Sign In 
សោកនាដកម្មមួយបានកើតឡើងកាលពីថ្ងៃទី២៩ ខែសីហា ឆ្នាំ ២០២០ ក្នុងហេតុការណ៍បាក់រលំអគារមួយដែលមានភោជនីយដ្ឋានមួយ បណ្ដាលឲ្យមនុស្សបាត់បង់ជីវិតយ៉ាងតិច១៧នាក់ ដោយពួកអ្នកជួយសង្គ្រោះបន្តរុករកប៉ុនប៉ងជួយមនុស្សដែលអាចនៅជាប់ក្រោមគំនរបាក់បែក ។
ហេតុការណ៍នេះកើតឡើងកាលពីវេលាម៉ោង៩និង៤០នាទីម៉ោងក្នុងស្រុក នៅក្រុង XIANGFEN ខេត្តសាន់ស៊ីភាគខាងជើងប្រទេស។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានចិនស៊ីនហួ ដែលដកស្រង់ប្រភពពីអាជ្ញាធរ។ មកដល់ពេលល្ងាចមនុស្ស៤៥នាក់ ត្រូវបានទាញយកចេញពីគំនរបាក់បែក ក្នុងនោះ១៧នាក់បាត់បង់ជីវិត និង៧នាក់របួសធ្ងន់។
បណ្ដាវីដេអូចេញផ្សាយដោយទូរទស្សន៍រដ្ឋ CCTV បង្ហាញសកម្មភាពអ្នកពន្លត់ភ្លើង និងកងយោធាព្រមទាំងប្រជាជន កំពុងតែរើកកាយគំនរបាក់បែក។ អគារនោះមាន២ជាន់ គឺជាន់ផ្ទាល់ដី និងជាន់ទី១។ 
បណ្ដារូបភាពបង្ហាញអគារនោះបាក់ធ្លាក់ចំកណ្ដាលភោជនីយដ្ឋាន។ ចំពោះមូលហេតុនៃការបាក់អគារនេះ នៅពុំទាន់ដឹងនៅឡើយទេ៕ ដោយ៖ ត្នោត
