Sign In 
រាជធានីភ្នំពេញ ៖ តារាសម្តែងស្រីធ្លាប់មានឈ្មោះល្បីល្បាញ និងទទួលបានប្រជាប្រិយកាលពី១០ឆ្នាំមុន អ្នកនាង សឿន សុធារ៉ា បានធ្វើអោយមហាជនរបស់នាងមានការត្រេកអរជាខ្លាំង ក្រោយពីទទួលបានដំណឹងថា នាងនឹងត្រឡប់ចូលសិល្បៈវិញ បន្ទាប់ពីសម្រាកពីវិស័យសម្តែងរាំច្រៀងអស់មួយរយៈពេលយូរ ។
បន្ទាប់ពីប្រកាសប្រាប់មហាជនពីការឈានជើងចូលវិថីសិល្បៈវិញ មិនទាន់បានប៉ុន្មានផងពេលនេះតារាស្រីរូបនេះនឹងមានវត្តមានសារជាថ្មីជាមួយនឹងលោក អេនឌី តាមរយៈសាច់រឿងនៅក្នុងវីដេអូចម្រៀង ( MV ) ដែលនឹងត្រៀមចេញក្នុងពេលឆាប់ៗ ។ នេះបើយាងតាមការបង្ហោះរបស់លោក អែនឌី តាមរយៈបណ្តាញសង្គម Instagram។
យ៉ាងណាមិញនេះ មិនមែនជារឿងលំបាកសម្រាប់ សឿ សុធារ៉ា ដែលជាតារាស្រីពេញទៅដោយសមត្ថភាពស្រាប់ ក្នុងការចាប់បានឱកាសមាស ក្នុងរយៈពេលពេលដ៏ខ្ចីបែបនេះ ដោយនៅក្នុងនោះ រូបនាងក៏ទទួលបានការងារជាបន្តបន្ទាប់ផងដែរដូចជា ថតស្ប៉តសម្អាងការ និងចូលរួមថតរឿងនៅស្ថានីយទូរទស្សន៍មួយផងដែរ ។
បន្ទាប់ពីលឺដំណឹងមួយនេះរួចមកបានធ្វើអោយអ្នកគាំទ្ររបស់នាងមានការសប្បាយចិត្តជាខ្លាំង ពីព្រោះតែមហាជនខានឃើញការសម្តែងរបស់ សឿ សុធារ៉ា ជាយូរណាស់មកហើយ ស្ទើរតែធ្វើអោយមហាជនមួយចំនួនចង់ភ្លេចមុខរបស់អ្នកនាងទៅហើយ ។
គួរបញ្ជាក់ផងដែរថា ការបាត់មុខពីសិល្បៈរបស់អ្នកនាងសឿ សុធារ៉ា មួយរយៈកន្លងមកនេះបន្ទាប់ពីរូបនាងបានរៀបអាពាហ៍ពិពាហ៍សាងសុភមង្គលគ្រួសារជាមួយ លោក សាពូន មីដាដា តាមប្រពៃណីរួចរាល់ហើយនោះទើបធ្វើអោយរូបនាងបានសម្រេចចិត្តដកឃ្លាសិល្បៈ ។ ក៏ប៉ុន្តែក៏មានមតិមួយចំនួនលើកឡើងថា តើអ្នកនាងសឿ សុធារ៉ា អាចនឹងក្តោបបានភាពល្បីល្បាញឡើងវិញឬយ៉ាងណា ព្រោះកាលនៅលីវនាងល្បីខ្លាំង តែក្រោយរៀបការមានកូនមកក៏បាត់មុខពីសិល្បៈ និងមិនសូវល្បីខ្លាំងដូចកាលពីមុន ៕ ផ្តល់សិទ្ធិដោយ៖ កោះសន្តិភាព
