និស្សិតសាកលវិទ្យាល័យម្នាក់ត្រូវ​ចោទប្រកាន់ពីបទ​ដាក់ពិន័យមិត្តរួមក្រុមឱ្យរត់រហូតដល់ដួលសន្លប់នៅនឹងកន្លែងកើតហេតុហើយស្លាប់នៅថ្ងៃបន្ទាប់ ​​​។ ជនរងគ្រោះ​មានអាយុ ១៩ ឆ្នាំ ឈ្មោះ Phornphiphat Nong Mint Eaddam ជានិស្សិតឆ្នាំទី ១ នៃសាកលវិទ្យាល័យ Rajabhat ក្នុងខេត្តភូកេតបានស្លាប់នៅមន្ទីរពេទ្យក្នុងតំបន់។

និស្សិតឆ្នាំទី ២ មានឈ្មោះថា Prae ត្រូវបានគេចោទប្រកាន់ថាបានបង្ខំជនល្មើសដែលជាមិត្តរួមក្រុមហាត់សមឲ្យរត់ចំនួន ៨ ជុំ​នៃសាកលវិទ្យាល័យដែលជាការដាក់ទណ្ឌកម្មចំពោះ​កំហុសពេលហាត់សម។ ​ក្រោយរត់បាន ៦ជុំ ជនរងគ្រោះបានដួលនៅនឹងកន្លែងនិងបានស្លាប់នៅព្រឹកថ្ងៃបន្ទាប់នៅមន្ទីរពេទ្យ​ Vachira Phuket  ។ តាមរបាយការណ៍ធ្វើកោសល្យវិច័យបាន​បង្ហាញថា ជនរងគ្រោះស្លាប់ដោយសារជំងឺខ្សោយបេះដូង ព្រោះ​កង្វះអុកស៊ីសែនទៅឱ្យខួរក្បាលរយៈពេល ១៦ នាទី លើសពីនេះជនរងគ្រោះក៏​មានជំងឺឬសដូងបាត និងសួត ដែលបណ្តាលឱ្យហូរឈាមតាមច្រមុះនិងមាត់នៅពេលកើតហេតុ។ ប៉ូលិសកំពុងតែបន្តការស៊ើបអង្កេត​ចំពោះឧប្បត្តិហេតុនេះ។ ​ប៉ូលិសបាននិយាយថាប្រសិនបើសាកលវិទ្យាល័យទទួលខុសត្រូវ​វិន័យកីឡាដែលបណ្តាលឱ្យជនរងគ្រោះស្លាប់ នោះស្ថាប័ននេះអាចប្រឈមនឹងការចោទប្រកាន់ទាក់ទងនឹងមរណភាពរបស់​ជនរងគ្រោះ។ ​

គ្រួសាររបស់​ជនរងគ្រោះបាននិយាយថា ​ជនរងគ្រោះ​តែងតែទៅហាត់សម​ជារៀងរាល់ថ្ងៃចាប់ពីម៉ោង ៥ ល្ងាច ដល់ម៉ោង ៨ យប់ ​ប៉ុន្តែដោយសារនាងមានកំហុសរាល់ពេលហាត់សម ទើប​ត្រូវគេដាក់ពិន័យឱ្យរត់ ដែលជាទូទៅគឺប្រើពេល ១ម៉ោង ទើបអាចត្រឡប់មកផ្ទះវិញបាន ហើយតាមស្ថានភាព ជនរងគ្រោះតែងទៅផ្ទះវិញជាមួយនឹងអាការហត់នឿយ។ ​លើសពីនេះ តាមប្រភពបានឱ្យដឹងថា ជនរងគ្រោះមិនត្រូវបានអនុញ្ញាតឱ្យផឹកទឹកក្នុងពេលដាក់ទណ្ឌកម្មនោះទេ។ ខាងសាកលវិទ្យាល័យបានផ្តល់សំណងជាទឹកប្រាក់ចំនួន  ១០០ ០០០ បាត ប៉ុន្តែក្រុមគ្រួសាររបស់​ជនរងគ្រោះបានបដិសេធមិនទទួលនោះទេ។ មួយវិញទៀត គ្រួសារសពបានស្នើសុំឱ្យមានការស៊ើបអង្កេតបន្ថែមចំពោះមិត្តរួមក្រុមហាត់សម ដោយពិនិត្យមើលកាមេរ៉ាសុវត្ថិភាពនៅក្នុងបរិវេណកើតហេតុ៕ 

កែសម្រួលដោយ៖ ភារ៉ា

ប្រភព៖ the thaiger

from： https://tnaot.com/km/m/detail/article/9622630