លិខិតឆ្លងដែនថៃថ្មីបានដាក់ឱ្យដំណើរការកាលពីថ្ងៃពុធដោយមានផែនការបង្កើនសុពលភាព​រហូតដល់ទៅ ១០ឆ្នាំចាប់ពីខែបន្ទាប់។

លិខិតឆ្លងដែនដែលបានកែប្រែថ្មីត្រូវបានរចនាឡើងដើម្បីបង្កើនសន្តិសុខទាំង​​ម្ចាស់​កម្មសិទ្ធនិងប្រទេស។ យោងតាមនាយកដ្ឋានកុងស៊ុលថៃបានឱ្យដឹងថា លក្ខណៈពិសេសថ្មី​រួមមានហត្ថលេខា​និងទិន្នន័យ​ដែលស្កេនពីរាងកាយរបស់អ្នកប្រើប្រាស់ដើម្បីសម្គាល់ជាអត្តសញ្ញាណទៀត​ផង។ យោងតាមសេចក្ដីជូនដំណឹងបានឲ្យដឹងថា នៅលើលិខិតឆ្លងដែនថ្មីក៏មានកន្លែងប្រវត្តិសាស្ត្រសំខាន់ៗចាប់ពីសម័យសុខោទ័យរហូតដល់សម័យ Rattanakosinដែលត្រូវបានបោះពុម្ពនៅលើទំព័រនីមួយៗដើម្បីផ្តល់ចំណេះដឹងដល់ម្ចាស់​កម្មសិទ្ធផងដែរ។

លិខិតឆ្លងដែនថៃបច្ចុប្បន្នមានសុពលភាពរយៈពេល ៥ឆ្នាំ គិតចាប់ពីកាលបរិច្ឆេទ​ដែលនាយកដ្ឋានប្រកាសជាសាធារណៈ។ នាយកដ្ឋានបាននិយាយថា​ពួកគេគ្រោងនឹងពន្យារពេល​ផុតកំណត់រហូតដល់ទៅ ១០​ឆ្នាំ ចាប់ពីខែក្រោយនេះ។ ការិយាល័យនាយកដ្ឋាននៅលើផ្លូវ​ Chaeng W​atthana ត្រូវបានបិទជាបណ្តោះអាសន្នដើម្បីជួសជុល។ សេវាកម្មធ្វើលិខិតឆ្លងដែនត្រូវបានផ្លាស់ប្តូរទៅអគារមជ្ឈមណ្ឌលសេវាកម្មអតិថិជននៅក្បែរក្រុមហ៊ុនទូរគមនាគមន៍​ CAT Telecom ​ដែលនៅជាប់នឹងកន្លែងកិច្ចការរបស់រដ្ឋាភិបាល។ ការិយាល័យកុងស៊ុលថៃក៏មានការិយាល័យលិខិតឆ្លងដែននៅទីតាំងផ្សេងទៀតទូទាំងទីក្រុងបាងកកនិងនៅខេត្ត​ផងដែរ។

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9466956