បុរសជនជាតិអូស្ត្រាលីអាយុ ៥៩ ឆ្នាំម្នាក់ ត្រូវបានគេប្រទះឃើញដេកស្លាប់កាលពីថ្ងៃសៅរ៍នៅខាងក្នុងផ្ទះល្វែងមួយដែលមានថង់ប្លាស្ទិកគ្របក្បាល​និងមានខ្សែ​ចងករបស់គាត់។​

លោកវរសេនីយ៍ទោ Nithat Waewpradab ស្នងការរងនៃអធិការក្រុង​ Pattaya បានមានប្រសាសន៍ថា សាកសពជនរងគ្រោះត្រូវបានគេរកឃើញនៅលើគ្រែក្នុងបន្ទប់មួយដែលស្ថិតនៅជាន់ទីបួននៃអគារកម្ពស់បួនជាន់។ ពេលទៅដល់កន្លែងកើតហេតុគេឃើញ​ជនរងគ្រោះ​ពាក់អាវយឺត ស្លៀកតែខោទ្រនាប់​ ហើយ​ក្បាលរបស់គេគ្របដោយថង់ប្លាស្ទិច ​និងមានខ្សែចងរឹតនៅត្រង់កទៀតផង។ ដៃរបស់ជនរងគ្រោះ​​ត្រូវចង​យ៉ាងតឹងផងដែរ។ ​​នៅលើដងខ្លួនជនរងគ្រោះ ប៉ូលិសរកមិនឃើញស្នាមជាំដែលបញ្ជាក់ថាត្រូវគេវាយដំធ្វើបាបនោះទេ ហើយក្នុងបន្ទប់ដែលមានដាក់កុំព្យូទ័រដល់ទៅ ៧គ្រឿង ក៏ប៉ូលិសរកមិនឃើញថាមានស្នាមដានវាយតប់គ្នានោះដែរ។ ​

ស្ថិតក្នុងការសន្និដ្ឋានបឋម ប៉ូលិស​សង្ស័យថា​ជនរងគ្រោះប្រហែលជាមានបញ្ហាស្ត្រេសហើយព្យាយាមសម្លាប់ខ្លួន។ ​មានវីដេអូ​ថតដោយកាមេរ៉ាសុវត្ថិភាព​បានបង្ហាញថាគ្មាននរណាម្នាក់បានចូលក្នុងបន្ទប់របស់គាត់ទេ។ ម្ចាស់​អគារដែល​រកឃើញសាកសពបានប្រាប់ប៉ូលិសថា ជនរងគ្រោះបានរស់នៅក្នុងផ្ទះល្វែងជិតនេះ​ ៣ ឆ្នាំហើយ។ សាកសពជនរងគ្រោះត្រូវបានបញ្ជូនទៅកាន់មន្ទីរពេទ្យមួយក្នុងទីក្រុងបាងកកដើម្បី​​កំណត់ពីមូលហេតុពិតប្រាកដនៃការស្លាប់។

កែសម្រួលដោយ៖ ភារ៉ា

ប្រភព៖​ Bangkok Post

from： https://tnaot.com/km/m/detail/article/9454730