ភ្នំពេញ ៖ បុរសម្នាក់ស្រវឹងស្រាបើករថយន្តដឹកដីក្នុងល្បឿនលឿនមកដល់ចំណុចផ្លូវកោងបួងចង្កូតមិនទាន់ជ្រុលទៅបុករថយន្តដឹកអេតចាយ រួចបន្តទៅបុករថយន្តឃ្លុបដឹកស្រាបៀរAnchorគាបតៃតុងជាប់ បង្កការភ្ញាក់ផ្អើលដល់ប្រជាពលរដ្ឋជួយគាស់ យកចេញកាលពីវេលាម៉ោង៤និង៤០នាទី រសៀលថ្ងៃទី៤ ខែកញ្ញា ឆ្នាំ២០២០ នៅចំណុចជិតទីលានប្រណាំងឡាន ស្ថិតក្នុងភូមិតាភេម សង្កាត់កំបូល ខណ្ឌកំបូល។

តាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តកូរ៉េដឹកអេតចាយ ពណ៌ខៀវ ពាក់ស្លាកលេខភ្នំពេញ2N-3675 បើកតាមបណ្តោយផ្លូវបេតុង ក្នុងទិសដៅពីជើង ទៅត្បូង ខណៈមកដល់ចំណុចកើតហេតុស្រាប់តែមានរថយន្តដឹកដីពណ៌ស ពាក់ស្លាកលេខកំពង់ចាម 3A-7710 បើកបរដោយបុរសម្នាក់ទាំងស្ថានភាពស្រវឹងធ្វើដំណើរក្នុងទិសដៅពីត្បូងទៅជើងក្នុងល្បឿនលឿនហើយពេលបើកដល់ផ្លូវកោងបួងចង្កូតមិនទាន់ក៏ជ្រុលទៅបុករថយន្តដឹកអេតចាយពេញទំហឹងបណ្តាលឱ្យមានការខូចខាត

បន្ទាប់មករថយន្តបង្កនៅមិនទាន់អស់ល្បឿនក៏បន្តទៅបុករថយន្តឃ្លុបដែលមានស្លាកយីហោស្រាបៀរAnchor ពាក់ស្លាកលេខភ្នំពេញ3D-1618 ដែលកំពុងធ្វើដំណើរបញ្ច្រាសទិសគ្នា ចំពីមុខពេញទំហឹង បណ្តាលឱ្យគាបតៃកុងជាប់តែត្រូវបានប្រជាពលរដ្ឋជួយគាស់ចេញបានគឺគ្រាន់តែរងរបួសស្រាលប៉ុណ្ណោះ។

ក្រោយពេលកើតហេតុសមត្ថកិច្ចបានឃាត់ម្ចាស់រថយន្តបង្កយកទៅសួនាំចំណែករថយន្តទាំង៣គ្រឿងត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌកំបូលរង់ចាំដោះស្រាយតាមច្បាប់៕ផេង ភាព

from： https://tnaot.com/km/m/detail/article/9660617