកំពុងប្រឈមមុខនឹងកូវីដ ១៩ ដូចបច្ចុប្បន្ននេះ។ ភាពមិនប្រាកដប្រជាអាចនឹងបង្កឲ្យពួកគេមានការព្រួយបារម្ភច្រើន និងអាចជួបនូវបញ្ហាហិរញ្ញវត្ថុជាដើម។ខាងក្រោមគឺជាប្រធានបទធំៗដែលអ្នកគួរតែពិភាក្សាជាមួយកូនៗ និងចៅៗ៖
១. ការងាររបស់អ្នក
អ្នកគួរតែនិយាយពីការងារដែលអ្នកធ្លាប់មាន និងការងាររបស់អ្នកនាពេលបច្ចុប្បន្ន។ អ្នកអាចនិយាយពីអ្វីដែលអ្នកចូលចិត្តក្នុងការងាររបស់អ្នក និងអ្វីដែលអ្នកមិនចូលចិត្ត។ រួចបកស្រាយប្រាប់ថា លុយមិនមែនជាកត្តាតែមួយដែលសំខាន់ក្នុងការងារទេ។
ជាមួយគ្នានេះដែរ អ្នកគួរតែសួរពួកគេពីការងារ ឬអាជីពដែលពួកគេចង់បាននៅថ្ងៃអនាគត។ បន្ទាប់មកនិយាយពីតម្លៃនៃការអប់រំ និងបកស្រាយពីការដែលការអប់រំអាចបើកផ្លូវ និងឱកាសឲ្យមនុស្សបានច្រើន។ ហើយការអប់រំនៅតែមានសារៈសំខាន់ដែរខណៈដែលមានការផ្ទុះជំងឺកូវីដ ១៩ នេះ។
២. ស្ថានភាពហិរញ្ញវត្ថុរបស់អ្នក
អ្នកអាចចែករំលែកពីការខិតខំប្រឹងប្រែងក្នុងការសន្សំលុយ និងការសម្រេចចិត្តក្នុងការវិនិយោគ។ បន្ទាប់មកពិភាក្សាពីកំហុសឆ្គងដែលបានបង្រៀននូវមេរៀនសំខាន់ៗដល់អ្នក។ ក្មេងៗមិនមានឱកាសច្រើនក្នុងការរៀននូវមេរៀនសំខាន់ៗទាំងនេះនៅសាលារៀនទេ ដូច្នេះការចែករំលែកបទពិសោធន៍ផ្ទាល់ខ្លួនពិតជាមានសារៈសំខាន់ណាស់ប្រសិនបើអ្នកមិនចង់ឲ្យពួកគេប្រព្រឹត្តខុសដូចអ្នកដែរ។
៣. គោលការណ៍ក្នុងជីវិតរបស់អ្នក
ជាចុងក្រោយ អ្នកគួរតែពិភាក្សាពីគោលការណ៍ក្នុងជីវិតដែលអ្នកឲ្យតម្លៃដូចជាភាពស្មោះត្រង់ គ្រួសារ មេត្តាធម៌ ការខិតខំប្រឹងប្រែង ឬសកម្មភាពផ្សេងៗដូចជាការហាត់ប្រាណ ឬលេងកីឡាជាដើម។ ការធ្វើដូច្នេះនឹងជួយផ្តល់នូវឧទាហរណ៍ល្អៗដែលជះឥទ្ធិពលលើផ្នត់គំនិតរបស់កូន និងចៅរបស់អ្នក ៕ ផ្តល់សិទ្ធដោយ៖កោះសន្តិភាព
