Sign In 
វិធានការធ្វើចក្តាឡីស័កលើពលរដ្ឋខ្មែរ និងជនបរទេសទើបត្រឡប់មកដល់កម្ពុជា ត្រូវរដ្ឋាភិបាល មន្ត្រីជំនាញក្រសួងសុខាភិបាល កំពុងអនុវត្តយ៉ាងតឹងរឹង ខណៈត្រឹម ២៤ម៉ោងម្សិលមិញ កម្ពុជាបានពិនិត្យសំណាកសរុបដល់ទៅ ៧០៣នាក់ ប៉ុន្តែមិនមានរកឃើញអ្នកផ្ទុកកូវីដ ១៩ ថ្មីម្នាក់ណាឡើង។
គិតត្រឹមព្រឹកថ្ងៃព្រហស្បត្តិ៍នេះ ចំនួនអ្នកឆ្លងកូវីដ ១៩ នៅកម្ពុជា ដែលស្ទើរតែទាំងអស់ជាករណីនាំចូលនោះ គឺមានសរុប ១៣០ ក្នុងនោះ ១២៨នាក់ បានជាសះស្បើយ ២នាក់សម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងគ្មានករណីស្លាប់នោះដែរ។
ស្ថានភាពជំងឺកូវីដ ១៩ ហាក់ធូរស្រាលខ្លាំងមួយរយៈចុងក្រោយនេះ អ្នកជំនាញកំពុងបង្ហាញក្តីបារម្ភខ្លាំង ជាក់ស្តែងនៅពេលពលរដ្ឋជាច្រើន បែរជាត្រឡប់ទៅរកសកម្មភាពប្រចាំថ្ងៃ ដំណើរកម្សាន្ត ក៏ដូចជាធ្វេសប្រហែស មិនពាក់ម៉ាស់ពេលចេញមកក្រៅជាដើម។
ដោយសង្កេតឃើញស្ថានភាពនេះ នាំឲ្យរដ្ឋាភិបាលអំពាវនាវរៀងរាល់ថ្ងៃទៅកាន់ពលរដ្ឋទូទាំងប្រទេស អនុវត្តវិធានការគម្លាតសង្គមឲ្យបានគ្រប់ៗគ្នា រាប់បញ្ចូលទាំងការពាក់ម៉ាស់ពេលចេញមកក្រៅ ធ្វើអនាម័យឲ្យបានខ្ជាប់ខ្ជួន ហើយបើមិនចាំបាច់ កុំចេញពីផ្ទះឲ្យសោះ៕ ដោយ៖ ត្នោត
