ភ្នំពេញ៖ ករណីគ្រោះថ្នាក់ចរាចរណ៍មួយកើតឡើងរវាងរថយន្តម៉ាកហ៊ីយ៉ាន់ដាយ និងម៉ូតូម៉ាកស្កុបពីអាយ ត្រង់ចំណុចខាងកើតបុរី ប៊ុន លី លើផ្លូវបេតុងបឹងតាម៉ាត បណ្តាលឲ្យស្លាប់ម្នាក់ និងម្នាក់ទៀតរងរបួសធ្ងន់កំពុងសម្រាកព្យាបាលនៅមន្ទីរពេទ្យសួគ៌ា។

ហេតុការណ៍នេះបានកើតឡើងកាលពីវេលាម៉ោង ១១យប់ ថ្ងៃទី២៩ ខែសីហា ឆ្នាំ២០២០ ត្រង់ចំណុចខាងកើតបុរី ប៊ុន លី លើផ្លូវបេតុងបឹងតាម៉ាត ស្ថិតក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។

តាមប្រភពព័ត៌មានបានឲ្យដឹងថា មុនពេលកើតហេតុ គេឃើញ រថយន្តម៉ាក HYUNDAI ពណ៌ខៀវ ពាក់ផ្លាកលេខ ភ្នំពេញ 3E-5106 បើកបរដោយឈ្មោះ អេង សុហាន ភេទប្រុស អាយុ៣០ឆ្នាំ មុខរបរ បើកបររថយន្ត មានទីលំនៅភូមិកំព្រៅ ឃុំព្នៅទី១ ស្រុកសុីធរកណ្តាល ខេត្តព្រៃវែង ពុំមានរងរបួសឃាត់ខ្លួន ដោយធ្វើដំណើរក្នុងទិសដៅពីកើតទៅលិច លុះមកដល់ចំណុចកើតហេតុខាងលើក៍ទៅបុកម៉ូតូមួយគ្រឿងម៉ាក HONDA SCOOPY I ពណ៌ក្រហម ពាក់ផ្លាកលេខ ភ្នំពេញ 1GO-5106 បើកបរដោយឈ្មោះ ទិត្យ ពណ្ណរាយណ៍ ភេទប្រុស អាយុ១៩ឆ្នាំ មុខរបរ សិស្ស មានទីលំនូវភូមិសាមគ្គី សង្កាត់ផ្សារដេប៉ូ២ ខណ្ឌទួលគោក រាជធានីភ្នំពេញ ស្លាប់នៅកន្លែងកើតហេតុ(អត់ពាក់មួក) និងអ្នករួមដំណើរពីក្រោយឈ្មោះ ទិត្យ ចាន់សត្យា ភេទប្រុស អាយុុ២០ឆ្នាំ មុខរបរ សិស្ស មានទីលំនៅភូមិសន្សំកុសល សង្កាត់បឹងទំពុន ខណ្ឌមានជ័យ រាជធានីភ្នំពេញ រងរបួសធ្ងន់សំរាកព្យាបាលនៅគ្លីនិកឯកជនសួគ៌ា (អត់ពាក់មួក) ដែលធ្វើដំណើរក្នុងទិសដៅបញ្ច្រាស់ទិសគ្នាពីលិចទៅកើតចំពីមុខពេញទំហឹង បណ្តាលអោយបោកអូសដួលតែម្តង ស្លាប់ម្នាក់ របួសធ្ងន់ម្នាក់តែម្តង ហើយករណីនេះបណ្តាលមកពីភាគីរថយន្ត បើកបរមិនប្រកាន់ចំណែកផ្លូវរបស់ខ្លួន។ 

 ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ជំនាញ ធ្វើការវាស់វែងយកវត្ថុតាង ប្រគល់ឲ្យការិយាល័យចរាចរណ៍ផ្លូវគោករាជធានីភ្នំពេញ ដើម្បីរង់ចាំដោះស្រាយគ្នាតាមច្បាប់ ។ ចំណែកសពប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕ដោយ÷ សួង សាម

from： https://tnaot.com/km/m/detail/article/9641773