Sign In 
រថយន្តម៉ាសស្តាមួយគ្រឿង ស៊ីផ្លេវ៉ាជែងជាមួយរថយន្តរ៉េងរ៉ូវើរមួយគ្រឿងទៀត ធ្វើឲ្យម្ចាស់រថយន្តរ៉េងរ៉ូវើរ ខឹងក៏ដេញតាមដល់មុខផ្ទះកាក់រថយន្តម៉ាសស្តា រួចចុះមកវាយរថយន្តម៉ាសស្តា បង្កជាហិង្សា និងផ្ទុះអាវុធចំនួន២គ្រាប់ទៀតផង បង្កឱ្យមានការភ្ញាក់ផ្អើលដល់សមត្ថកិច្ចកាលពីម៉ោង១២និង៥០នាទីរំលងអធ្រាត្រឈានចូលថ្ងៃទី៣០ ខែសីហា ឆ្នាំ២០២០ ស្ថិតនៅតាមបណ្តោយផ្លូវ២៧៦ សង្កាត់ទួលស្វាយព្រៃទី១ ខណ្ឌបឹងកេងកង ។
តាមប្រភពពីកន្លែងកើតហេតុបានឲ្យដឹងថា មុនកើតហេតុ គេឃើញរថយន្តម៉ាក ម៉ាសស្តារ ពណ៌ក្រហម ពាក់ស្លាកលេខភ្នំពេញ 2AA-5551 បើកបរដោយបុរសម្នាក់ រួមដំណើរជាមួយមិត្តភក្តិ លុះពេលបើកតាមបណ្តោយផ្លូវ២៧៦ ក៏បានស៊ីផ្លេវ៉ាជែងរថយន្តរ៉េងរ៉ូវើ ពណ៌ខ្មៅ ពាក់ស្លាកលេខភ្នំពេញ 2Y-7667 ជិះដោយបុរស២នាក់រួមដំណើរជាមួយនារីម្នាក់ទៀត ធ្វើឲ្យខាងភាគីរថយន្តរ៉េងរ៉ូវើនោះខឹង ក៏បើកដេញតាមរហូតដល់មុខផ្ទះរថយន្តម៉ាសស្តាតែម្តង ស្រាប់តែខាងភាគីរថយន្តរ៉េងរ៉ូវើ បានចុះមកវាយក្បាលរថយន្ត រួចស្រែកថា «លោកឯងបើកប្រញ៉ាប់ទៅណា» ។
ប្រភពដដែលបន្តថា លុះក្រោយមកក៏ទាស់ពាក្យសំដីគ្នា ធ្វើឲ្យភាគីខាងរថយន្តម៉ាសស្តា និងមិត្តភក្តិដែលកំពុងនៅជុំគ្នានៅមុខផ្ទះនោះ ក៏បានមកប្រវាយប្រតប់គ្នាធ្វើឲ្យបុរសម្នាក់ទៀតដែលបើករថយន្តរ៉េងរ៉ូវើរខាងលើ បានដកកាំភ្លើងខ្លីមួយដើម រួចមកបាញ់ឡើងលើចំនួន២គ្រាប់តែម្តង ។ 
ដោយគាត់បានបញ្ជាក់ប្រាប់ថា ការបាញ់នោះគឺការពារខ្លួន ទើបបង្កឱ្យមានការភ្ញាក់ផ្អើលដល់សមត្ថកិច្ច និងកម្លាំងកងរាជអាវុធហត្ថចុះមកដល់កន្លែងកើតហេតុភា្លមៗផងដែរ ។ ក្រោយពេលកើតហេតុ សមត្ថកិច្ចជំនាញបានចុះមកដល់ទីតាំងកើតហេតុ រួចយករថយន្តទាំង២គ្រឿង និងហៅភាគីទាំង២ ទៅសួរនាំបន្តទៀតនៅអធិការដ្ឋាននគរបាលខណ្ឌបឹងកេងកង ៕ ផ្ដល់សិទ្ធដោយ៖ កោះសន្តិភាព
