ភ្នំពេញ:បុរសម្នាក់បើករថយន្តបែនដឹកខ្សាច់មួយគ្រឿងសង្ស័យអ្នកបើកបរងងុយដេករេចង្កូតឡើងចិញ្ចើមផ្លូវបុករះចូលផ្ទះបងប្អូនប្រជាពលរដ្ឋ បាក់ខ្ទេចសំយ៉ាបអស់៣ល្វែង ខ្ទេចសម្ភារ: ម៉ូតូ២គ្រឿងសំណាងល្អគ្មានអ្នករបួស។

ហេតុការណ៍នេះកើតឡើងកាលពីវេលាម៉ោង១និង៥៤នាទីរសៀល ថ្ងៃទី០១ ខែកក្កដា ឆ្នាំ២០២០ នៅតាមមហាវិថីឈ្នះ ឈ្នះ ភូមិសំរោង សង្កាត់សំរោងក្រោម ខណ្ឌពោធិសែនជ័យ ។

ប្រភពព័ត៌មានពីបងប្អូនប្រជាពលរដ្ឋនៅទីតាំងកន្លែងកើតហេតុបានឲ្យដឹងថាមុនពេលកើតហេតុគេឃើញរថយន្ត១គ្រឿងម៉ាកនីសាន់ បែនកង់៦ ពណ៌ខៀវ ពាក់ស្លាកលេខ ព្រះសីហនុ 3A-1925 ដឹកខ្សាច់ បើកបរដោយយុវជនម្នាក់ ពាក់ក្រវិលពេញត្រចៀក។

បើកបរល្បឿនលឿន ពីត្បូងទៅជើង លុះដល់ចំណុចកើតហេតុ សង្ស័យអ្នកបើកបរងោក ទើបរេចង្កូតឡើងចិញ្ចើមផ្លូវ បុករះ ជើងសរសរសំយ៉ាបផ្ទះចំនួន៣ល្វែងបុករុញផ្ទប់ជាប់ម៉ូតូម៉ាកគុបជ្រុងនិងម៉ូតូកង់បីទល់ជាប់ជញ្ជាំងផ្ទះទៅមុខលែងរួច បណ្តាលឲ្យសម្ភារ: លក់ដូរខូចខាតមួយចំនួនធំសំណាងល្អអ្នកលក់ដូររត់ទាន់

ក្រោយកើតហេតុសមត្ថកិច្ចមូលដ្ឋានចុះទៅដល់ទីតាំងកន្លែងកើតហេតុរួចឃាត់ខ្លួនជនបង្កដើម្បីសួរនាំចំណែករថយន្តសមត្ថកិច្ចយកមករក្សាទុករង់ចាំដោះស្រាយគ្នានៅពេលក្រោយ ដោយ:ផេង ភាព

from： https://tnaot.com/km/m/detail/article/9445679