10:15

ភ្នំពេញ: នារីម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុបន្ទាប់ពីជិះម៉ូតូមួយគ្រឿងកំពុងធ្វើដំណើរត្រូវរថយន្តបុកពីក្រោយពេញទំហឹងដួលកិនបែកក្បាលស្លាប់ភ្លាមបង្ក កាលវេលាម៉ោង ៦នឹង៤០នាទី ព្រឹកថ្ងៃទី ០៦ខែកក្កដាឆ្នាំ ២០២០ស្ថិតនៅត្រង់ចំណុចស្តុបផ្សារថ្នល់បត់ភូមិខ្វារ សង្កាត់ដង្កោ ខណ្ឌដង្កោ រាជធានីភ្នំពេញ។

សពជនរងគ្រោះមានឈ្មោះ ម៉ែន ចន្ធូ ភេទ ស្រីអាយុ៣៦ស្នាក់នៅផ្លូវ៦០Aផ្លូវលំភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ។

អ្នកបើកបររថយន្តបង្កមានឈ្មោះស៊ុន សុង អាយុ៣៧ មុខរបរបើកបរ ស្នាក់បន្ទប់ជួលភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើតនៅភូមិធ្នង់ធំ ឃុំស្វាយធំ ស្រុកស្វាយជ្រុំ ខេត្តស្វាយរៀង។

តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេបានឃើញ

នារីម្នាក់ជិះម៉ូតូមួយគ្រឿងម៉ាកឌ្រីមសង់សេ១២៥ ស៊េរីឆ្នាំ២០១៥ ពណ៌ខ្មៅពាក់ស្លាកលេខ ភ្នំពេញ1DH-3064ធ្វើដំណើរតាមបណ្ដោយផ្លូវ ២១៧ ក្នុងទិសដៅពីត្បូងមកជើងខណៈមកដល់ចំណុចកើតហេតុកំពុងឈប់ស្តុបត្រូវរថយន្តដឹកទំនិញមួយគ្រឿងបើកបរលឿនជាន់ហ្វ្រាំងមិនស៊ីជ្រុលទៅបុកពីក្រោយពេញទំហឹងបណ្ដាលឲ្យដួលកិនបែកក្បាលស្លាប់យ៉ាងអាណោចអធម្មភ្លាមៗនៅនឹងកន្លែងកើតហេតុ ចំណែកអ្នកបើកបរត្រូវសមត្ថកិច្ចឃាត់ខ្លួន។

ក្រោយកើតហេតុសមត្ថកិច្ចមូលដ្ឋានបានចុះមកដល់ទីតាំងកន្លែងកើតហេតុនិងធ្វើការទំនាក់ទំនងទៅសមត្ថកិច្ចជំនាញផ្នែកចរាចរណ៍ចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានគរបាលរាជធានីភ្នំពេញរងចាំដោះស្រាយនៅពេលក្រោយ ចំណែកសពសមត្ថកិច្ចធ្វើកំណត់ហេតុរួចប្រគល់ឲ្យសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត៕ ដោយ សួង សាម

from： https://tnaot.com/km/m/detail/article/9458603