Sign In 
ខេត្តកំពង់ចាម ៖ គម្រោងដេញថ្លៃផ្លូវបេតុងចំនួន៦ឃុំ ក្នុងនោះ រួមមាន ជាលា ជើងព្រៃ ច្បារអំពៅ, តាំងក្រាំង, បាធាយ និងឃុំទំនប់ ដែលសរុបទឹកប្រាក់ក្នុងរង្វង់ចន្លោះពី៧០០ទៅ៨០០លានរៀល ត្រូវបានដាក់ឲ្យដេញថ្លៃកាលពីព្រឹកថ្ងៃទី៣ កញ្ញា ២០២០ នៅសាលប្រជុំសាលាស្រុកបាធាយ ។ ចំពោះលទ្ធផលនៃការដេញថ្លៃ គឺក្នុងគម្រោងទាំង៦ ត្រូវបានគេមើលឃើញចុះរហូតដល់ជិត៥០% ។ តម្លៃដែលដេញចុះប្រកួតប្រជែងច្រើនបែបនេះ ធ្វើឲ្យអាជ្ញាធរមានការព្រួយបារម្ភអាចនឹងត្រូវខ្វះគុណភាព។ កន្លងមកមានក្រុមហ៊ុនដែលធ្លាប់ដេញចុះច្រើនជាងនេះរហូត ដល់ខាតឡុងចុងចូលដើមជាច្រើនផងដែរ ឯគុណភាពអន់ដូចអាចម៍សេះ ។
សូមបញ្ជាក់ថា ១-ឃុំជាលាផ្លូវបេតុងប្រវែង០.២៤៣គមតម្លៃដាក់ឲ្យដេញថ្លៃជាង៩៨លានរៀលជាង ដោយដេញបានលើក្រុមហ៊ុនឆើត ឆេន ក្នុងតម្លៃជាង៥២លានរៀល។
២-ឃុំជើងព្រៃ ផ្លូវបេតុងប្រវែង០.២៥៤គម តម្លៃដាក់ឲ្យដេញថ្លៃជាង១២០លានរៀល បានទៅលើក្រុមហ៊ុនសំ ស៊ីវនស្ត្រាក់សិន ក្នុងតម្លៃជាង៦៦លានរៀល។ ៣- ឃុំច្បាអំពៅផ្លូវបេតុងប្រវែង០.២៤៧គម តម្លៃដាក់ឲ្យដេញថ្លៃជាង១០០លានរៀល បានទៅលើក្រុមហ៊ុនហាវ ហេង ក្នុងតម្លៃជាង៥៤លានរៀល។ ៤-ឃុំតាំងក្រាំងផ្លូវបេតុងប្រវែង០.២៨០គម តម្លៃដាក់ឲ្យដេញថ្លៃជាង១៥៩លានរៀល បានទៅលើក្រុមហ៊ុនយ៉េន ស៊ីនួនក្នុងតម្លៃ៨៣លានរៀល។ 
៥-ឃុំបាធាយផ្លូវបេតុងប្រវែង០.៤៥៧គម តម្លៃដាក់ឲ្យដេញថ្លៃជាង២២០លានរៀល បានទៅលើក្រុមហ៊ុនកៅ ប៊ុនណាក់ក្នុងតម្លៃ១១៤ លានរៀល។ ៦-ឃុំទំនប់ផ្លូវបេតុងប្រវែង០.២២៣គមតម្លៃដាក់ឲ្យដេញថ្លៃជាង១២ផលានរៀល បានទៅលើក្រុមហ៊ុនឆើត ឆេន ក្នុងតម្លៃជាង៥៥លានរៀល។
ចំពោះសណ្ដាប់ធ្នាប់នៃការដេញថ្លៃឃើញបានប្រព្រឹត្តទៅល្អគួរឲ្យកត់សម្គាល់មិនមានការប្រទាញប្រទង់គ្នានោះទេ។ លោកឡី ម៉ិច នាយករងរដ្ឋបាលសាលាខេត្តបានឲ្យដឹងថា ចំពោះក្រុមហ៊ុនដែលដេញថ្លៃបានទាំងប្រាំមួយឃុំខាងលើគឺបានផ្តិតមេដៃយល់ព្រមទទួលការសាងសង់ផ្លូវបេតុងនៅតាមឃុំនីមួយៗ ដោយក្នុងនោះអាចមានក្រុមហ៊ុនខ្លះ គេទិញថ្មបានក្នុងតម្លៃថោកឬក៏គេមានគ្រឿងចក្រដោយខ្លួនឯងទើបហ៊ានដាក់ដេញថ្លៃក្នុងតម្លៃបែបនេះ ។ ក្នុងពេលខាងមុខក្រុមហ៊ុនបានចុះស្ថាបនាផ្លូវបេតុងគឺមានក្រុមបច្ចេកទេសរបស់ឃុំនិងស្រុកចុះតាមដានពិនិត្យមើលការសាងសង់ដែលនឹងត្រូវធ្វើឡើងតាមសៀវភៅ ដែលបានចុះកិច្ចសន្យាពីលក្ខណៈបច្ចេកទេស។ ផ្តល់សិទ្ធដោយ៖កោះសន្តិភាព
