Sign In 
រាជធានីភ្នំពេញ ៖ មិនមែនជាលើកទី១ទេ ដែលកីឡាការិនី អេ យ៉ានុត កូនស្រីរបស់លោក អេ ភូថង ប្រកាសថា លាឈប់ពីប្រដាល់ ឬអាជីពកីឡាគ្រប់ប្រភេទ ។ ប៉ុន្តែការប្រកាសទាំងនោះ រមែងរសាយវិញ ដោយសារតែហេតុផលនាងចង់បានលុយដើម្បីចំណាយផ្ទាល់ខ្លួន ។ យ៉ាងណាមិញ ម្ដាយរបស់នាងបានអះអាងថា នៅក្នុងពេលនេះ អេ យ៉ានុត ចាប់ផ្ដើមនឿយណាយនឹងការប្រដាល់ ឬកីឡាមែនទែនហើយ ដោយសារតែពេញវ័យផង ហើយមានលទ្ធភាពដើម្បីដកខ្លួនផង។
អ្នកស្រី សាំង សុម៉ាលី ភរិយា លោក អេ ភូថង បានថ្លែងប្រាប់ថា កូនស្រីរបស់អ្នកស្រី អេ យ៉ានុត បានប្រាប់អ្នកស្រីពីរបីដងហើយ ថាលែងចង់ប្រកួត ។ អ្នកស្រីថា យ៉ានុត ខានហ្វឹកហាត់មួយរយៈធំមកហើយ ហើយមើលទៅក៏ចាប់ផ្ដើមលែងចង់នៅក្នុងវិស័យប្រដាល់ ឬវ៉ូវីណាមទៀតដែរ ។ អ្នកស្រីថា អេ យ៉ានុត កំពុងស្វែងយល់ពីមុខរបរលក់តែមេអំបៅ ដោយនាងក៏ត្រៀមបើកលក់តែមេអំបៅ ជំនួសឱ្យកីឡាផងដែរ ។ គាប់ជួនជាការសម្រេចចិត្តគ្រប់យ៉ាង លើវិស័យកីឡា ឬរឿងរ៉ាវផ្ទាល់ខ្លួន ទើបអ្នកស្រីថា បើនាងនឿយហត់ចង់ឈប់ហើយ គឺគ្មានអ្នកណាជំរុញកើតទេ។
អ្នកស្រីនិយាយថា «មើលទៅបែបឈប់ហើយ ព្រោះអានុតខានហាត់យូរហើយ បើចូលហាត់ម្ដងទៀតក៏ចំណាយពេលយូរដែរ អ៊ីចឹងមើលទៅលើកនេះ គាត់អាចឈប់មែនទែន ដោយសារទី១គាត់ជិតរៀបការផង និង ទី២គឺគាត់កំពុងរវល់នឹងមុខរបរលក់តែមេអំបៅ ដែលត្រៀមដំណើរការផង»។ អ្នកស្រីថា ក្រោយរៀនចប់ថ្នាក់ទី១២អេ យ៉ានុត អត់មានរៀនតអ្វីទេ ដែលនោះគឺជាការសម្រេចចិត្តរបស់នាង គឺមិនមែនដោយសារតែគ្រួសារមិនមានលទ្ធភាពឱ្យរៀននោះទេ ដោយសារនាងក៏មានអ្នករាប់អានមួយចំនួនជួយស្ពុនស័រ ។
អ្នកស្រីថា«កូនខ្ញុំមួយហ្នឹង អ្វីៗគឺគាត់សម្រេចខ្លួនឯង អ៊ីចឹងរឿងឈប់ក៏គាត់ រឿងបន្តក៏គាត់ តែបើតាមមើលបែបឈប់មែនទែនហើយលើកនេះ ដោយសារគាត់ចង់រកស៊ី ហើយមិនដែលឃើញមកកន្លែងហ្វឹកហាត់សោះ»។ អ្នកស្រីថា សូម្បីតែមង្គលការ ក៏កូនស្រីជាអ្នកសម្រេចថាធ្វើក្នុងពេលណានោះដែរ ដោយអ្នកស្រី និងស្វាមី បានត្រឹមតែជាអ្នករៀបចំឱ្យប៉ុណ្ណោះ គឺមិនមែនអាងថាជាឪពុកជាម្ដាយ ហើយដាក់សម្ពាធដល់កូនស្រីនោះទេ ។
អ្នកស្រីថា យ៉ានុត សមល្មមនឹងឈប់ពីកីឡាហើយ បើទោះជាអនាគតស្វាមីនាងមិនមានការហាមឃាត់ក្ដី ។ អ្នកស្រីពោលថា«និយាយការពិតគ្រួសារខ្ញុំ អត់ដែលចង់ឱ្យយ៉ានុតចូលកីឡាទេ ប៉ុន្តែដោយសារតែគាត់ចង់បានលុយខ្លួនគាត់ ទើបកន្លងមកគាត់ឡើងវ៉ៃ ប៉ុន្តែកាលយាយរបស់គាត់នៅរស់ គាត់ខឹងណាស់ ដែលមានកូនស្រីតែមួយឱ្យកូនឡើងវ៉ៃ ដោយវ៉ៃចប់ម្ដងៗ គឺក្រៅពីឈឺខ្លួន របួសនេះរបួសនោះ អ៊ីចឹងហើយទើបការលាឈប់លើកនេះ បើគាត់ឈប់មែន ក៏ខ្ញុំសប្បាយចិត្ត»។
យ៉ាងណាមិញអ្នកស្រីថា អេ យ៉ានុត ពេលខ្លះ ក៏មិនសូវច្បាស់លាស់ដែរ ពោលគឺឱ្យតែឮថាការប្រកួតណាបានលុយច្រើន ក៏អាចទទួលប្រកួតផងដែរ លើកលែងតែមុខរបរថ្មីដែលនាងគ្រោងដំណើរការហើយតម្រូវឱ្យនាងឡើងប្រកួតយកលុយមកផ្គត់ផ្គង់តម្រូវការណាមួយ ។ អ្នកស្រីថា បើមុខរបរតែមេអំបៅ កាក់កប គឺប្រាកដជាឈប់ប្រដាល់មែនហើយ ។ អ្នកស្រីក៏បញ្ជាក់ផងដែរថា មុខរបរដែល យ៉ានុត គ្រោងបើកនោះ គឺបើកជាតូបប៉ុណ្ណោះ ហើយក៏ស្ថិតក្នុងការព្រាងទុកប៉ុណ្ណោះ ដោយមិនទាន់ដឹងថា បើករួចពេលណានោះទេ។
គួរបញ្ជាក់ផងដែរថា អេ យ៉ានុត បើទោះជាកន្លងមកមើលទៅមានទីផ្សារចេញប្រកួតទាំងក្នុង និងក្រៅស្រុកញឹញាប់ ប៉ុន្តែចំណូលពីអាជីពប្រដាល់ មិនអាចឱ្យនាងរស់កើតនោះទេ។ សព្វថ្ងៃកញ្ញាពឹងមួយផ្នែកលើចំណូលពីការបង្ហាត់សិស្សជាមួយម្ដាយ និងលោកឪពុកប៉ុណ្ណោះ ខណៈដែលនាងក៏រស់ក្រោមបន្ទុកឪពុកម្ដាយនៅឡើយ ថ្វីដ្បិតឱកាសបានចេញប្រកួតម្ដងៗ ជួយឱ្យនាងទទួលបានទឹកប្រាក់លើកទឹកចិត្តច្រើនក្តី ។ នោះគឺដោយសារតែការប្រដាល់ក្នុងស្រុក គឺស្ទើរមិនមានតែម្ដង ដោយរង់ចាំតែឱកាសចេញប្រកួតតំណាងជាតិ ឬប្រដាល់ដាក់ទ្រុង ដែលមួយឆ្នាំអាចមានតែម្ដង ឬពីរដង។
អេ យ៉ានុត គឺជាកីឡាការិនីជម្រើសជាតិផ្នែកប្រដាល់សាកល ដែលមានឱកាសស្នងប្រដាល់ពីឪពុក ដោយសារតែទេពកោសល្យ និងក្ដីស្រឡាញ់ ។ នាងធ្លាប់បង្ហាញមុខលើឆាកអន្តរជាតិជាច្រើនលើកមកហើយ ដោយមិនរាប់បញ្ចូលការហ្វឹកហាត់នៅក្រៅប្រទេសនោះផង។
ប្រទេសដែលនាងធ្លាប់ទៅប្រកួតរួមមាន ចិន ថៃ ភូមា វៀតណាម និងមានសមត្ថភាពក្នុងការបង្វឹកផ្នែកប្រដាល់ និងផ្នែកល្បុក្កតោផងដែរ ។ ជាមួយនឹងចំណូលប្រដាល់មិនសូវកាក់កប ទើបម្ដងម្កាលនាងតែងប្រកាសលាឈប់ ប៉ុន្តែបណ្ដាលមកពីនាងនៅសិក្សាមិនទាន់មានលទ្ធភាពរកការងារផ្សេងនៅឡើយ ទើបនាងនៅតែលឹបល ។
អេ យ៉ានុត បញ្ជាក់ថា ក្រោយពេលរៀបការ និងរៀនចប់វិទ្យាល័យ នាងនឹងពិចារណាបង្កើតមុខរបរមួយជំនួសឱ្យអាជីពនេះ ដោយសារតែទីផ្សារប្រដាល់នារី មិនអាចពឹងបានឱ្យកក់ក្ដៅ ។ នាងអាចនឹងគិតគូរមង្គលការនៅក្រោយបាក់ឌុប ដែលអាចរង្វង់ឆ្នាំ២០២២ ឬមុនក្រោយនោះ ដោយមិនទាន់ច្បាស់លាស់នៅឡើយទេ ពោលគឺអាស្រ័យលើការបញ្ចប់នៃកូវីដ-១៩ បន្ទាប់ពីសម្រេចចិត្តភ្ជាប់ពាក្យជាមួយគូដណ្ដឹងឈ្មោះ លៀប ប៉ហេង កាលពីថ្ងៃទី៩ កក្កដា ឆ្នាំ២០២០ ។ គូដណ្ដឹងរបស់នាង ត្រូវបានគេអះអាងថា គឺជាមន្ត្រីបម្រើការនៅក្នុងក្របខណ្ឌមន្ត្រីនគរបាលជាតិ តែនៅមិនទាន់មានការបង្ហើបថា មានតួនាទីជាអ្វីនៅឡើយទេ ដោយគ្រាន់តែមានការបង្ហើបថា គឺជាកូនអ្នកមានមុខមាត់ម្នាក់ដែរនៅក្នុងជួរមន្ត្រីរាជការ។
នាងធ្លាប់ទាំងបានបញ្ជាក់ថា បើកុំតែមានឈ្មោះជាកីឡាការិនីជម្រើសជាតិ ហើយនៅស្ដាយកេរ្តិ៍ឈ្មោះ ប្រហែលជាបោះបង់យូរហើយ ដោយមិនអាចតស៊ូមកដល់ពេលនេះទេ បើតាមតែការប្រដាល់នារី មិនអាចរកចំណូលបានសមរម្យ ។ អេ យ៉ានុត នៅតែជាកីឡាការិនីជម្រើសជាតិ ដោយនាងត្រួវបានបញ្ជូនតំណាងប្រទេសជារឿយៗ បើទោះមិនទាន់បានមេដាយមាសពីអន្តរជាតិនៅឡើយក្ដី៕ ផ្តល់សិទ្ធិដោយ៖ កោះសន្តិភាព
