ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវឱ្យសិស្ស និងនិស្សិត ដែលកំពុងស្វែងរកការងារធ្វើ នៅខេត្តកំពង់ធំ កុំភ្លេចត្រៀមប្រវត្តិរូបសង្ខេបឬ CV សរសេរជាភាសារអង់គ្លេស ដើម្បីចូលរួមដាក់ពាក្យផ្ទាល់ និងសម្ភាសជាមួយអ្នកតំណាងក្រុមហ៊ុនធំៗទាំង៣ពាន់កន្លែង ដែលស្ថិតនៅបរិវេណវិទ្យាស្ថានពហុបច្ចេកទេសខេត្តកំពង់ធំ។

កម្មវិធីផ្តល់ឱកាសការងារនេះ នឹងរៀបចំធ្វើនៅសង្កាត់អាចារ្យលាក់ ក្រុងស្ទឹងសែន ចាប់ពីម៉ោង៨:០០ព្រឹក-១៦:៣០ល្ងាច។

វេទិកាការងារ នៅក្នុងខេត្តកំពង់ធំនេះ គឺបានរៀបចំដោយទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ដោយមានការចូលរួមឧបត្ថម្ភគាំទ្រ ពីទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) ព្រមទាំងអង្គការអន្តរជាតិខាងការងារ (ILO)។

ជាមួយគ្នានេះ ឱកាសការងារចំនួន ៣៣៤៦កន្លែង ពីក្រុមហ៊ុនធំៗចំនួន១០ ត្រូវផ្តល់ជូនដល់សិស្ស និស្សិត យុវជន អ្នកស្វែងរកការងារ នៅក្នុងខេត្តកំពង់ធំ និងបណ្តាខេត្តមួយចំនួនទៀត ដែលនៅក្បែរៗ នេះ នៅក្នុងបរិវេណវិទ្យាស្ថានពហុបច្ចេកទេសខេត្តកំពង់ធំ។

ចំពោះក្រុមហ៊ុនធំៗទាំង១០ ដែលបានចូលរួមក្នុងវេទិកាការងារដើម្បីជ្រើសរើសបុគ្គលិកនោះរួមមាន៖ ធនាគារកាណាឌីយ៉ាសាខាខេត្តកំពង់ធំ, ក្រុមហ៊ុនធានារ៉ាប់រងហ្វតេខេមបូឌា, អង្គការក្រុមការងារ កម្ពុជាសម្រាប់ការអប់រំកម្ពុជា, សុខសាន្តដីឡូតិ៍ និងលំនៅដ្ឋាន, ធនាគារព្រីនស៍, វិទ្យាស្ថាន ពហុបច្ចេក ទេសខេត្តកំពង់ធំ, ក្រុមហ៊ុន Thadi , គ្រឹះស្ថានមីក្រូហិរញ្ញវត្ថុ មហានគរ ម.ក, មជ្ឈមណ្ឌលយុវជន និងអង្គការ វីអេស អូ (VSO)។

គិតត្រឹមពេលព្រឹកនេះ មានអ្នកចូលរួមដាក់ពាក្យផ្ទាល់នៅក្នុងវេទិការការងារនេះមានចំនួន ២៨៨នាក់ក្នុងនោះស្រី២៣០នាក់៕ ដោយ៖ ឃួន លក្ខិណា

from： https://tnaot.com/km/m/detail/article/9634947