​នៅថ្ងៃអង្គារនេះ រដ្ឋាភិបាលថៃបានរាយការណ៍ថា ប្រទេសថៃមានករណីថ្មីនៃអ្នកឆ្លងមេរោគកូវីដ១៩ចំនួន ​ ៥ នាក់​ និងមិនមានអ្នកស្លាប់ថ្មីទេ នាំឱ្យអ្នកជំងឺសរុបនៅក្នុងប្រទេសកើនឡើងដល់ ៣ ៤១៧ នាក់​។

មជ្ឈមណ្ឌល​​រដ្ឋបាលគ្រប់គ្រងស្ថានភាព​មេរោគកូវីដ១៩ ​បានមានប្រសាសន៍​ថា ​អ្នកជំងឺថ្មីគឺជា​ស្ត្រីជនជាតិហ្វីលីពីនចំនួន ៣ នាក់ដែលជាគ្រូបង្រៀនភាសាអង់គ្លេស និងអនីតិជនជនជាតិបារាំងចំនួន ២ នាក់។

អ្នកជំងឺជនជាតិហ្វីលីពីនទាំងបីនាក់មានអាយុ ២៦ , ២៨ និង ៣៧ ឆ្នាំ ​បានមកដល់ប្រទេសថៃនៅថ្ងៃទី ២៥ ខែសីហា ព្រមទាំងធ្វើតេស្តវិជ្ជមាន​កូវីដ១៩ នៅថ្ងៃទី ២៨ ខែសីហា។ ​អ្នកជំងឺថ្មី ២ នា​ក់ទៀតគឺក្មេងប្រុសជនជាតិបារាំងអាយុ ៣ ឆ្នាំនិង​អាយុ ១៥ ឆ្នាំ ដែលពួកគេបានមកដល់ប្រទេសថៃនៅថ្ងៃទី ២៩ ខែសីហា ​និងធ្វើតេស្តវិជ្ជមានកូវីដ១៩នៅថ្ងៃដដែល។ គិតមកដល់ថ្ងៃនេះថៃមានអ្នកជំងឺសរុបចំនួន ៣ ៤១៧ នាក់ ដែលក្នុងនោះមាន​អ្នកជាសះស្បើយចំនួន ៣ ២៧៤ នាក់និងបន្សល់ទុកអ្នកជំងឺចំនួន ៨៥ នាក់​កំពុងសម្រាកព្យាបាលក្នុងមន្ទីរពេទ្យ ហើយអ្នកស្លាប់នៅរក្សាចំនួន​ ៥៨ នាក់ដដែលចាប់តាំងពីថ្ងៃទី ២ ខែមិថុនាមក។ ​

នៅទូទាំងពិភពលោកអ្នកជំងឺកូវីដ១៩បានកើនឡើងដល់ ២៥.៦៣ លាននាក់ និងមាន​អ្នកស្លាប់សរុបចំនួន​ ៨៥៤ ៧៤៧ នាក់។

សហរដ្ឋអាមេរិកមាន​អ្នកឆ្លងច្រើនជាងគេគឺ ៦.២១ លាននាក់ ​ហើយប្រទេសប្រេស៊ីលជាប់ចំណាត់ថ្នាក់លេខ ២ ដែលមានអ្នកជំងឺសរុបចំនួន ៣.៩១ លាននាក់ ​និងប្រទេសឥណ្ឌាឈរនៅលំដាប់ទី ៣ ដែលមានអ្នកជំងឺសរុបចំនួន ៣.៦៩ លាននាក់​៕

កែសម្រួលដោយ៖ ភារ៉ា

ប្រភព៖ bangkok post

from： https://tnaot.com/km/m/detail/article/9649811