ភ្នំពេញ ៖ ស្ត្រីសង្ស័យម្នាក់ត្រូវបានចាប់ខ្លួនចូលប៉ុស្តិ៍នគរបាល ចំណែកបក្ខពួក៣នាក់ទៀតបានគេចខ្លួនបាត់ បន្ទាប់ពីក្រុមជនសង្ស័យធ្វើសកម្មភាពប្រើល្បិចចាស់ ទម្លាក់យោង បញ្ឆោតល្បួងយកគ្រឿងអល័ង្កាបានចំនួន២លើកផ្សេងគ្នាផ្ទួនៗ ខណ:ពេលជនរងគ្រោះចុងក្រោយដឹងខ្លួនទាន់ ស្រែកឆោឡោ ផ្អើលដេញចាប់បានម្នាក់ ហេតុការណ៏នេះបានកើតឡើងកាលពីវេលាម៉ោង៧និង៣០នាទីព្រឹក ថ្ងៃទី២៥ ខែសីហា ឆ្នាំ២០២០ នៅដីវាលក្នុងភូមិទួលពង្រ សង្កាត់ចោមចៅ១ ខណ្ឌពោធិសែនជ័យ ។

ជនសង្ស័យចាប់ខ្លួនបានម្នាក់ មានឈ្មោះ ឌឿន ផល្លីន ភេទស្រី អាយុ៣៨ឆ្នាំ មុខរបរ ជំនាញខាងទម្លាក់យោង ស្នាក់នៅផ្ទះជួលភូមិឈូកវ៉ា សង្កាត់កោករការ ខណ្ឌព្រែកព្នៅ មានស្រុកកំណើតភូមិទន្លេបាទី ឃុំក្រាំងធ្នង់ ស្រុកបាទី ខេត្តតាកែវ ។ 

ចំណែករងគ្រោះ២នាក់ ទី១ ឈ្មោះ សេក ចាន់ថន ភេទស្រី អាយុ៣៣ឆ្នាំ មុខរបរកម្មការនីរោងចក្រ មានប្តីឈ្មោះ គៀត ភឿន អាយុ២៨ឆ្នាំ មុខរបរកម្មករសំណង់ ស្នាក់នៅផ្ទះជួល ភូមថ្មី សង្កាត់ដង្កោ ខណ្ឌដង្កោ មានស្រុកកំណើតភូមិសុីការ ឃុំស្វាយយា ស្រុកស្វាយជ្រុំ ខេត្តស្វាយរៀង ។ សម្ភារៈបាត់បង់ អស់កងដៃ១ឈុត (៣០០ដុល្លា) ខ្សែមាស ៣ជី ។ ជនរងគ្រោះទី២ ឈ្មោះ 

ឌឿន លេខ ភេទស្រី អាយុ២១ឆ្នាំ មុខរបរ មេផ្ទះ មានប្តីឈ្មោះ ឆាន់ ណារ៉ូ អាយុ២៨ឆ្នាំ មុខរបរ កម្មកររោងចក្រ ស្នាក់នៅផ្ទះជួល ភូមិត្រពាំងថ្លឹង១ សង្កាត់ចោមចៅ១ ខណ្ឌពោធិសែនជ័យ មានស្រុកកំណើត ភូមិទួលស្រី ឃុំបារាំងធ្លាក់ ស្រុក ភ្នំព្រឹក ខេត្ត បាត់ដំបង ។ សម្ភារៈបាត់បង់ ខ្សែក ចិញ្ចៀនប្លាទីន លុយកាក់ សរុបជាង៥០០ដុល្លា ។

តាមសម្តីជនរងគ្រោះទី១ បានឲ្យដឹងថា កាលពីល្ងាចថ្ងៃទី២៤ ម្សិលមិញ គ្រាដែលចេញពីធ្វើការរោងចក្រ ត្រូវបានជនសង្ស័យ(ស្រី)ខាងលើ និងបក្ខពួក៣នាក់ទៀត ប្រើល្បិចទម្លាក់យោង នាំទៅដោះគ្រឿងអល័ង្កា នៅក្នុងភូមិទួលពង្រ បានឲ្យមកវិញខ្សែកក្រឡៃ ។ រីឯជនរងគ្រោះទី២ បានឲ្យដឹងថា នៅវេលាម៉ោង៧និង៣០នាទីព្រឹកថ្ងៃទី២៥ ខែសីហា នេះ គ្រាដែលដើរទៅរកទិញម្ហូបនៅមុខផ្ទះឡ ផ្លូវចោមចៅ ជនសង្ស័យនិងបក្ខពួកប្រើល្បិចធ្វើជាជ្រុះកាបូបលុយ មាស ហើយល្បួងនាំទៅដីវាលក្នុងទួលពង្រ ដោះយកគ្រឿងអល័ង្កា លុយកាក់ អស់ពីខ្លួនរលីង បានមកវិញខ្សែកក្រឡៃ ដឹងខ្លួនភ្លាមៗ ពិតជាចាញ់បោកគេហើយ ស្រែកឆោឡោ ពលរដ្ឋឃើញជួយដេញចាប់បានស្ត្រីសង្ស័យម្នាក់ ៣នាក់ទៀតក្នុងនោះប្រុស២នាក់ បានយកទ្រព្យសម្បត្តិគេចខ្លួនបាត់ ។

ជនសង្ស័យក្រោយចាប់ខ្លួនបាន នាំចូលប៉ុស្តិ៍ លុះដឹងដល់ជនរងគ្រោះទី១ មកមើលទើបដឹងថាជនសង្ស័យមុខដដែល រួចរួមគ្នាដាក់ពាក្យបណ្តឹងទាំង២នាក់ ស្នើសុំឲ្យសមត្ថកិច្ចចាត់ការតាមផ្លូវច្បាប់ ៕ដោយ÷សួង សាម

from： https://tnaot.com/km/m/detail/article/9625429