​សេដ្ឋីជនជាតិឥណ្ឌាម្នាក់បាននិយាយថាគាត់បានចំណាយប្រាក់ប្រហែល ៤០០០ ដុល្លារសម្រាប់ទិញ​ម៉ាស់មាស​ដើម្បីពាក់ការពារ​ការឆ្លងមេរោគ​កូវីដ-១៩។

អ្នក​ជំនួញម្នាក់ឈ្មោះ Shankar Kurhade មកពីទីក្រុង Pune ​បាននិយាយថា ​ម៉ាស់មាសនេះមានទម្ងន់ ៦០ក្រាម ហើយជាងបានចំណាយពេលធ្វើវាអស់រយៈពេល​៨ថ្ងៃទើបរួចរាល់។ លោក Shankar បានប្រាប់ AFP ថា “វាគឺជាម៉ាស់ស្តើងហើយមានរន្ធ​តូចៗ​ទុកសម្រាប់ដកដង្ហើម។  ខ្ញុំមិនប្រាកដទេថាតើវានឹងមានប្រសិទ្ធភាពដើម្បីការពារខ្ញុំពីការឆ្លង​ជំងឺ​ឬទេ ប៉ុន្តែខ្ញុំនៅតែប្រថុយធ្វើដើម្បីការពារខ្លួនពីការឆ្លងជំងឺ” ។

នៅពេលចេញទៅក្រៅបុរសអាយុ ៤៩ឆ្នាំ រូបនេះបាននិយាយថាគាត់ចូលចិត្តតុបតែងខ្លួនដោយគ្រឿងអលង្ការមាសទម្ងន់ ១គីឡូក្រាម រួមមានខ្សែដៃ ខ្សែក និងចិញ្ចៀននៅម្រាមដៃស្តាំគ្រប់ម្រាម​របស់គាត់។

លោក​ Kurhade ​​បាននិយាយថាលោកមានគំនិតធ្វើម៉ាស់មាសនេះ ក្រោយពីបានឃើញសេចក្តីរាយការណ៍អំពីបុរសពាក់អាវធ្វើពីប្រាក់។

លោកបានបន្តថា​ “អ្នកភូមិជាច្រើនសុំខ្ញុំ​ថតរូបជាមួយ មើលទៅពួកគេពិតជាភ្ញាក់ផ្អើលនៅពេល​ឃើញខ្ញុំពាក់ម៉ាស់មាសនៅតាមផ្សារ” ។

ប្រទេសឥណ្ឌា​ជាប្រទេសដែលមានអ្នកឆ្លងមេរោគកូវីដ-១៩ ​ក្នុងចំនួនច្រើនគឺ ៦៥០០០០ នាក់ ​និងមានអ្នកស្លាប់​ប្រហែល ១៨៦០០នាក់។

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9454813