Sign In 
រយៈពេលចុងក្រោយនេះ កូរ៉េខាងជើងបានបង្ហាញសកម្មភាពជាច្រើនប្រឆាំងនឹងកូរ៉េខាងត្បូង បន្ទាប់ពីទីក្រុងសេអ៊ូលមិនអាចរារាំងក្រុមសកម្មជន នៅក្នុងប្រទេសរបស់ខ្លួនពីការបង្ហោះប៉េងប៉ោង នាំខិត្តប័ណ្ណ និង ស្បៀងអាហារចូលទៅកាន់ទឹកដីកូរ៉េខាងជើង។
ទោះជាយ៉ាងណា រហូតមកដល់ពេលនេះ កូរ៉េខាងជើងបានត្រៀមបង្ហោះខិត្តប័ណ្ណ១២លានសន្លឹក សម្រាប់បញ្ជូនទៅកាន់កូរ៉េខាងត្បូង។ ជាមួយគ្នានេះ កូរ៉េខាងជើងក៏បានដំឡើងឧបករណ៍បំពងសំឡេង នៅតាមខ្សែបន្ទាត់ព្រំដែនជាប់នឹងកូរ៉េខាងត្បូង ក្រោយពេលប្រទេសទាំងពីរបានសម្រេចដកចេញពីទីនោះ កាលពីឆ្នាំ២០១៨ តាមកិច្ចព្រមព្រៀង ក្រោយជួបពិភាក្សាគ្នា។
កូរ៉េខាងជើង បានរៀបចំឧបករណ៍បំពងសំឡេងជាច្រើន នៅតាមតំបន់ព្រំដែនគ្មានយោធា។ កាលពីឆ្នាំ២០១៨ កូរ៉េខាងជើងបានដោះឧបករណ៍ទាំងនោះចំនួន៤០កន្លែងចេញ ហើយឈប់ឃោសនា តាមកិច្ចព្រមព្រៀង។ 
មន្ត្រីជាន់ខ្ពស់ក្នុងជួរគណៈទីបញ្ជាការកម្លាំងទាហានកូរ៉េខាងត្បូង បានឲ្យដឹងថា «យើងបានតាមដានយ៉ាងយកចិត្តទុកដាក់បំផុត រាល់សកម្មភាពប្រែប្រួលរបស់កូរ៉េខាងជើង ក្នុងការធ្វើសង្គ្រាមចិត្តសាស្ត្រ ។ កូរ៉េខាងត្បូង បានត្រៀមលក្ខណៈរួចរាល់ហើយ ដើម្បីទប់ទល់រាល់ស្ថានភាពអាក្រក់ដែលអាចកើតឡើង៕ ប្រែសម្រួលដោយ៖ MEO
