Sign In 
រាជធានីភ្នំពេញ៖ លោក វង្ស ណយ បានប្រកាសលាឈប់ពីការងារជាអ្នកប្រដាល់ ដោយអះអាងថា របរមួយនេះទទួលបានត្រឹមកេរ្តិ៍ឈ្មោះ គ្មានសល់លុយកាក់អ្វីនោះឡើយ ។
អ្នកប្រដាល់ក្បាច់បុរាណខ្មែរ មានរហ័សនាមថា អ្នកលេងកែងឆេះមកពីក្លិបកងពលតូចលេខ៣១ លោក វង្ស ណយ ដែលត្រូវបានគេទទួលស្គាល់ថា ជាកំពូលកីឡាករប្រដាល់ដ៏មានសមត្ថភាព ដែលអាចផ្តួលគូប្រកួតឱ្យសន្លប់ជាច្រើនដង បានប្រកាសលាឈប់ពីប្រដាល់កាលពីរាត្រីថ្ងៃទី១២ កក្កដា ឆ្នាំ២០២០។
លោកថា វិស័យមួយនេះពិតជាជួយឲ្យកេរ្តិ៍ឈ្មោះល្បីពិតមែន តែនិយាយពីចំណូលវិញ គឺទាប ហើយប្រឈមមុខនឹងគ្រោះថ្នាក់ធ្លាក់ខ្លួនពិការ ហើយបើសិនជាធ្លាក់ខ្លួនពិការពិតមែន គឺកូនៗរបស់លោកពិតជាវេទនាហើយ ។
បង្ហោះប្រកាសលើបណ្តាញសង្គមហ្វេសប៊ុកលោក វង់ ណយ សរសេរថា «ខ្ញុំលាឈប់ពីប្រដាល់ហើយបងប្អូន ។ ខ្ញុំវ៉ៃយូរណាស់ហើយ ល្បីតែឈ្មោះ គ្មានសល់អីទេ ពេលនេះខ្ញុំអស់កម្លាំងវ៉ៃទៀតហើយ ទើបខ្ញុំសម្រេចចិត្តឈប់វៃនៅពេលនេះ ព្រោះខ្លាចពិការ ខានបានរកស៊ីចិញ្ចឹមកូន ។បើខ្ញុំពិការទៅគ្មានអ្នកណាចិញ្ចឹមកូនខ្ញុំទេ» ។
សូមបញ្ជាក់ថា កីឡាករ វង្ស ណយ លោក វង្ស ណយ ជាកូនសិស្សរបស់លោក ឈិត សារឹម ហើយលោកមានស្រុកកំណើត នៅស្រុកសាលាក្រៅ ខេត្តប៉ៃលិន ។
