Sign In 
អង្គរធំជាវង់ប្រាសាទជាច្រើនឬទីក្រុងអង្គរធំ ដែលត្រូវបានស្ថាបនាក្នុងគ.ស ១១៨១-១២១៨ ក្នុងរាជ្យព្រះបាទជ័យវរ្ម័នទី ៧។ ទីក្រុងស្ថិតនៅក្នុងបរិវេណគូទឹក ហើយមានច្រកចេញចូលចំនួន ៥។ ខ្លោងទ្វារទាំងប្រាំនោះមានដូចជា៖
១. ខ្លោងទ្វារទន្លេអុំ នៅទិសខាងត្បូង
២. ខ្លោងទ្វារខ្មោច នៅទិសខាងកើត ចំមុខប្រាសាទបាយ័ន
៣. ខ្លោងទ្វារជ័យ នៅទិសខាងកើត ចំមុខលានជល់ដំរី
៤. ខ្លោងទ្វារដីឆ្នាំង នៅទិសខាងជើង
៥. ខ្លោងទ្វារតាកៅ នៅទិសខាងលិច។
ខ្ញុំសូមលើកឡើងនូវខ្លោងទ្វារទន្លេអុំ នៅទិសខាងត្បូងមកបង្ហាញជាមុន។ តើខ្លោងទ្វារនេះមានមុខងារអ្វីក្នុងចំណោមខ្លោងទ្វារទាំង ៥ នៃក្រុងអង្គរធំ? ហើយតើហេតុអ្វីបានជាគេហៅថាខ្លោងទ្វារទន្លេអុំ?
ខ្លោងទ្វារទន្លេអុំ ឬខ្លោងទ្វារខាងត្បូងនេះ ក្នុងសម័យបុរាណត្រូវបានគេបើកសម្រាប់ឲ្យសាធារណជនទូទៅ រាប់តាំងពីប្រជារាស្ត្ររហូតដល់មន្ត្រី ដែលអាចចេញចូលក្នុងទីក្រុង ក្នុងគោលបំណងកិច្ចការរដ្ឋបាល ការរកស៊ី ឬពាក់ព័ន្ធនឹងសាសនាជាដើម។ មូលហេតុដែលគេហៅខ្លោងទ្វារនេះថា ខ្លោងទ្វារទន្លេអុំ ដោយសារគូទឹកដែលនៅជុំវិញនោះត្រូវបានគេប្រើសម្រាប់ធ្វើពិធីប្រណាំងទូករំឭកដល់ការច្បាំងឈ្នះលើកងទ័ពចាម។
បច្ចុប្បន្ន ខ្លោងទ្វារនៅមានសភាពល្អជាងគេ និងមានទេសចរចាប់អារម្មណ៍ច្រើនដោយសារមានរូបចម្លាក់អសុរៈ និងទេវៈច្រើនជាងខ្លោងទ្វារដទៃ និងមួយទៀតដោយសារវាជាផ្លូវចូលសំខាន់នៃក្រុងអង្គរធំ បន្ទាប់ពីភ្ញៀវចេញពីទស្សនាប្រាសាទអង្គរវត្ត។
ចុះលោកអ្នកធ្លាប់បានជិះកាត់ខ្លោងទ្វារនេះទេ? ហើយមានដឹងពីប្រវត្តិ ឬមុខងាររបស់ខ្លោងទ្វារនេះទេ?
