បាល់ទាត់៖ ក្លិប AC Milan បានចំណាយប្រាក់ ៧ លានអឺរ៉ូចុះហត្ថលេខាយកកីឡាករពីររូប គឺខ្សែបម្រើ Alexis Saelemaekers និងខ្សែការពារ Simon Kjaer ជាអចិន្រ្តៃយ៍ ក្រោយខ្ចីជើងជិត ១ រដូវកាល។

មានការអះអាងថាក្លិបនៅអ៊ីតាលីនេះ បានចំណាយ ៣.៥ លានអឺរ៉ូទិញ Saelemaekers ពី Anderlecht សម្រាប់ប្រាក់នៅសល់ចាយទៅលើ Kjaer ដើម្បីទិញពី Sevilla ហើយកីឡាករទាំងពីររូបនេះ នឹងកា្លយជាកម្មសិទ្ធរបស់ Milan ជាអចិន្រ្តៃយ៍តែម្តង។

Saelemaekers មកដល់អ៊ីតាលីកាលពីខែមករាឆ្នាំនេះ ក្នុងលក្ខខណ្ឌខ្ចីជើង ហើយបង្ហាញខ្លួនបាន ៤ ប្រកួតប៉ុណ្ណោះ ប៉ុន្តែខ្សែបម្រើបែលហ្ស៊ិកវ័យ ២១ ឆ្នាំ មានការពេញចិត្ត និងតស៊ូលេង ក្រោមការដឹកនាំរបស់លោក Pioli នៅរដូវកាលក្រោយទៀត។

រីឯ Kjaer ក៏ជាកីឡាករដែលមកក្នុងលក្ខខណ្ឌខ្ចីជើងផងដែរ រូបគេបង្ហាញខ្លួនបាន ១១ ប្រកួត នៅតំបន់ការពារកណ្តាល ជំនួស Musacchio កំពុងមានបញ្ហារបួស។ លោក Pioli បានដាក់ឱ្យ Kjaer ចាប់ដៃគូជាមួយ Alessio Romagnoli លេងនៅតំបន់កណ្តាលរហូតចប់រដូវកាលនេះ៕

កែសម្រួលដោយ៖ ភារ៉ា

ប្រភព៖ football-italia

from： https://tnaot.com/km/m/detail/article/9442376