Sign In 
សមត្ថកិច្ចមួយក្រុមធំ សម្រុកចាប់ ម្តាយ និងកូន សង្ស័យលក់ថ្នាំញៀន តែឃើញថ្នាំញៀន ២កញ្ចប់តូចៗ
រាជធានីភ្នំពេញ៖ កម្លាំងនគរបាលខណ្ឌពោធិ៍សែនជ័យ សហការជាមួយកម្លាំងនគរបាលប៉ុស្តិ៍ ចោមចៅទី៣ ដោយមានការសម្របសម្រួលពី ព្រះរាជអាជ្ញាររងអមសាលាដំបូង រាជធានីភ្នំពេញ សម្រុកចូលទៅដល់ក្នុងផ្ទះ បានធ្វើការឃាត់ខ្លួនស្ត្រីម្នាក់រួមនឹងកូនប្រុសម្នាក់ ប៉ុន្តែរកឃើញថ្នាំញៀនត្រឹមតែ២កញ្ចប់ រួមជាមួយនិងថង់សម្រាប់ច្រកវេចខ្ចប់គ្រឿងញៀនមួយចំនួនតែប៉ុណ្ណោះ។
ប្រតិបត្តិការហ៊ឹកហ៊ាក់នេះ បានធ្វើឡើងកាលពីវេលាម៉ោង៣ និង២៥នាទី រសៀលថ្ងៃទី១៣ ខែកក្កដា ឆ្នាំ២០២០ នៅចំណុចផ្ទះលេខ១៨០ ក្រុមទី៧ ស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
នគរបាលបានឱ្យដឹងថា ស្ត្រីជាម្ដាយឈ្មោះងួន សំបូរ អាយុ៤៩ឆ្នាំ និងកូនប្រុសឈ្មោះ លី ហាក់ឡេង អាយុ១៨ឆ្នាំ អ្នកទាំង២នេះស្នាក់នៅក្នុងផ្ទះកើតហេតុខាងលើ ។
តាមប្រភពបន្តទៀតថា កម្លាំងនគរបាលបានធ្វើការស្រាវជ្រាវ ច្រើនថ្ងៃកន្លងមកហើយ បន្ទាប់ពីទទួលបានការផ្ដល់ព័ត៌មានពីសំណាក់មហាជនដែលបានប្រាប់ ប៉ុន្តែរហូតពេលនេះទើបកំណត់បានច្បាស់លាស់នូវមុខសញ្ញាខាងលើនេះ។បន្ទាប់មកកម្លាំងនគរបាលខណ្ឌពោធិ៍សែនជ័យបាន សហការជាមួយកម្លាំងនគរបាលប៉ុស្តិ៍ចោមចៅទី៣ បានចុះទៅធ្វើការបង្ក្រាបនិងចាប់ខ្លួនបានទាំង២នាក់ ម្ដាយ និងកូន ហើយក៏បានរកនិងដកហូតវត្ថុតាងខាងលើផងដែរ។
បច្ចុប្បន្ន ជនសង្ស័យទាំង២នាក់ ត្រូវបាននាំទៅកាន់អធិការដ្ឋាន នគរបាលខណ្ឌពោធិ៍សែនជ័យ ដើម្បីសាកសួរ និងកសាងសំណុំរឿងចាត់ការតាមផ្លូវច្បាប់៕ ត្នោត
