បាល់ទាត់៖ លោក Zinedine Zidane គ្រូបង្វឹកក្លិប Real Madrid បាននិយាយថា កីឡាករ Eden Hazard នឹងអង្គុយមើលក្រុមលេងការប្រកួតជាមួយ Athletic Bilbao នៅថ្ងៃអាទិត្យសប្តាហ៍នេះ។ អ៊ីចឹងមានន័យថា រូបគេនឹងមិនមានក្នុងបញ្ជីឈ្មោះដាក់លេងរបស់លោក Zidane ទេ នៅក្របខ័ណ្ឌ LaLiga ដែលត្រូវជាការប្រកួតលើកទី ៣៤ នៃរដូវកាលនេះ។

កីឡាករអន្តរជាតិបែលហ្សិកវ័យ ២៩ ឆ្នាំមានបញ្ហារបួសនៅពេលលេងជាមួយក្រុម Espanyol ហើយរូបគេត្រូវប្តូរជំនួសដោយកីឡាករ Vinicius Junior នៅនាទីទី ៦៣ ដែលបញ្ចប់ទៅក្នុងលទ្ធផលឈ្នះ ១-០។ បច្ចុប្បន្ន Real Madrid កំពុងឈរនៅកំពូលតារាងមាន ៧៤ ពិន្ទុដាច់ Barcelona ចំនួន ៤ ពិ​ន្ទុ ខណៈពេលដែលក្រុមទាំងពីរនៅសល់ម្នាក់ ៥ ប្រកួតក្នុងដៃដើម្បីប្រជែងយកជើងឯក LaLiga របស់អេស្ប៉ាញរដូវកាលនេះ។

ការខកខាននេះជាលើទី ២ របស់ខ្សែបម្រើស្លាប Hazard ចាប់តាំងពីបើកឱ្យមានការប្រកួតឡើងវិញនៅខែមិថុនា ខណៈពេលដែលរូបគេលេងបានត្រឹមតែ ៣ ប្រកួតប៉ុណ្ណោះ ក្នុងចំណោម ៥ ប្រកួតកន្លងទៅ។ សម្រាប់រដូវកាលនេះ សរុបការប្រកួតទាំងអស់ Hazard បានបង្ហាញខ្លួនចំនួន ១៩ ប្រកួតគ្រប់កម្មវិធី ហើយរកបានត្រឹមតែ ១ គ្រាប់ប៉ុណ្ណោះ៕

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9456205