Sign In 
ខេត្តបន្ទាយមានជ័យ ៖ ដោយសារតែអង្ករបានក្លាយជាបាយទៅហើយ រឿងដោះដូរមណ្ឌលសុខភាពប៉ោយប៉ែត នៅក្រុងប៉ោយប៉ែត ធ្វើឱ្យមហាជន និយាយលែងចេញទៅហើយ ដែលពួកគេនិយាយជាទូទៅថា នៅសុខៗនាំគ្នាដូចត្រូវមន្តអាគម…នាំគ្នាសម្រេចយកឆ្នាំងមាសដូរយកឆ្នាំងដី ។ បើចាំមិនភ្លេចទេនៅឆ្នាំ២០១៩ ប្រភពមន្ត្រីសុខាភិបាលម្នាក់បង្ហើបប្រាប់កោះសន្តិភាពថា មណ្ឌលសុខភាពប៉ោយប៉ែត១ ត្រូវគេដោះដូរទៅ
កន្លែងថ្មីហើយ ផ្ទៃដីកន្លែងថ្មីនោះមានទំហំលើសបន្តិច ។ ខណៈគេអួតថា អគារមណ្ឌលសុខភាពថ្មីតាមគម្រោងមានកម្ពស់៤ជាន់ និងមានជណ្តើរយន្ត ព្រមទាំងបង្អាប់ថា ដោយសារទីតាំងចាស់រដូវភ្លៀងទឹកជ្រាបចូល ឯដំបូលក៏យ៉ាប់ទើបដូរទៅរកអាជណ្តើរយន្ត ។
យោងឯកសារខ្លះដែលកោះសន្តិភាពទទួលបានការអភិវឌ្ឍទីតាំងមណ្ឌលសុខភាពថ្មីនេះ គឺរាជរដ្ឋាភិបាលបានយល់ព្រមជាគោលការណ៍ឲ្យធ្វើការដោះដូរទីតាំងមណ្ឌលសុខភាពប៉ោយប៉ែត១ (បច្ចុប្បន្ន) ទំហំដី៤,០៧៥ម៉ែត្រការ៉េ ស្ថិតនៅភូមិក្បាលស្ពាន១ សង្កាត់ប៉ោយប៉ែតឲ្យទៅក្រុមហ៊ុនស៊ីនសានដុងអុីនធើរណេសិនណល អុិនវេសម៉ិនជាថ្នូរនឹងការអភិវឌ្ឍទីតាំងថ្មីជូនមណ្ឌលសុខភាពប៉ោយប៉ែតលើផ្ទៃដីទំហំ៦០ម៉ែត្រគុណនឹង៨០ម៉ែត្រ ស្មើនឹង៤.៨០០ម៉ែត្រការ៉េ មានកម្ពស់៤ជាន់ បំពាក់ដោយជណ្តើរយន្ត និងផ្សេងៗទៀតនៅភូមិផ្សារកណ្តាល សង្កាត់ផ្សារកណ្តាលស្ថិតនៅជាយក្រុងដាច់ស្រយាល ។
មានការអួតអាងថា ទីតាំងថ្មីមានលក្ខណៈប្រសើរជាងទីតាំងចាស់ ព្រោះមានទាំងអគារស្នាក់នៅរបស់មន្ត្រីសុខាភិបាល និងកន្លែងធ្វើការសមរម្យហើយកម្ពស់មានរហូត៤ជាន់ ជណ្តើរឡើងសុទ្ធតែហោះ ។ ប៉ុន្តែអ្នកស្រុកមួយចំនួនបានរអ៊ូរទាំថា ទីតាំងថ្មីមានចម្ងាយឆ្ងាយជិត៥គីឡូម៉ែត្រ ម្យ៉ាងតម្លៃដីខុសគ្នាកប់ពពក ព្រោះទីតាំងចាស់ ស្ថិតនៅជាប់ដងផ្លូវជាតិលេខ៥ ហើយជិតមាត់ច្រកទ្វារអន្តរជាតិប៉ោយប៉ែត ស្ថិតក្នុងទីប្រជុំជន ។ ឯទីតាំថ្មីនៅចុះពីផ្លូវជាតិ មិនមែនស្ថិតក្នុងសង្កាត់ផ្សារកណ្តាលដែលគេគិតថា ទៅនៅទីវាល
ល្វឹងល្វើយប្រៀបដូចកន្លែងវាលកប់ខ្មោចរកឈើមួយដើមគ្មានទេ ដែលគេនិយាយថា «ចិនដេញខ្មែរ ខ្មែរដេញខ្មោច» ។
លើសពីនេះទៀត ក្រោយការចេញផ្សាយលើគេហទំព័រកោះសន្តិភាព ស្រាប់តែមានអ្នកចូលខមិនដោយលើកពីប្រភពមន្ត្រីសុខាភិបាលនិយាយតាមតុកាហ្វេថា «គ្រាន់តែបុគ្គលិកពេទ្យ មេពេទ្យគេឲ្យឡាន១គ្រឿងៗម្នាក់ នៅមិនទាន់ដឹងថាឡានប្រភេទណានោះទេ» ។
យ៉ាងណាក៏ដោយពាក់ព័ន្ធប្រភពនានាពីពលរដ្ឋ និងអ្នកលើកឡើងតាមបណ្តាញសង្គមនេះកោះសន្តិភាពមិនអាចទាក់ទងសុំកាបំភ្លឺពីក្រុមហ៊ុនសុីនសានដុងអុិនធើរណេសិនណលអុិនវេសម៉ិនបានទេ ព្រោះពុំស្គាល់លេខទូរស័ព្ទ ។ គ្រាន់តែជាព័ត៌មានហោះហើរតាមខ្យល់ប៉ុណ្ណោះ ឯការពិតយ៉ាងណានោះនៅមិនទាន់ដឹងច្បាស់ទេ ដែលកោះសន្តិភាពកំពុងស្វែងរកប្រភពច្បាស់ការណ៍បន្តទៀត ។
លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្តប្រាប់តាមទូរស័ព្ទថាករណីខាងលើជារឿងរបស់អ្នកមុនពោលគឺលោកទើបឡើងជាប្រធានមន្ទីរនៅថ្ងៃទី៣ ខែឧសភា ២០២០ លោកមិនដឹងរឿងអ្វីទាំងអស់ ម្យ៉ាងករណីនេះមានចំណាពីថ្នាក់កំពូលរហូតដល់ក្រោមទៀតផង ។
ពាក់ព័ន្ធនឹងកាលើកឡើងតាមបណ្តាញសង្គមថា«បុគ្គលឹកពេទ្យនិងមេពេទ្យគេឲ្យរថយន្ត១គ្រឿងៗម្នាក់» លោកប្រធានមន្ទីរធ្វើការបដិសេធន៍ច្រានចោលកាចោទប្រកាន់នេះ ដោយលោកបញ្ជាក់ថាសូម្បី១០០រៀលក៏មិនពាក់ព័ន្ធដែរ ហើយបែរជាទទួលថ្មបាក់ ។
ជុំវិញព័ត៌មានដ៏រសើបបំផុតក្នុងករណីដោះដូរមណ្ឌលសុខភាពនៅក្រុងប៉ោយប៉ែត បើតាមប្រភពពីអ្នករកស៊ីផ្នែកវិស័យអចលនៈទ្រព្យ (ពុះដីល្វែងលក់)ម្នាក់នៅក្រុងប៉ោយប៉ែតសុំមិនបញ្ចេញឈ្មោះ ដែលកំពុងសោកស្តាយបំផុតនេះប្រាប់កោះសន្តិភាពថា ក្នុងសម័យចិនចូលស្រុក ដីឡើងថ្លៃកប់ពពក ដីជាប់ផ្លូវជាតិលេខ៥ និងក្បែរច្រកទ្វារអន្តរជាតិប៉ោយប៉ែតដូចទីតាំងមណ្ឌលសុខភាពនេះជាដើម មួយម៉ែត្រការ៉េតម្លៃ៣០០០ដុល្លារ ឬជាង៣០០០ដុល្លារ ។
ដោយឡែក ដីចំណុចផ្សារកណ្តាលម្តុំទីតាំងដោះដូរថ្មីក្នុងសម័យដីឡើងថ្លៃចិនចូលស្រុក១ម៉ែត្រការ៉េ តម្លៃ១២០ដុល្លារ ព្រោះម្តុំនោះក៏មានរោងចក្រ និងកំពុងបង្កើតរោងចក្រផ្សេងទៀតដែរ ។ ប្រភពដដែលថា ការដោះដូរដ៏រសើបនេះ បានធ្វើឡើង ចំពេលដីនៅក្រុងប៉ោយប៉ែតកំពុងមានហាងឆេងជាងមាសទៅទៀត មិនខុសពីគេយកឆ្នាំងមាសទៅដូរយកឆ្នាំងដីឡើយ ។
ចំណែកអ្នកដែលជាមេខ្យល់នាំឱ្យមានការដោះដូរនេះ សួរថា តើបានទទួលលាភសក្ការៈប៉ុន្មានដែរ ? ថ្ងៃណាមួយធ្លាយចេញមិនខានឡើយ ។ពេលណាមានព័ត៌មានប្លែកឬការបំភ្លឺពីក្រុមហ៊ុនដោះដូរ យើងនឹងផ្សាយជូនបន្តទៀត ព្រោះកោះសន្តិភាពពុំអាចសុំបំភ្លឺបានឡើយពីក្រុមហ៊ុននៅពេលនេះ ។ សង្ឃឹមថាក្រុមហ៊ុននឹងធ្វើការបំភ្លឺជូនមហាជនឱ្យអស់ការមន្ទិលជាទូទៅ មិនខានឡើយ ៕ ផ្តល់សិទ្ធដោយ៖កោះសន្តិភាព
