Sign In 
ច្រកទ្វារព្រំដែនម៉ឺនជ័យ ដែលស្ថិតនៅក្នុងស្រុកកំចាយមារ ខេត្តព្រៃវែង ជាប់នឹងច្រកទ្វារព្រំដែន តឺនណា ខេត្តតៃនិញ ប្រទេសវៀតណាម ត្រូវបានអាជ្ញាធរកម្ពុជា-វៀតណាម ឯកភាពគ្នា ក្នុងការតំឡើងឱ្យទៅជាច្រកទ្វារអន្តរជាតិ។
ក្រសួងមហាផ្ទៃ បើកកិច្ចប្រជុំពិភាក្សាត្រៀមរៀបចំ ដាក់ឲ្យដំណើរការជាផ្លូវការ នូវការដំឡើងកម្រិត ទៅជាច្រកទ្វារព្រំដែនអន្ដរជាតិ នៅទីស្ដីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី៣ ខែកញ្ញា ឆ្នាំ២០២០នេះ។
កិច្ចពិភាក្សានេះ ត្រូវបានលើកឡើងនូវការត្រៀមរៀបចំដាក់ឲ្យដំណើរការជាផ្លូវការ នូវការដំឡើងកម្រិតច្រកទ្វារព្រំដែនម៉ឺនជ័យ ទៅជាច្រកទ្វារព្រំដែនអន្ដរជាតិ (កម្ពុជា-វៀតណាម)។
បើតាមលោក សក់ សេដ្ឋា រដ្ឋលេខាធិការក្រសួងមហាផ្ទៃបានឱ្យដឹងថា នាពេលកន្លងមក រាជរដ្ឋាភិបាល នៃប្រទេសទាំងពីរ កម្ពុជា-វៀតណាម បានឯកភាពគ្នាក្នុងការដំឡើងកម្រិតច្រកទ្វារព្រំដែន ម៉ឺនជ័យ ទៅជាច្រកទ្វារអន្ដរជាតិ ដើម្បីបង្កើនកិច្ចសហការជាមួយប្រទេសជិតខាង និងសម្រួលដល់ការធ្វើដំណើរ ក៏ដូចជាការធ្វើពាណិជ្ជកម្មរវាងប្រជាជន នៃប្រទេសទាំងពីរ ឱ្យមានភាពល្អប្រសើរលើគ្រប់ វិស័យ។
លោករដ្ឋលេខាធិការបានមានប្រសាសន៍ថា ដើម្បីធានាដល់ការសម្ពោធច្រកទ្វារព្រំដែនម៉ឺនជ័យ នាពេលខាងមុខនេះ ក្រសួមហាផ្ទៃ ក៏បានចាត់ឲ្យលោកសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ដឹកនាំគណៈប្រតិភូ ចុះទៅជួបពិភាក្សាការងារជាមួយភាគីវៀតណាម ចំនួន២លើកផងដែរ។ ដោយ៖ ឃួន លក្ខិណា
