Sign In 
ក្រុមប្រឹក្សាជាតិភាសាខ្មែរចង់ឲ្យឯកភាពគ្នា លើការសរសេរឈ្មោះខេត្ត និងទីតាំងជាអក្សរឡាតាំង
រាជធានីភ្នំពេញ ៖ក្នុងបំណងស្វែងរកការឯកភាពគ្នាក្នុងការសរសេរអក្សរឡាតាំងលើឈ្មោះខេត្ត និងទីតាំងសាធារណៈនានា ក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជាបានរៀបចំកិច្ចពិភាក្សាតុមូលស្តីពី «បទពិសោធន៍ និងបញ្ហាគោលការណ៍ក្នុងការប្រើប្រាស់អក្សរឡាតាំង សម្រាប់កត់សូរភាសាខ្មែរ ករណីអសាធារនាម» ។ កិច្ចពិភាក្សានោះកាលពីពេល ថ្មីៗកន្លងមកនៅរាជបណ្ឌិត្យសភាកម្ពុជា ។
រាជបណ្ឌិត្យសភាកម្ពុជាផ្សាយថាដោយបានពិនិត្យមើលឃើញថា ក្នុងពេលកន្លងមក ការប្រើអក្សរឡាតាំងក្នុងការសរសេរអសាធារណនាមខ្មែរមិនទាន់មានការឯកភាពគ្នានៅឡើយ ហេតុនេះក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជាបានសម្រេចរៀបចំកិច្ចពិភាក្សាតុមូលស្តីពី «បទពិសោធន៍ និងបញ្ហាគោលការណ៍ក្នុងការប្រើប្រាស់អក្សរឡាតាំង សម្រាប់កត់សូរភាសាខ្មែរ ករណីអសាធារនាម» ដើម្បីស្វែងរកមតិយោបល់និងអនុសាសន៍ពីអ្នកចូលរួម ជាពិសេសក្រសួងស្ថាប័នពាក់ព័ន្ធនានានឹងការប្រើប្រាស់អក្សរឡាតាំងសម្រាប់សរសេរអសារណនាម ដើម្បីពង្រីកគំនិត និងទស្សនៈក្នុងការកែលម្អ និងសម្រេចបាននូវគោលការណ៍រួមមួយសម្រាប់ខែ្មរ ។
នៅកិច្ចពិភាក្សាតុមូលដែលបានប្រារព្ធរៀបចំឡើងនៅក្នុងសាលមរតកសិល្បៈខ្មែរ ឯកឧត្តមបណ្ឌិតហ៊ាន សុខុម ប្រធានក្រុមប្រឹក្សាជាតិភាសាខ្មែរបានថ្លែងថា ក្នុងសម័យសាកលភាវូបនីយកម្ម ការប្រើប្រាស់អក្សរឡាតាំងសម្រាប់សរសេរអសាធារណនាមខ្មែរមានភាពចាំបាច់ ។ ក្នុងជីវភាពប្រចាំថ្ងៃ ការប្រើប្រាស់ឈ្មោះជាអក្សរឡាតាំងក៏ចាំបាច់ណាស់ដែរ ក្នុងការធ្វើលិខិតអត្រានុកូលដ្ឋាន លិខិតឆ្លងដែនជាដើម ។ ម្យ៉ាងទៀតតម្រូវការសរសេរឈ្មោះខេត្ត ស្រុក ឃុំ ភូមិ ផ្លូវ ទីកន្លែង ប្រាសាទ ឧទ្យាន ជាអក្សរឡាតាំងក៏មានភាពចាំបាច់ដូចគ្នា ។
ឯកឧត្តមបណ្ឌិតហ៊ាន សុខុម បានលើកឡើងបន្ថែមថា៖«កន្លងមកការប្រើអក្សរឡាតាំងក្នុងការសរសេរអសាធារណនាមខ្មែរ មិនទាន់មានឯកភាពគ្នានៅឡើយទេ។ ចំពោះការកត់សូរឈ្មោះខេត្តតាកែវ មានសំណេរដោយប្រើអក្សរឡាតាំងច្រើនបែប «Takeo» «Takaev» និង «Takev» រីឯឈ្មោះខេត្តក្រចេះ មានសំណេរដោយប្រើអក្សរឡាតាំង«Kratie» និង «Krachech» ។ ហេតុនេះកិច្ចពិភាក្សាតុមូលនេះ នឹងបង្ហាញដល់សាធារណជនអំពីប្រវត្តិ ទំនោរ និងបទពិសោធន៍របស់អ្នកប្រើប្រាស់ក្នុងការប្រើអក្សរឡាតាំង សម្រាប់សរសេរអសាធារណនាម និងសំណើដំណោះស្រាយរបស់ក្រុមប្រឹក្សាជាតិភាសាខ្មែរ ។
បន្ទាប់ពីកិច្ចពិភាក្សានេះ ឯកឧត្តមបណ្ឌិត ហ៊ាន សុខុម រំពឹងជឿជាក់ថា នឹងទទួលបានមតិយោបល់ និងអនុសាសន៍ពីអ្នកចូលរួម ជាពិសេសក្រសួងស្ថាប័ន ពាក់ព័ន្ធនឹងការប្រើប្រាស់អក្សរឡាតាំង សម្រាប់សរសេរអសាធារណនាមដើម្បីពង្រីកគំនិត និងទស្សនៈក្នុងការកែលម្អ និងសម្រេចបាននូវគោលការណ៍រួមមួយសម្រាប់ជនជាតិខ្មែរ ដែលជាម្ចាស់ភាសាអាចទទួលយកបានដោយសុទ្ធចិត្ត ។
ចូលរួមកិច្ចពិភាក្សាតុមូលប្រមាណ១០០នាក់ រួមមាន ប្រធានក្រុមប្រឹក្សាជាតិភាសាខ្មែរ មន្ត្រីរាជបណ្ឌិត្យសភាកម្ពុជា វាគ្មិនមកពីក្រសួងពាក់ព័ន្ធ ក្រសួងអប់រំ, ក្រសួងផែនការ និងក្រសួងរៀបចំដែនដី នគរូបនីយកម្ម និងសំណង់ រួមទាំងមន្ត្រីស្រាវជ្រាវ និងនិស្សិត ៕ ផ្តល់សិទ្ធិដោយ៖ កោះសន្តិភាព
