Sign In 
ក្រុមហ៊ុន Amazon ស្ថិតក្នុងចំណោមក្រុមហ៊ុនដែលធំជាងគេលើលោក និងមានគោលការណ៍ដឹកនាំចំនួន ១៤ ដែលត្រូវបានអនុវត្តជារៀងរាល់ថ្ងៃ។ ប៉ុន្តែយោងទៅតាមលោកមហាសេដ្ឋី ជេហ្វ បេសូស (Jeff Bezos) ដែលជាស្ថាបនិករបស់ក្រុមហ៊ុន ព្រមទាំងជាបុរសដែលមានជាងគេលើលោក បានប្រាប់មកថា មានគោលការណ៍ដឹកនាំមួយដែលធ្វើឲ្យមនុស្សភ្ញាក់ផ្អើលជាងគេ។ គោលការណ៍នោះគឺ «ការធ្វើអ្វីឲ្យត្រូវ។»
លោកបេសូសបានចែករំលែកកាលពីឆ្នាំ ២០១៦ ថា «អ្នកមិនអាចត្រូវគ្រប់ពេលវេលាបានទេ ប៉ុន្តែខ្ញុំគិតថាប្រសិនបើមានការហ្វឹកហាត់ អ្នកនឹងអាចធ្វើត្រូវបានច្រើនជាងមុន។» លោកបានបន្តថា មនុស្សដែលធ្វើអ្វីត្រូវច្រើនជាមនុស្សដែលស្តាប់ច្រើន និងផ្លាស់ប្តូរគំនិតច្រើនផងដែរ។ ចំណុចនេះគឺមិនងាយស្រួលទេ ព្រោះមនុស្សភាគច្រើនចូលចិត្តរកព័ត៌មានមកគាំទ្រជំនឿរបស់ខ្លួន ខណៈដែលប្រឆាំងគំនិតដែលផ្ទុយពីគំនិតខ្លួន។ ប៉ុន្តែមនុស្សដែលធ្វើអ្វីត្រូវច្រើនមិនធ្វើដូច្នេះទេ។ លោកបេសូសបកស្រាយទៀតថា «មនុស្សដែលធ្វើត្រូវច្រើនព្យាយាមរកព័ត៌មានមកប្រឆាំងនឹងគំនិតដែលខ្លួនមាន ដែលជារឿងផ្ទុយពីធម្មជាតិរបស់មនុស្សលោក។» ការមានសមត្ថភាពក្នុងការមើលឃើញទស្សនៈខុសៗគ្នា និងយល់ពីរូបភាពធំ ច្រើនជាងការដាក់ចិត្តលើជំនឿរបស់ខ្លួននោះ អាចបង្កើនឱកាសជោគជ័យរបស់មនុស្សម្នាក់បាន។
លោកបេសូសបានបន្តទៀតថា «ជីវិតមានភាពស្មុគស្មាញ ហើយពិភពលោកក៏ស្មុគស្មាញដែរ។ ពេលខ្លះអ្នកទទួលបានទិន្នន័យថ្មី ហើយអ្នកផ្លាស់ប្តូរគំនិត ។ ពេលខ្លះទៀត អ្នកមិនទទួលបានទិន្នន័យថ្មីទេ ហើយអ្នកគ្រាន់តែវិភាគលើស្ថានការសាជាថ្មី មុននឹងប្រទះឃើញថាវាស្មុគស្មាញជាងការគិតដំបូងរបស់អ្នក ហើយអ្នកក៏ផ្លាស់ប្តូរគំនិត។»
លោកមហាសេដ្ឋីរ៉េយ ដាលីអូ (Ray Dalio) ក៏យល់ស្របនឹងគោលការណ៍មួយនេះដែរ។ លោកធ្លាប់បានចែករំលែកកាលពីឆ្នាំ ២០១៧ ថា «កំហុសឆ្គងធំជាងគេរបស់មនុស្សភាគច្រើនគឺពួកគេគិតថាការសម្រេចចិត្តត្រឹមត្រូវគឺចេញពីការគិតរបស់ពួកគេ ពួកគេមានទស្សនៈហើយពួកគេប្រកាន់ខ្ជាប់នឹងទស្សនៈរបស់ខ្លួន។» លោកបេសូសបានចែករំលែកទៀតថា «អ្នកមិនអាចសម្រេចបានអ្វីដែលសំខាន់ទេប្រសិនបើអ្នកមិនចចេះលើចក្ខុវិស័យរបស់ខ្លួន។ ប៉ុន្តែអ្នកត្រូវតែមានភាពបត់បែនទាក់ទិននឹងរឿងលម្អិតព្រោះអ្នកត្រូវតែរៀនធ្វើពិសោធន៍ដើម្បីសម្រេចបានអ្វីដែលសំខាន់ ហើយវាមានន័យថាអ្នកនឹងត្រូវខុសច្រើន។» ៕ ផ្ដល់សិទ្ធដោយ៖ កោះសន្តិភាព
