បាល់ទាត់៖ ក្លិបអ៊ីតាលី Napoli ជិតឈានដល់ការចុះហត្ថលេខានឹងខ្សែប្រយុទ្ធ Victor Osimhen របស់ក្លិបបារាំង Lille ក្នុងពេលឆាប់ៗខាងមុខ។

មានការអះអាងថា Osimhen ជាបេក្ខភាពមកជំនួសខ្សែប្រយុទ្ធ Arkadiusz Milik កំពុងត្រៀមចាកចេញនៅចុងខែសីហា ក្រោយផុតកុងត្រាជាមួយ Napoli។

ជម្រើសជាតិនីហ្សេរីយ៉ារូបនេះ ជាគោលដៅផ្ទេររបស់ Napoli ចាប់តាំងពីដើមរដូវកាល ប៉ុន្តែ Lille មិនអនុញ្ញាតឱ្យកម្លាំងសំខាន់វ័យ ២១ ឆ្នាំ របស់ពួកគេចាកចេញលឿនពេកទេ។ យ៉ាងណាមិញរបាយការណ៍នៅអ៊ីតាលីបានបញ្ជាក់ថា​ Osimhen កំពុងធ្វើដំណើរទៅកាន់ទីក្រុង Naples ដើម្បីជួបពិភាក្សាក្រៅផ្លូវការមួយទាក់ទងនឹងការផ្ទេរ។

តម្លៃខ្លួនកីឡាកររូបនេះ ត្រូវបានគេរំពឹងថាប្រមាណ ៨០ លានអឺរូ ក្រោយបង្ហាញទម្រង់លេងល្អ ដោយរកបាន ១៣ គ្រាប់ បញ្ជូនបាល់ឱ្យមិត្តរួមក្រុមសម្រេចទី (Assist) ៤ ដង នៅក្របខ័ណ្ឌបារាំង Ligue 1 រដូវកាលនេះ។ គួរឱ្យដឹងដែរថាក្លិប Lille បញ្ចប់យុទ្ធនាការទៅនៅក្នុងរដូវកាលនេះ ដោយឈរនៅលេខ ៤ ខណៈដែល PSG នៅតែអាចរក្សាតំណែងជើងឯកបានសារជាថ្មី៕

កែសម្រួលដោយ៖ ភារ៉ា

ប្រភព៖ football-italia

from： https://tnaot.com/km/m/detail/article/9442471