បាល់ទាត់៖ ខ្សែបម្រើស្លាប Leroy Sane នឹងពាក់អាវលេខ ១០ ដែលជាកម្មសិទ្ធិរបស់ Philippe Coutinho នៅពេលលេងឱ្យក្លិប Bayern Munich នៅរដូវកាលក្រោយ។

ថ្មីៗនេះ កីឡាកររបស់ក្លិប Manchester City រូបនេះទើបតែបញ្ចប់ការផ្ទេរទៅកាន់ក្លិប Bayern Munich ក្នុងតម្លៃ ៦០ លានអឺរ៉ូ ដោយចុះកុងត្រារយៈពេល ៥ ឆ្នាំនៅទឹកដី Allianz Arena ដែលមានសុពលភាពរហូតដល់ឆ្នាំ២០២៥។

បច្ចុប្បន្ន ក្លិបម្ចាស់ជើងឯកក្របខ័ណ្ឌ Bundesliga រដូវកាលនេះ គ្មានគម្រោងទិញខ្សែបម្រើស្លាប Coutinho ផ្តាច់កុងត្រាពីក្លិប Barcelona ទេ ក្រោយខ្ចីជើងបានមួយរដូវកាលមក ដោយពួកគេមិនចង់ចំណាយច្រើនទៅលើកីឡាករដែលធ្លាប់មានរបួសញាំញី នឹងកំពុងធ្លាក់ទម្រង់ល្អ។ យ៉ាងណាមិញ Bayern នៅតែផ្តល់ឱកាសឱ្យជម្រើសជាតិប្រេស៊ីលវ័យ ២៨ ឆ្នាំបន្តលេងរហូតដល់យុទ្ធនាការរដូវកាលនេះ ក្រោយភាគីទាំងសងខាងព្រមព្រៀងគ្នាចុះកុងត្រារយៈពេលខ្លី ដែលមានសុពលភាពដល់ចុងខែសីហា។ Coutinho នឹងបន្តជួយក្រុមក្នុងពានរង្វាន់ DFB-Pokal  វគ្គផ្តាច់ព្រ័ត្រ និង Champions League វគ្គ ១៦ ក្រុមចុងក្រោយជើងទី២។

យ៉ាងណាក៏ដោយ ក្រោយ Coutinho បន្តលេងរហូតចប់រដូវកាលនេះ ធ្វើឱ្យ Sane ពន្យាពេលទទួលបានអាវលេខ ១០ ហើយអាចនឹងយកអាវលេខផ្សេងជំនួសបណ្ដោះអាសន្ន ដោយត្រូវរង់ចាំរហូតដល់រដូវកាលក្រោយទើបក្លាយជាម្ចាស់អាវលេខពិសេសនេះ៕

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9452092