សំបុកសត្វអណ្តើកថ្មីត្រូវបានគេរកឃើញនៅភូមិមួយឈ្មោះ Khao Lak  នៃខេត្តភូកេតដោយមានពង​ជិត ១០០គ្រាប់ឯណោះ ​។

លោក Haritchai Rittichuay ប្រធានឧទ្យានជាតិ Khao Lampi – Hat Thai Mueang បានប្រាប់កាសែត The Phuket News ថាសំបុកនេះត្រូវបានរកឃើញកាលពីថ្ងៃអង្គារទី៧ ខែកក្កដា។ លោក Haritchai បាននិយាយថាអ្នកនេសាទក្នុងតំបន់ឈ្មោះ Rome Sengkeaw ​រាយការណ៍ថាបានរកឃើញ​ផ្លូវសត្វអណ្តើក​មួយនៅលើដីខ្សាច់ខាងមុខកោះ Khao Nayak ​​​កាលពីម៉ោង ៥ព្រឹក។

លោក Haritchai បានបន្ថែមថាក្រុមមន្រ្តីបានមកដល់និងបានរកឃើញសំបុកសត្វអណ្តើកនៅម៉ោងប្រហែល ៨ព្រឹក។ លោកបានមានប្រសាសន៍ថា ក្នុងសំបុកអណ្តើកនោះមានពងចំនួន ១០​​​០គ្រាប់ ដែលក្នុងនោះមាន ៩១ គ្រាប់ទំនងជា​ជិតញាស់ហើយ។

​ដោយសារសំបុកអណ្តើកនេះនៅឆ្ងាយពីឧទ្យានជាតិ ដូចនេះក្រុមការងារនឹងបន្ថែមកម្លាំងមើលថែដល់សំបុកនោះឱ្យបានដិតដល់ ត្បិតខ្លាចអាកាសធាតុនៅជិតនោះមិនសូវល្អនិងខ្លាចក្រែងមានជនខិលខូចយាយីដល់សំបុកសត្វអណ្តើកនោះ៕

កែសម្រួលដោយ៖ ភារ៉ា

ប្រភព៖ phuket news

from： https://tnaot.com/km/m/detail/article/9467213